കൊച്ചി:തൃപ്പൂണിത്തുറയിൽ കെ.ബാബുവിനെ സ്ഥാനാർഥിയാക്കണമെന്ന് ആവശ്യപ്പെട്ട് കോൺഗ്രസ് പ്രവർത്തകരുടെ പ്രകടനം. തൃപ്പൂണിത്തുറ, പള്ളുരുത്തി, ഇടക്കൊച്ചി, മുളന്തുരുത്തി എന്നിവിടങ്ങളിലാണ് പ്രകടനം നടന്നത്. കോൺഗ്രസ് പ്രവർത്തകർക്കൊപ്പം കെ.എസ്.യു., യൂത്ത് കോൺഗ്രസ്, ഐ.എൻ.ടി.യു.സി. അംഗങ്ങളും ചേർന്നാണ് പ്രകടനം നടത്തിയത്.
ബാബുവിനെ ഒഴിവാക്കി മണ്ഡലത്തിൽ കോൺഗ്രസ് മറ്റൊരു സ്ഥാനാർഥിയെ നിർത്തേണ്ടതില്ലെന്നാണ് പ്രവർത്തകർ പറയുന്നത്. ബാബുവിന് ഇത്തവണ സീറ്റില്ലെന്നും മറ്റൊരാളാകും സ്ഥാനാർഥിയാവുക എന്നും വാർത്തകൾ പുറത്തെത്തിയിരുന്നു. ഇതിനു പിന്നാലെയാണ് തൃപ്പൂണിത്തുറ മണ്ഡലത്തിന്റെ വിവിധഭാഗങ്ങളിൽ ഇന്ന് പ്രകടനം നടക്കുന്നത്.
ഇറക്കുമതി സ്ഥാനാർഥികളെ വേണ്ടെന്നും സ്വരാജിനെ പോലൊരാളെ അട്ടിമറിക്കണമെങ്കിൽ ബാബു തന്നെ വേണമെന്നും പ്രകടനത്തിൽ പങ്കെടുത്ത പ്രവർത്തകരിൽ ഒരാൾ പറഞ്ഞു. ഇറക്കുമതി സ്ഥാനാർഥിയെ ഒന്നടങ്കം ബഹിഷ്കരിച്ചിരിക്കുമെന്നും അതിൽ ഒരു മാറ്റവും പ്രതീക്ഷിക്കേണ്ടതില്ലെന്നും അദ്ദേഹം കൂട്ടിച്ചേർത്തു.