പത്തനംതിട്ട: പന്തളത്ത് പട്ടാപ്പകല് കടയിലെത്തി പണമടങ്ങിയ ബാഗ് മോഷ്ടിച്ച ശേഷം കടന്നുകളഞ്ഞ പ്രതി പിടിയില്. അമ്പലപ്പുഴ ഹെല്ത്ത് സെന്ററിനു സമീപം വാടകയ്ക്കു താമസിക്കുന്ന കൊല്ലം കുണ്ടറ സ്വദേശി ശ്യാംകുമാര് (32) നെയാണ് പന്തളം പോലീസ് അറസ്റ്റ് ചെയ്തത്. പന്തളം കടയക്കാട് ജംഗ്ഷനില് കട നടത്തുന്ന ഷെരീഫാ ബീവിയുടെ കടയില് നിന്നാണ് ഇയാള് പണമടങ്ങിയ ബാഗ് മോഷ്ടിച്ചത്. ശനിയാഴ്ച ഉച്ചയ്ക്ക് രണ്ടരയോടെയാണ് സംഭവം.
കാറിലെത്തിയ ശ്യാംകുമാര് കയര് ആവശ്യപെട്ടാണ് കടയ്ക്കുള്ളില് കയറിയത്. ഈ സമയം ഷെരീഫാ ബീവി മാത്രമാണ് കടയിലുണ്ടായിരുന്നത്. ഇവര് കയറെടുക്കുന്നതിനിടെ കടയില് സൂക്ഷിച്ചിരുന്ന പണമടങ്ങിയ ബാഗുമായി ഇയാള് കാറില് കയറി രക്ഷപെടുകയായിരുന്നു. തുടര്ന്ന് ഷെരീഫാ ബീവിയുടെ മകന് നല്കിയ പരാതിയില് പോലീസ് നടത്തിയ അന്വേഷണത്തിലാണ് ശ്യാംകുമാര് പിടിയിലാകുന്നത്.
സമീപമുള്ള കടകളിലെ സിസി ടിവി ദൃശ്യങ്ങള് പരിശോധിച്ച പോലീസിന് ഇയാള് വന്ന കാറിന്റെ ദൃശ്യങ്ങള് നമ്പര് സഹിതം ലഭിച്ചു. തുടര്ന്ന് നടന്ന അന്വേഷണത്തില് അമ്പലപുഴയില് നിന്നു ഇയാളെ പിടികൂടുകയായിരുന്നു. കോടതിയില് ഹാജരാക്കിയ പ്രതിയെ റിമാന്ഡ് ചെയ്തു.