ചെന്നൈ: തെന്നിന്ത്യൻ സിനിമാലോകത്തെ പിടിച്ചുലയ്ക്കുന്ന ജയം രവി-ആരതി വിവാഹമോചന തർക്കങ്ങളിൽ നടി ഖുശ്ബുവും നടൻ രവി മോഹനും (ജയം രവി) തമ്മിലുള്ള വാക്പോര് മുറുകുന്നു. കഴിഞ്ഞ ദിവസം ചെന്നൈയിൽ വിളിച്ചുചേർത്ത വാർത്താസമ്മേളനത്തിൽ തനിക്കെതിരെ പേരെടുത്തു പറയാതെ കടുത്ത ആരോപണങ്ങൾ ഉന്നയിച്ച രവി മോഹന് സാമൂഹികമാധ്യമങ്ങളിലൂടെ ശക്തമായ മറുപടിയാണ് ഖുശ്ബു നൽകിയിരിക്കുന്നത്.
“ചിലർ അവരുടെ ജനിതകം (Genetics) എത്രത്തോളമുണ്ടെന്ന് പൊതുസമൂഹത്തിന് മുന്നിൽ തെളിയിക്കാൻ പരമാവധി ശ്രമിക്കുകയാണ്. ഞാൻ ആ വ്യക്തിയെക്കുറിച്ച് വിചാരിച്ചത് ശരിയാണെന്ന് ഇപ്പോൾ തെളിയിച്ചതിന് നന്ദി,” എന്നായിരുന്നു ഖുശ്ബു എക്സിൽ (ട്വിറ്റർ) കുറിച്ചത്. രവി മോഹന്റെ ‘ഇഡ്ഡലി നടി’ പ്രയോഗത്തിനുള്ള ഖുശ്ബുവിന്റെ ഈ തകർപ്പൻ മറുപടി കോളിവുഡിൽ വലിയ ചർച്ചയായിട്ടുണ്ട്.
കഴിഞ്ഞ ദിവസത്തെ വാർത്താസമ്മേളനത്തിൽ പൊട്ടിക്കരഞ്ഞുകൊണ്ട് സംസാരിക്കുന്നതിനിടയിലാണ് മൂന്നക്ഷരത്തിൽ പേരുള്ള ഒരു പ്രമുഖ നടി തന്റെ ജീവിതത്തിൽ ഇടപെടുകയാണെന്ന് രവി മോഹൻ ആരോപിച്ചത്. “മൂന്നക്ഷരത്തിൽ പേരുള്ള ഒരു നടിയുണ്ടല്ലോ, ‘ഇഡ്ഡലി നടികൈ’ (ഇഡ്ഡലി നടി). അവരും എന്റെ പേര് നേരിട്ട് പരാമർശിക്കാതെ എന്നെക്കുറിച്ച് ഓരോന്ന് പറഞ്ഞു നടക്കുകയാണ്. അവർ തങ്ങളുടെ കുടുംബ ജീവിതം തകർത്തുവെന്ന് അവരുടെ തലമുറയിൽപ്പെട്ട മൂന്ന് സീനിയർ നായകന്മാർ എന്നോട് നേരിട്ട് പറഞ്ഞിട്ടുണ്ട്.
അങ്ങനെയുള്ള അവരാണ് ഇപ്പോൾ എന്റെ ജീവിതത്തെയും കുടുംബത്തെയും കുറിച്ച് സംസാരിക്കാൻ വരുന്നത്. എന്തെങ്കിലും പ്രശ്നം വന്നാൽ ഉടൻ തന്നെ താൻ വലിയൊരു ഫെമിനിസ്റ്റ് ആണെന്ന് പറഞ്ഞ് അവർ വഴുതിമാറും. ഇതൊക്കെ എന്ത് നാടകമാണ്? എന്നെ വിമർശിക്കാൻ ഇവർക്കെന്താണ് യോഗ്യത?” എന്നായിരുന്നു രവി മോഹന്റെ രൂക്ഷമായ വാക്കുകൾ.
രവി മോഹന്റെ മുൻഭാര്യ ആരതി കഴിഞ്ഞ ദിവസം ഇൻസ്റ്റാഗ്രാമിൽ പങ്കുവെച്ച വൈകാരികമായ കുറിപ്പിന് പൂർണ്ണ പിന്തുണയുമായി ഖുശ്ബു രംഗത്തെത്തിയതാണ് നടനെ ചൊടിപ്പിച്ചത്. “ഉറങ്ങിക്കിടക്കുന്ന സിംഹത്തെ ഉണർത്താൻ ശ്രമിക്കരുത്. അവളൊരു പെൺസിംഹമാണെങ്കിൽ നിങ്ങളെ രക്ഷിക്കാൻ പിന്നീട് ദൈവം തന്നെ വരേണ്ടി വരും. എന്റെ മാന്യമായ നിശബ്ദതയെ ബലഹീനതയായി കാണരുത്.
എന്റെ മക്കളേയും അന്തസ്സിനേയും സംരക്ഷിക്കാൻ വേണ്ടി ഞാൻ ഏത് അതിരുകളും ലംഘിക്കും. സത്യവുമായി ഞാൻ ഈ ലോകത്തെ നേരിടും,” എന്നായിരുന്നു ആരതിയുടെ കുറിപ്പ്. ഇതിനെ ഖുശ്ബു പിന്തുണച്ചതോടെ രവി മോഹൻ അനുകൂലികൾ ഖുശ്ബുവിനെതിരെ വലിയ രീതിയിലുള്ള സൈബർ ആക്രമണം നടത്തിയിരുന്നു.
കുടുംബ തർക്കങ്ങളിലേക്ക് പുറത്തുനിന്നുള്ള സിനിമാ താരങ്ങൾ കൂടി ഇടപെടാൻ തുടങ്ങിയതോടെ തെന്നിന്ത്യൻ സിനിമയിലെ താരസംഘടനകളും ഈ വിഷയത്തിൽ ആശങ്കയിലാണ്. ഫെമിനിസത്തെയും വ്യക്തിജീവിതത്തെയും മുൻനിർത്തി ഇരുപക്ഷവും നടത്തുന്ന ഈ പോരാട്ടം വരും ദിവസങ്ങളിൽ കൂടുതൽ ശക്തമാകാനാണ് സാധ്യത. രവി മോഹന്റെ കരിയറിലെ താൽക്കാലിക ഇടവേള പ്രഖ്യാപനത്തിന് പിന്നാലെ ഖുശ്ബുവും കൂടി രംഗത്തെത്തിയതോടെ തമിഴ് സിനിമാ ലോകം ഇപ്പോൾ ഈ രണ്ട് ചേരികളിലായുള്ള ചർച്ചകളിലാണ്.
Veteran actress Khushbu Sundar has hit back at actor Ravi Mohan (Jayam Ravi) following his derogatory “Idli Nadigai” (Idli actress) remarks at a recent press conference. Without naming him directly, Khushbu tweeted that some people are trying hard to prove their genetics and thanked him for proving her right. The rift started after Khushbu openly supported Ravi’s estranged wife Aarathi’s “lioness” post, prompting the actor to accuse the three-lettered actress of being a hypocritical feminist who disrupted families of senior actors in the past.