തിരുവനന്തപുരം: അമ്മ മകനെ പീഡിപ്പിച്ചെന്ന പോക്സോ കേസില് ബാലക്ഷേമ സമിതി മകന് നടത്തിയ കൗണ്സലിംഗ് റിപ്പോര്ട്ട് പുറത്ത്. അമ്മയ്ക്ക് എതിരെ കുട്ടി പറഞ്ഞ കാര്യങ്ങളില് ഉറച്ചു നില്ക്കുന്നതായാണ് റിപ്പോര്ട്ടില് പറയുന്നത്. ബാലക്ഷേമ സമിതി നവംബര് 13ന് തയ്യാറാക്കിയ റിപ്പോര്ട്ട് നവംബര് 30 തിനാണ് പോലീസിന് നല്കിയത്.
ഇതിന്റെ അടിസ്ഥാനത്തില് ഡിസംബര് 18 നായിരുന്നു പൊലീസ് എഫ്ഐആര് തയ്യാറാക്കിയത്. നേരത്തെ പരാതിക്കാരിയുടെ കോളത്തില് പേര് വന്നതിനെതിരെ ബാലക്ഷേമ സമിതി രംഗത്തെത്തിയിരുന്നു. അതിനിടെ അമ്മയ്ക്കെതിരായ പോക്സോ കേസില് ഐജിയുടെ അന്വേഷണം തുടങ്ങി. കേസ് ഫയലുകള് ഐജി ഹര്ഷിത അട്ടല്ലൂരി വിളിപ്പിച്ചു. സംഭവത്തില് യുവതിയുടെ കുടുംബം ഇന്ന് ഡിജിപിക്കും മുഖ്യമന്ത്രിക്കും പരാതി നല്കും.
അമ്മക്കെതിരെ പരാതി നല്കിയ കുട്ടിയെ പരിശോധനകള്ക്കായി മെഡിക്കല് ബോര്ഡിന് മുന്നില് ഹാജരാക്കാനും പോലീസ് ശ്രമമുണ്ട്. കേസിന്റെ ആദ്യഘട്ടമായ പരാതി മുതല് കുട്ടിക്ക് കൗണ്സിലിങ്ങ് നടത്തിയതും അറസ്റ്റിലേക്ക് നീങ്ങിയതുമടക്കം മുഴുവന് നടപടികളും ഐ.ജി പരിശോധിക്കും. കുടുംബവഴക്ക് നിലനില്ക്കുന്ന കേസാണെന്ന് അറിഞ്ഞിട്ടും നടപടികളില് പോലീസ് തിടുക്കം കാട്ടിയോ, കൃത്യമായ നടപടിക്രമങ്ങള് പാലിച്ചോ എന്നതടക്കം അറിയുന്നതിനാണ് ഫയലുകള് വിളിപ്പിച്ചിരിക്കുന്നത്. ആറ്റിങ്ങല് ഡിവൈഎസ്പിയില് നിന്നും കടയ്ക്കാവൂര് എസ്.ഐയില് നിന്നും വിവരങ്ങള് ആരായും. കേസ് കെട്ടിച്ചമച്ചതാണെന്നു കാട്ടി സമഗ്രാന്വേഷണമാവശ്യപ്പെട്ട് കുടുബം നല്കുന്ന പരാതിയും ഐ.ജിയായിരിക്കും അന്വേഷിക്കുക.
പോലീസിനെതിരെ ബാലക്ഷേമസമിതി നല്കുന്ന പരാതിയും ഐ.ജിയ്ക്ക് കൈമാറിയേക്കും. വിവാദമായ പോക്സോ കേസ് അന്വേഷണം മറ്റൊരു ഉദ്യോഗസ്ഥനെ ഏല്പ്പിക്കാനും സാധ്യതയുണ്ട്. പോലീസ് വീഴ്ച്ച ഉറപ്പായാല് തുടരന്വേഷണത്തിന് അനുമതി തേടി കോടതിയില് റിപ്പോര്ട്ട് സമര്പ്പിക്കാനാണ് സാധ്യത. അതേസമയം കേസില് എടുത്ത നടപടിക്രമങ്ങളില് വീഴ്ച്ചയില്ലെന്ന നിലപാടില് ഉറച്ചു നില്ക്കുകയാണ് കടയ്ക്കാവൂര് പോലീസ്.