പാലാ: പുതിയ യു.ഡി.എഫ്. മന്ത്രിസഭയിലെ വകുപ്പ് വിഭജനവും മന്ത്രിസ്ഥാനം പങ്കിടലും സംബന്ധിച്ച ചർച്ചകൾക്കിടയിൽ മുന്നണി നേതൃത്വത്തിന് കടുത്ത മുന്നറിയിപ്പുമായി മാണി സി. കാപ്പൻ എം.എൽ.എ. തനിക്ക് മന്ത്രിസ്ഥാനം നൽകുകയാണെങ്കിൽ അത് അഞ്ച് വർഷത്തെ പൂർണ്ണ കാലാവധിയിലേക്കായിരിക്കണമെന്നും, രണ്ടര വർഷം വീതം പങ്കിടുന്ന ‘ടേം വ്യവസ്ഥ’ യാതൊരു കാരണവശാലും സ്വീകാര്യമല്ലെന്നും അദ്ദേഹം അസന്ദിഗ്ദ്ധമായി വ്യക്തമാക്കി. തിരഞ്ഞെടുപ്പ് പ്രചാരണ വേളയിൽ പാലാ നിയസഭാ മണ്ഡലത്തിന് വലിയൊരു സമ്മാനം നൽകുമെന്ന് പരസ്യമായി ഉറപ്പുനൽകിയ കോൺഗ്രസ് നേതാക്കൾ ഇപ്പോൾ അവരുടെ വാക്കു പാലിക്കാൻ തയ്യാറാകണമെന്നും അദ്ദേഹം ആവശ്യപ്പെട്ടു. പാലാ ബിഷപ്പ് ഹൗസിൽ വെച്ച് നടത്തിയ കൂടിക്കാഴ്ചയ്ക്കുശേഷം മാധ്യമങ്ങളോട് പ്രതികരിക്കുകയായിരുന്നു മാണി സി. കാപ്പൻ.
മന്ത്രിസഭയിൽ നിലവിൽ ഒരൊറ്റ സീറ്റുള്ള കക്ഷികളായ മാണി സി. കാപ്പനും (എൻ.സി.കെ.) അനൂപ് ജേക്കബിനും (കേരള കോൺഗ്രസ് ജേക്കബ്) രണ്ടര വർഷം വീതം മന്ത്രിസ്ഥാനം പങ്കിടാനാണ് യു.ഡി.എഫിൽ പ്രാഥമികമായി ആലോചിക്കുന്നത്. എന്നാൽ ഈ ഒത്തുതീർപ്പ് ഫോർമുല അംഗീകരിക്കാൻ താൻ തയ്യാറല്ലെന്ന് കാപ്പൻ നേതൃത്വത്തെ കൃത്യമായി അറിയിച്ചു കഴിഞ്ഞു. നിയമസഭാ തിരഞ്ഞെടുപ്പ് പ്രചാരണ വേളയിൽ വി.ഡി. സതീശനും രമേശ് ചെന്നിത്തലയും പാലായിലെ ജനങ്ങൾക്ക് നൽകിയ വാഗ്ദാനങ്ങൾ അദ്ദേഹം മാധ്യമങ്ങൾക്ക് മുന്നിൽ ഓർമ്മിപ്പിച്ചു. പാലായിൽ നടന്ന തിരഞ്ഞെടുപ്പ് കൺവെൻഷനിൽ വെച്ച്, വോട്ടെണ്ണൽ കഴിഞ്ഞ് മാണി സി. കാപ്പൻ തിരിച്ചു വരുന്നത് ‘കൊടിവെച്ച ഔദ്യോഗിക വണ്ടിയിലായിരിക്കും’ എന്ന് വി.ഡി. സതീശൻ പ്രസംഗിച്ചിരുന്നു. പാലായ്ക്ക് വലിയൊരു സമ്മാനം (മന്ത്രിപദം) നൽകുമെന്ന് ചെന്നിത്തലയും പറഞ്ഞിരുന്നതായി കാപ്പൻ ചൂണ്ടിക്കാട്ടി.
