കോട്ടയം: സഭാ തര്ക്കത്തില് പ്രധാനമന്ത്രിയുടെ മധ്യസ്ഥതയില് ചര്ച്ചകള് നടന്നു വരുന്നതിനിടെ മലങ്കരസഭയിലെ ഇരുവിഭാഗങ്ങള് തമ്മിലുള്ള പ്രശ്നങ്ങള് പരിഹരിക്കാന് കേന്ദ്ര സര്ക്കാരിന് സാധിച്ചാല് ബിജെപിക്കൊപ്പം നില്ക്കുമെന്ന നിലപാടുമായി യാക്കോബായ സഭ രംഗത്ത്.
കേന്ദ്ര സര്ക്കാര് ചര്ച്ചയ്ക്ക് വിളിച്ചത് തങ്ങള് വലിയ അനുഗ്രഹമായി കരുതുകയാണ്. കേന്ദ്രമാണ് ഇടപെടല് നടത്തി പ്രശ്നങ്ങള് പരിഹരിക്കുന്നതെങ്കില് കൊടിയുടെ നിറം നോക്കാതെ അവരെ സഹായിച്ചിരിക്കുമെന്നും അലക്സാണ്ട്രിയോസ് മെത്രാപ്പോലിത്ത പറഞ്ഞു. ഓര്ത്തഡോക്സ് സഭയ്ക്ക് അനുകൂലമായിട്ടാണ് കഴിഞ്ഞ കാലങ്ങളില് കേന്ദ്ര സര്ക്കാര് നിലപാടെടുത്തിട്ടുള്ളത്. എന്നാല് ആ നിലപാടില് നിന്ന് ഇപ്പോള് വ്യത്യാസം വന്നിരിക്കുന്നു എന്ന തോന്നല് വിശ്വാസികള്ക്കിടയില് വന്നിട്ടുണ്ട്.
സഭയെ ആര് സഹായിക്കുന്നോ അവരെ തിരിച്ച് സഹായിക്കും എന്നതാണ് തങ്ങളുടെ രാഷ്ട്രീയമെന്നും തദ്ദേശ തിരഞ്ഞെടുപ്പില് അത് തെളിയിച്ചതാണെന്നും അലക്സാണ്ട്രിയോസ് മെത്രാപ്പോലിത്ത വ്യക്തമാക്കി. സഭാ തര്ക്കത്തിലെ ബിജെപിയുടെ ഇടപെടലില് രാഷ്ട്രീയലക്ഷ്യമുണ്ടോ എന്ന ചോദ്യത്തിനാണ് അദ്ദേഹം ഇങ്ങനെ പ്രതികരിച്ചത്. എന്നാല് തങ്ങളുമായി പ്രധാനമന്ത്രി ചര്ച്ച നടത്തിയ ശേഷം പ്രതികരണമൊന്നും ഇതുവരെ അറിയിച്ചിട്ടില്ലെന്നും യാക്കോബായ സഭ സമരസമിതി കണ്വീനര് അലക്സാണ്ട്രിയോസ് മെത്രാപ്പോലിത്ത പ്രതികരിച്ചു.