വര്‍ക്കല: ട്രെയിന്‍ അടുത്ത സ്റ്റേഷന്‍ വിടുന്നതിനു മുമ്പ് എത്താനായി ഓട്ടോയില്‍ പോകുകയായിരുന്ന കുടുംബത്തെ റെയില്‍വേ ഗേറ്റില്‍ പൂട്ടിയിട്ടതായി പരാതി. ട്രെയിന്‍ പോയിട്ടും ഗേറ്റ് തുറക്കാന്‍ വൈകിയത് ഓട്ടോഡ്രൈവര്‍ ചോദ്യം ചെയ്തതിനാണ് ഓട്ടോറിക്ഷയെയും യാത്രക്കാരെയും ഗേറ്റ് കീപ്പര്‍ ലെവല്‍ക്രോസിനുള്ളില്‍ പൂട്ടിയിട്ടത്.
വര്‍ക്കല പുന്നമൂട് റെയില്‍വേ ഗേറ്റില്‍ ബുധനാഴ്ച രാവിലെ 4.30-ഓടെയായിരുന്നു സംഭവം. വര്‍ക്കല സ്വദേശി ആശിഷിന്റെ ഓട്ടോയില്‍ സഞ്ചരിച്ച മലയിന്‍കീഴ് സ്വദേശി സാജന്‍, അമ്മ സൂസി എന്നിവര്‍ക്കാണ് ദുരനുഭവമുണ്ടായത്.
കുടുംബത്തെ ലിഫ്റ്റിങ് ബാരിയര്‍ താഴ്ത്തി 10 മിനിറ്റോളം ഇവരെ ഗേറ്റിനുള്ളില്‍ തടഞ്ഞിട്ടതായാണ് പരാതി. സാജനും ഭാര്യ ആദിത്യയും അമ്മയും തിരുവനന്തപുരത്തുനിന്ന് ആലപ്പുഴയിലേക്ക് ഏറനാട് എക്സ്പ്രസില്‍ വരികയായിരുന്നു. ഡി-ഏഴ് കമ്പാര്‍ട്ട്‌മെന്റില്‍ കയറേണ്ട ഇവര്‍ മറ്റൊന്നില്‍ മാറിക്കയറി. തീവണ്ടി വര്‍ക്കലയില്‍ എത്തിയപ്പോള്‍ ഇവര്‍ പുറത്തിറങ്ങി ഡി-ഏഴില്‍ കയറാന്‍ ശ്രമിച്ചു. സാജന്റെ ഭാര്യ കയറിക്കഴിഞ്ഞപ്പോള്‍ തീവണ്ടി നീങ്ങിത്തുടങ്ങിയതിനാല്‍ മറ്റുള്ളവര്‍ക്കു കയറാനായില്ല.
മറ്റൊരു വാഹനത്തില്‍ കൊല്ലം സ്റ്റേഷനിലെത്താനും താനവിടെ കാത്തിരിക്കാമെന്നും സാജനെ ഭാര്യ ഫോണില്‍ അറിയിച്ചു. തുടര്‍ന്നാണ് സാജനും അമ്മയും വര്‍ക്കലയില്‍ നിന്ന് ഓട്ടോറിക്ഷയില്‍ കൊല്ലത്തേക്കു തിരിച്ചത്. വഴിയിലെ പുന്നമൂട് ഗേറ്റ് തീവണ്ടി കടന്നുപോയിട്ടും അടഞ്ഞുകിടക്കുന്നതായി കണ്ടു. ഓട്ടോഡ്രൈവര്‍ ഹോണ്‍ മുഴക്കിയപ്പോഴാണ് ഗേറ്റ് കീപ്പര്‍ തുറക്കാന്‍ തുടങ്ങിയത്. ഗേറ്റിനുള്ളില്‍ ഓട്ടോ പ്രവേശിച്ചപ്പോള്‍ ഡ്രൈവര്‍ ഇതേക്കുറിച്ച് ഗേറ്റ് കീപ്പറെ ചോദ്യംചെയ്തു.
ഇതില്‍ പ്രകോപിതനായ ഗേറ്റ് കീപ്പര്‍ ലിഫ്റ്റിങ് ബാരിയര്‍ താഴ്ത്തി ഓട്ടോ തടഞ്ഞിടുകയായിരുന്നു. ഇതോടെ ഇരുവരും തമ്മില്‍ തര്‍ക്കവും വാക്കേറ്റവുമായി. 10 മിനിറ്റോളം കഴിഞ്ഞാണ് ഗേറ്റ് തുറന്നതെന്ന് ഓട്ടോഡ്രൈവര്‍ പറഞ്ഞു. സംഭവത്തെക്കുറിച്ച് ഓട്ടോഡ്രൈവര്‍ റെയില്‍വേ അധികൃതര്‍ക്കു പരാതി നല്‍കി.