ന്യൂഡല്‍ഹി: പ്രണയ ബന്ധത്തെ എതിര്‍ത്തതിന് കാമുകിയുടെ സഹോദരനെ വെടിവെച്ച് കൊലപ്പെടുത്തിയ യൂട്യൂബറും സുഹൃത്തുക്കളും അറസ്റ്റില്‍. നോയിഡ സെക്ടര്‍ 53 സ്വദേശിയായ പ്രമുഖ യൂട്യൂബര്‍ നിസാമുല്‍ ഖാന്‍, ഇയാളുടെ സുഹൃത്തുക്കളായ സുമിത് ശര്‍മ, അമിത് ഗുപ്ത എന്നിവരാണ് നോയിഡ പോലീസിന്റെ പിടിയിലായത്.
ഇവരുടെ ബൈക്കുകളും തോക്കും വെടിയുണ്ടകളും മൊബൈല്‍ ഫോണുകളും പോലീസ് പിടിച്ചെടുത്തിട്ടുണ്ട്. ഒക്ടോബര്‍ 28നാണ് സംഭവമുണ്ടായത്. നോയിഡ സെക്ടര്‍ 31ല്‍ താമസിക്കുന്ന കമല്‍ ശര്‍മ എന്ന 26കാരനെ പ്രതികള്‍ വെടിവെച്ച് കൊലപ്പെടുത്തുകയായിരുന്നു. രാത്രി ജോലി കഴിഞ്ഞ ബൈക്കില്‍ വീട്ടിലേക്ക് മടങ്ങുന്നതിനിടെയാണ് കമല്‍ അക്രമത്തിനിരയായത്.
പോലീസ് കേസെടുത്ത് അന്വേഷണം ആരംഭിച്ചിരുന്നെങ്കിലും പ്രതികളെക്കുറിച്ച് സൂചനകളൊന്നും ലഭിച്ചിരുന്നില്ല. ഇതിനിടെയാണ് കമലിന്റെ സഹോദരിയെ കേന്ദ്രീകരിച്ച് പൊലീസ് അന്വേഷണം നടത്തിയത്. തുടര്‍ന്ന് ഇവരുടെ ഫോണ്‍വിളി വിവരങ്ങളില്‍നിന്ന് പ്രതികളെ തിരിച്ചറിഞ്ഞത്.
സഹോദരിയും നിസാമുലും തമ്മിലുള്ള ബന്ധത്തെ കമല്‍ എതിര്‍ത്തതാണ് കൊലപാതകത്തിലേക്ക് നയിച്ചതെന്ന് പോലീസ് വ്യക്തമാക്കി. ഇരുവരും തമ്മില്‍ അടുപ്പത്തിലാണെന്നറിഞ്ഞ കമല്‍ സഹോദരിയുടെ ഫോണ്‍ പിടിച്ചുവാങ്ങുകയും നിസാമുലിനെ മര്‍ദിക്കുകയും ചെയ്തിരുന്നു. ഇതോടെയാണ് കമലിനെ ഇവര്‍ കൊലപ്പെടുത്താന്‍ തീരുമാനിച്ചത്.