താൻ മുൻപ് ഒരു അന്താരാഷ്ട്ര വോളിബോൾ താരം കൂടിയായിരുന്നു എന്ന കാര്യം ഓർമ്മിപ്പിച്ചുകൊണ്ടാണ് കാപ്പൻ മുന്നണി രാഷ്ട്രീയത്തെ ഉപമിച്ചത്. “ആറുപേർ ചേർന്ന് കളിക്കുന്ന ഒരു വോളിബോൾ ടീമിൽനിന്ന് പ്രധാനപ്പെട്ട ഒരാളെ മാത്രം മാറ്റിനിർത്തി കളി മുന്നോട്ട് കൊണ്ടുപോകാൻ ആർക്കും കഴിയില്ല. നമ്മൾ എപ്പോഴും ‘ടീം യുഡിഎഫ്’ എന്നല്ലേ പറയുന്നത്? ഞാൻ എന്താ ഈ ടീം യുഡിഎഫിൽ അംഗമല്ലേ?” എന്ന് അദ്ദേഹം മാധ്യമങ്ങളോട് ചോദിച്ചു. മുന്നണിയിൽ നിന്നും തനിക്ക് അനുകൂലമായ തീരുമാനം ഉണ്ടായില്ലെങ്കിൽ അടുത്ത നീക്കം എന്തായിരിക്കുമെന്ന ചോദ്യത്തിന്, അത് ആ സമയത്ത് അനുയോജ്യമായി ആലോചിച്ച് തീരുമാനിക്കുമെന്നായിരുന്നു കാപ്പന്റെ മറുപടി.
തനിക്ക് മന്ത്രിസ്ഥാനം നൽകുന്ന കാര്യത്തിൽ ഔദ്യോഗികമായ അറിയിപ്പുകളൊന്നും ഇതുവരെ കെ.പി.സി.സി. നേതൃത്വത്തിൽ നിന്നും ലഭിച്ചിട്ടില്ലെന്നും അദ്ദേഹം കൂട്ടിച്ചേർത്തു. മന്ത്രിയാകുന്ന കാര്യത്തിൽ അന്തിമ തീരുമാനം ഉണ്ടായതിന് ശേഷം മാത്രമേ തനിക്ക് ഏത് വകുപ്പ് വേണം എന്നതിനെക്കുറിച്ച് ആലോചിക്കൂ. എൽ.ഡി.എഫ്. മുന്നണിയിലെ പ്രമുഖ നേതാവായ ജോസ് കെ. മാണിയെ കടുത്ത പോരാട്ടത്തിലൂടെ പരാജയപ്പെടുത്തി വന്ന എം.എൽ.എ. എന്ന നിലയിൽ, തനിക്കും തന്റെ മണ്ഡലത്തിനും അർഹമായ പ്രാധാന്യവും പരിഗണനയും യു.ഡി.എഫ്. സർക്കാരിൽ ലഭിക്കണമെന്നാണ് മാണി സി. കാപ്പന്റെ പ്രധാന വാദം. കാപ്പന്റെ ഈ ഉറച്ച നിലപാട് കോൺഗ്രസ് ഹൈക്കമാൻഡിനെയും നിയുക്ത മുഖ്യമന്ത്രി വി.ഡി. സതീശനെയും പുതിയ പ്രതിസന്ധിയിലാക്കിയിട്ടുണ്ട്.
Mani C. Kappan, MLA from Pala, has adopted a firm stance regarding cabinet formation in the new UDF government. Speaking after a meeting at the Bishop’s House, Kappan rejected the UDF’s proposed formula to share a ministerial berth with Anoop Jacob for two and a half years each. Demanding a full five-year term, Kappan reminded Congress leaders V.D. Satheesan and Ramesh Chennithala of their election campaign promises that he would return to Pala in an official minister’s vehicle.