കണ്ണൂര്: ‘ക്ഷമിക്കണം… യാത്ര വൈകിയത് കോച്ചിനുള്ളില് പാറ്റകളുടെ ശല്യം കാരണമാണ്, ഖേദിക്കുന്നു’. കണ്ണൂര്-ബെംഗളൂരു (16512) എക്സ്പ്രസ് വണ്ടിയുടെ യാത്ര രണ്ടുമണിക്കൂര് വൈകിയ സംഭവത്തില് റെയില്വേയുടെ ‘തറന്നുപറച്ചില്’ ശ്രദ്ധേയമാകുന്നു. യാത്രക്കാരി പ്രസന്ന ഇടയില്യം റെയില് മദദ് ആപ്പില് നല്കിയ പരാതിക്കാണ് റെയില്വേ ഉടന് മറുപടി നല്കിയത്.
തിങ്കളാഴ്ചയാണ് സംഭവം. വൈകീട്ട് 5.40-ന് കണ്ണൂരില്നിന്ന് മംഗളൂരു വഴി ബെംഗളൂരുവിലേക്ക് പുറപ്പെട്ട തീവണ്ടിയിലെ എസ്-3 കംപാര്ട്ട്മെന്റിലെ യാത്രക്കാരായിരുന്നു നാവികസേന മുന് കമാന്ഡറായ കാഞ്ഞങ്ങാട്ടെ പ്രസന്ന ഇടയില്യവും അച്ഛന് എ. കുഞ്ഞിരാമന് നായരും. 8.10-ന് മംഗളൂരുവില് എത്തി. 10.10-ന് സുബ്രഹ്മണ്യറോഡില് എത്തിയ വണ്ടി അവിടെ നിന്നു.
ഏറെനേരം നിര്ത്തിയിട്ടതിന്റെ കാരണം അന്വേഷിച്ച് പ്രസന്ന ഇടയില്യം പരാതി അയച്ചു. നിമിഷങ്ങള്ക്കകം റെയില്വേ മറുപടി നല്കി. എസ്-6 കോച്ചില് പാറ്റകളുടെ ശല്യം ഉണ്ടെന്നും അത് സ്പ്രേ അടിച്ച് കളയുകയാണെന്നുമായിരുന്നു അറിയിപ്പ്. ഇത്തരം കാരണങ്ങളുടെ പേരില് യാത്ര വൈകുന്നത് ശരിയല്ലെന്നും എന്നാല് റെയില്വേ സത്യസന്ധമായ മറുപടി നല്കിയതില് സന്തോഷമുണ്ടെന്നും അവര് പറഞ്ഞു.