തങ്ങളുടെ ആദ്യത്തെ കുഞ്ഞിനെ വരവേല്‍ക്കാനുള്ള കാത്തിരിപ്പിലാണ് ചലച്ചിത്രതാരം കാജല്‍ അഗര്‍വാളും ഭര്‍ത്താവ് ഗൗതം കിച്ച്‌ലുവും. ഗര്‍ഭകാലത്ത് സമൂഹമാധ്യമങ്ങളില്‍ പലപ്പോഴായി ബോഡിഷെയ്മിങ്ങിന് ഇരയായിട്ടുള്ള വ്യക്തിയാണ് കാജല്‍ കാജല്‍ അഗര്‍വാള്‍.
എന്നാല്‍ ഗര്‍ഭകാലത്ത് ഏത് സ്ത്രീയിലും ഉണ്ടാകുന്ന മാറ്റങ്ങളാണ് തനിക്കും സംഭവിക്കുന്നതെന്ന് ഉറക്കെ പ്രഖ്യാപിച്ചു കൊണ്ട് പരിഹസിച്ചവരുടെ വായടപ്പിച്ചിട്ടുണ്ട് കാജല്‍. ഇപ്പോഴിതാ കുഞ്ഞിനായുള്ള കാത്തിരിപ്പിനെ കുറിച്ച് ആരാധകരുമായി പങ്കുവയ്ക്കുകയാണ് താരം.
ശരീരത്തില്‍ വന്ന മാറ്റങ്ങളെ കുറിച്ചും ഗര്‍ഭകാലത്തെ ശാരീരിക മാനസിക അവസ്ഥകളെ കുറിച്ചും ഗ്ലോബല്‍ സ്പാ എന്ന മാധ്യമത്തിനു നല്‍കിയ അഭിമുഖത്തിലാണ് കാജല്‍ പറയുന്നത്. ‘കുഞ്ഞിനെ വരവേല്‍ക്കാന്‍ ഞങ്ങള്‍ ആവേശത്തോടെ കാത്തിരിക്കുകയാണ്. ഒരേസമയം ആശങ്കയും ആവേശവും ഉണ്ട്. കുഞ്ഞിനെ നല്ല വ്യക്തിയായി വളര്‍ത്തിയെടുക്കുന്നതില്‍ മാതാപിതാക്കളുടെ പങ്ക് വളരെ പ്രധാനമാണ്. ശരിയായ മുല്യങ്ങളും മാതൃകകളും നിറച്ച് ആ ജീവനെ വളര്‍ത്തേണ്ടത് വലിയ ഉത്തരവാദിത്തമാണ്.’- താരം പറയുന്നു.
ഗര്‍ഭകാലത്തെ ആദ്യത്തെ മൂന്നു മാസം അല്‍പം കഠിനമായിരുന്നു. ഗര്‍ഭിണിയാകുമ്പോള്‍ ഒരു സ്ത്രീയുടെ ശരീരത്തില്‍ വലിയ മാറ്റങ്ങളുണ്ടാകുന്നു. യോഗയും നടത്തവും ആരോഗ്യകരമായ ഭക്ഷണരീതിയും കൊണ്ടാണ് കഠിനമായ അവസ്ഥയെ മറികടന്നത്. പരമാവധി സമയം കുടുംബത്തിനൊപ്പം ചിലവഴിക്കും.
ബന്ധങ്ങള്‍ നിലനിര്‍ത്തുക, ഇഷ്ടപ്പെട്ട പാട്ട് കേള്‍ക്കുക, ഇഷ്ടമുള്ള ഭക്ഷണം കഴിക്കുക എന്നിവയെല്ലാമാണ് ഇക്കാലത്തെ ഏറ്റവും പ്രധാനപ്പെട്ടകാര്യങ്ങള്‍. കുടുംബത്തോടൊപ്പം സമയം ചെലവഴിക്കുമ്പോഴാണ് തനിക്ക് ഏറെ സന്തോഷം ലഭിക്കുന്നത്.ഇപ്പോള്‍ അതിന് സമയം കിട്ടാറുണ്ടെന്നും താന്‍ സന്തോഷവതിയാണെന്നും താരം പറയുന്നു.
