പാലക്കാട്: മന്ത്രവാദത്തിന്റെ പേരില്‍ തൃത്താലയില്‍ യുവതിയില്‍ നിന്ന് പണവും സ്വര്‍ണവും കബളിപ്പിച്ച് തട്ടിയെടുത്ത് മുങ്ങിയ സ്ത്രീയെ നാട്ടുകാര്‍ പിടികൂടി. നാടകീയതകള്‍ക്കൊടുവില്‍ ഓട്ടോ ഡ്രൈവര്‍മാരുടെ സമയബന്ധിതമായ ഇടപെടലില്‍ മധ്യ വയസ്‌കയെ പിടിക്കാന്‍ സഹായിച്ചത്.
തൃത്താല കുമ്പിടി തിരുവിലുള്ള ഒരു വീട്ടില്‍ ശനിയാഴ്ച ഉച്ചക്ക് 12 മണിയോടെയാണ് സംഭവം. വാടകയ്ക്ക് താമസിക്കുന്ന യുവതിയുടെ വീട്ടിലെത്തിയ നാടോടിയായ മധ്യ വയസ്‌ക സര്‍പ്പദോഷം അകറ്റാന്‍ വീട്ടില്‍ സൂക്ഷിച്ച പൊട്ടിയ കമ്മലും നിശ്ചിത തുക പൈസയും എടുത്തു നല്‍കാന്‍ ആവശ്യപ്പെടുകയായിരുന്നു.
മധ്യവയസ്‌കയായ സ്ത്രീ തന്ത്രപരമായി സ്വര്‍ണവും പണവും കൈക്കലാക്കി ഓട്ടോയില്‍ കയറി രക്ഷപ്പെട്ടു. പന്തികേട് തോന്നിയ യുവതി സമീപത്തെ യുവാക്കളെ വിവരമറിയിച്ചതിന്റെ അടിസ്ഥാനത്തില്‍ ഓട്ടോ ഡ്രൈവര്‍മാരുടെ സമയോചിത ഇടപെടല്‍ സ്ത്രീയെ പിടികൂടി സ്വര്‍ണവും പണവും തിരികെ വാങ്ങാന്‍ സഹായിച്ചു. ജനങ്ങളുടെ ദുര്‍ബല മനസ്സുകള്‍ ചൂഷണം ചെയ്യുന്ന ഇത്തരം തട്ടിപ്പ് സംഘങ്ങള്‍ നാട്ടിന്‍ പുറങ്ങളില്‍ സജീവമാകുമ്പോള്‍ വഞ്ചിതരാകാതിരിക്കാന്‍ ജനങ്ങള്‍ കൂടുതല്‍ ജാഗ്രത പാലിക്കണമെന്ന് തൃത്താല പോലീസ് പറഞ്ഞു.