മുംബൈയില് ലാക്മേ ഫാഷന് വീക്കില് പങ്കെടുക്കാനെത്തിയപ്പോള് ചിത്രമെടുത്തവരോട് കയര്ത്ത് ജയ ബച്ചന്. കൊച്ചുമകള് നവ്യ നവേലിയ്ക്കൊപ്പമാണ് ജയ ബച്ചനെത്തിയത്. അതിനിടെ ചിത്രങ്ങള് പകര്ത്താനെത്തിയ ഓണ്ലൈന് മാധ്യമപ്രവര്ത്തകരെ ശകാരിക്കുകയായിരുന്നു.
”നിങ്ങള് വീഴുമെന്ന് ഞാന് പ്രതീക്ഷിക്കുന്നു. നിങ്ങള് ആരാണ്, മാധ്യമപ്രവര്ത്തകരാണോ?’- എന്ന് ജയ ചോദിച്ചു. ഈ സമയത്തെല്ലാം ജയയെ ശാന്തയാക്കാന് കൊച്ചുമകള് ശ്രമിക്കുന്നുണ്ടെങ്കിലും നടി വഴങ്ങിയില്ല.
സംഭവത്തില് ജയക്കെതിരേ സമൂഹമാധ്യമങ്ങളില് കടുത്ത വിമര്ശനം ഉയരുന്നുണ്ട്. എന്തിനാണ് ജയ ദേഷ്യപ്പെടുന്നത് എന്നതാണ് പ്രധാന വിമര്ശനം. മറ്റൊരാള് വീഴുമെന്ന് പ്രതീക്ഷിക്കുന്നത് ആരാണെങ്കിലും അത് തെറ്റാണെന്നും ചിലര് ചൂണ്ടിക്കാണിക്കുന്നു. ചിത്രങ്ങള് പകര്ത്താന് അനുവാദം ചോദിക്കണമായിരുന്നുവെന്നാണ് ജയയെ അനുകൂലിക്കുന്നവര് പറയുന്നത്.
തന്റെയും കുടുംബത്തിന്റെയും ചിത്രം പകര്ത്താന് ശ്രമിച്ചതിന് മാധ്യമപ്രവര്ത്തകരെ നേരത്തേയും ജയ ശകാരിച്ചിട്ടുണ്ട്. മകന് അഭിഷേക് ബച്ചന്റെ ചിത്രമെടുത്തതിന്റെ പേരില് ജയ ക്ഷുഭിതയായത് വലിയ ചര്ച്ചയായിരുന്നു.