തിരുവനന്തപുരം: സംസ്ഥാനത്തെ എട്ടു ജില്ലകളില് ഇടിമിന്നലോട് കൂടിയ മഴയ്ക്കു സാധ്യതയുണ്ടെന്ന മുന്നറിയിപ്പുമായി കേന്ദ്ര കാലാവസ്ഥ വകുപ്പ്. കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശൂര്, പാലക്കാട് ജില്ലകള്ക്കാണ് ജാഗ്രതാ നിര്ദേശം നല്കിയിരിക്കുന്നത്.
ശക്തമായ മഴയോട് അനുബന്ധിച്ച് ചില നേരങ്ങളില് പൊടുന്നനെ വീശിയടിക്കുന്ന ശക്തമായ കാറ്റും (മണിക്കൂറില് 30 മുതല് 40 കിമീ വരെ വേഗതയില്) ഇടിമിന്നലും മേയ് 30 വരെ തുടരാന് സാധ്യതയുണ്ടെന്നും കേന്ദ്ര കാലാവസ്ഥ വകുപ്പ് അറിയിച്ചു. പൊതുജനങ്ങളും ബന്ധപ്പെട്ടവരും പ്രത്യേക ജാഗ്രത പാലിക്കണമെന്നും ദുരന്ത നിവാരണ അതോറിറ്റി നിര്ദേശിച്ചു.
മല്സ്യബന്ധനത്തില് ഏര്പ്പെടുന്ന മല്സ്യത്തൊഴിലാളികള് ഇടിമിന്നല് ഏല്ക്കാതിരിക്കാന് പ്രത്യേകം ജാഗ്രത പാലിക്കണം. ചെറു വള്ളങ്ങളിലും മറ്റും മല്സ്യബന്ധനത്തില് ഏര്പ്പെടുന്നവര് ഇടിമിന്നല് സമയത്ത് വള്ളത്തില് നില്ക്കുന്നത് അപകടസാധ്യത വര്ധിപ്പിക്കാന് ഇടയുണ്ട്. ആയതിനാല് ഇത്തരം സമയത്ത് ഇരിക്കുന്നത് ഉചിതമായിരിക്കുമെന്നും നിര്ദേശത്തില് പറയുന്നു.