പുനലൂര്‍: കൂട്ടുകാരിയുടെ ഫോട്ടോ മുഖചിത്രമാക്കി വ്യാജ ഫേസ്ബുക്ക് വിലാസമുണ്ടാക്കി പുനലൂര്‍ സ്വദേശിയായ യുവതിക്ക് മൊബൈല്‍ ഫോണിലൂടെ അശ്ലീല ചിത്രങ്ങള്‍ അയച്ചു കൊടുത്ത യുവാവിനെ പോലീസ് പിടികൂടി. പുനലൂര്‍ ചെമ്മന്തൂര്‍ മുള്ളിക്കാട്ടില്‍ പുത്തന്‍വീട്ടില്‍ റോബിന്‍ റോയി ജോണ്‍ എന്ന 29കാരനാണ് പുനലൂര്‍ പോലീസിന്റെ പടിയിലായത്.
മഹാരാഷ്ട്രയില്‍ ജോലി ചെയ്തിരുന്ന പുനലൂര്‍ സ്വദേശിയായ യുവതി ജില്ലാ റൂറല്‍ എസ്.പി. ഹരിശങ്കറിന് ഇ മെയിലിലൂടെ പരാതി നല്‍കിയിരുന്നു. തുടര്‍ന്ന് സൈബര്‍ സല്‍ പരാതിയില്‍ അന്വേഷണം നടത്തി. ഒടുവില്‍ പ്രതിയെ കണ്ടെത്തുകയും പോലീസ് പിടികൂടുകയുമായിരുന്നു. മൊബൈല്‍ ഫോണും പോലീസ് പിടിച്ചെടുത്തിട്ടുണ്ട്.
പരാതി നല്‍കിയ യുവതിയുടെ കൂട്ടുകാരിയുടെ ഫോട്ടോ മുഖചിത്രമാക്കി വ്യാജ ഫേസ്ബുക്ക് വിലാസമുണ്ടാക്കി ഈ അക്കൗണ്ടില്‍ നിന്നും അശ്ലീല ചിത്രങ്ങള്‍ അയയ്ക്കുകയായിരുന്നു. കഴിഞ്ഞ മാസം അഞ്ചാം തീയതി മുതല്‍ യുവാവ് അശ്ലീല ചിത്രങ്ങള്‍ അയച്ചുകൊണ്ടിരിക്കുകയായിരുന്നു.
നിരവധി പ്രാവശ്യം താക്കീത് കൊടുത്തെങ്കിലും കാര്യമുണ്ടായില്ല. തുടര്‍ന്നാണ് റൂറല്‍ എസ്പിക്ക് പരാതി നല്‍കിയത്. എസ്.ഐമാരായ രാജ്കുമാര്‍, അജികുമാര്‍, ഗോപകുമാര്‍, എ.എസ്.ഐമാരായ രാജന്‍, അനില്‍കുമാര്‍, സി.പി.ഒമാരായ ജിജോ, ശബരീഷ്, അഭിലാഷ്, രജിത്ത് ലാല്‍ തുടങ്ങിയവരുടെ നേതൃത്വത്തിലാണ് അറസ്റ്റ്.