കോഴിക്കോട്:ജില്ലയില് ഇന്ന് (25.05.2020) നാല് കോവിഡ് പോസറ്റീവ് കേസുകള് കൂടി റിപ്പോര്ട്ട് ചെയ്തതായി ജില്ലാ മെഡിക്കല് ഓഫീസര് ഡോ. ജയശ്രീ വി അറിയിച്ചു. 28 ഉം 68 ഉം വയസ്സുള്ള ഏറാമല സ്വദേശികളായ രണ്ട് പേര്ക്കും 22 വയസ്സുള്ള നാദാപുരം സ്വദേശിക്കും 40 വയസ്സുള്ള കട്ടിപ്പാറ സ്വദേശിക്കുമാണ് രോഗം സ്ഥിരീകരിച്ചത്.
ആദ്യത്തെ രണ്ടുപേര് മേയ് 11 നു ചെന്നൈയില് നിന്ന് കാര് മാര്ഗം എത്തി വീട്ടില് നിരീക്ഷണത്തിലായിരുന്നു. സ്രവപരിശോധനയില് പോസിറ്റീവായി.
മൂന്നാമത്തെയാള് മെയ് 12 ന് ദുബായ് -കണ്ണൂര് വിമാനത്തില് കണ്ണൂരില് എത്തി, വടകര കൊറോണ കെയര് സെന്ററില് നിരീക്ഷണത്തിലായിരുന്നു. ലക്ഷണങ്ങളെ തുടര്ന്ന് മെയ് 24 ന് സ്രവ പരിശോധനയില് പോസിറ്റീവ് ആയി. നാലാമത്തെ വ്യക്തി മെയ് 19 ന് റിയാദ് – കോഴിക്കോട് വിമാനത്തില് കരിപ്പൂരിലെത്തി, താമരശ്ശേരി കെയര് സെന്ററില് നിരീക്ഷണത്തിലായിരുന്നു.
മെയ് 24 ന് ലക്ഷണങ്ങളെ തുടര്ന്ന് സ്രവ പരിശോധനയില് പോസിറ്റീവായി. നാലു പേരും കോഴിക്കോട് ലക്ഷദ്വീപ് ഗസ്റ്റ്ഹൗസിലെ കോവിഡ് ഫസ്റ്റ് ലൈന് ട്രീറ്റ്മെന്റ് സെന്ററില് ചികിത്സയിലാണ്. ഇപ്പോള് ഇവരുടെ ആരോഗ്യ നില തൃപ്തികരമാണ്.
ഇതോടെ കോവിഡ് പോസിറ്റീവായ കോഴിക്കോട് സ്വദേശികളുടെ ആകെ എണ്ണം 50 ആയി. ഇവരില് 25 പേര് രോഗം ഭേദമായി ആശുപത്രി വിട്ടു. നിലവില് കോഴിക്കോട് സ്വദേശികളായ 25 പേരാണ് കോവിഡ് പോസിറ്റീവ് ആയി ചികിത്സയിലുള്ളത്. ഇതില് 12 പേര് കോഴിക്കോട് മെഡിക്കല് കോളേജിലും 8 പേര് കോഴിക്കോട് ലക്ഷദ്വീപ് ഗസ്റ്റ്ഹൗസിലെ കോവിഡ് ഫസ്റ്റ്ലൈന് ട്രീറ്റ്മെന്റ് സെന്ററിലും 5 പേര് കണ്ണൂര് ജില്ലയിലുമാണ് ചികിത്സയിലുള്ളത്.
കേരളത്തില് ഇന്ന് 49 പേര്ക്ക് കോവിഡ്-19 സ്ഥിരീകരിച്ചതായി ആരോഗ്യ വകുപ്പ് മന്ത്രി കെ.കെ. ശൈലജ ടീച്ചര് അറിയിച്ചിരുന്നു. കാസര്ഗോഡ് ജില്ലയില് നിന്നുള്ള 14 പേര്ക്കും കണ്ണൂര് ജില്ലയില് നിന്നുള്ള 10 പേര്ക്കും, തിരുവനന്തപുരം, പാലക്കാട് ജില്ലകളില് നിന്നുള്ള 5 പേര്ക്ക് വീതവും കോഴിക്കോട് ജില്ലയില് നിന്നുള്ള 4 പേര്ക്കും പത്തനംതിട്ട, ആലപ്പുഴ ജില്ലകളില് നിന്നുള്ള 3 പേര്ക്ക് വീതവും കൊല്ലം, കോട്ടയം ജില്ലകളില് നിന്നുള്ള 2 പേര്ക്ക് വീതവും ഇടുക്കി ജില്ലയില് നിന്നുള്ള ഒരാള്ക്കുമാണ് രോഗം സ്ഥിരീകരിച്ചത്.
18 പേര് വിദേശത്ത് നിന്നും (യു.എ.ഇ.-12, ഒമാന്-1, സൗദി അറേബ്യ-1, അബുദാബി-1, മാലി ദ്വീപ്-1, കുവൈറ്റ്-1, മസ്കറ്റ്-1) 25 പേര് സംസ്ഥാനത്തിന് പുറത്ത് നിന്നും (മഹാരാഷ്ട്ര-17, തമിഴ്നാട്-4, ഡല്ഹി-2, കര്ണാടക-2) വന്നതാണ്. 6 പേര്ക്ക് സമ്പര്ക്കത്തിലൂടെയാണ് രോഗം ബാധിച്ചത്. ഇതില് കണ്ണൂര് ജില്ലയിലെ രണ്ട് പേര് റിമാന്റ് തടവുകാരാണ്. തിരുവനന്തപുരത്തെ ഒരാള് ആരോഗ്യ പ്രവര്ത്തകനാണ്.
അതേസമയം രോഗം സ്ഥിരീകരിച്ച് ചികിത്സയിലായിരുന്ന 12 പേരുടെ പരിശോധനാഫലം നെഗറ്റീവ് ആയിട്ടുണ്ട്. കാസര്ഗോഡ് ജില്ലയില് നിന്നുള്ള 6 പേരുടെയും കൊല്ലം ജില്ലയില് നിന്നുള്ള 2 പേരുടെയും എറണാകുളം, ഇടുക്കി, മലപ്പുറം, വയനാട് ജില്ലകളില് നിന്നുള്ള ഒരാളുടെ വീതവും പരിശോധനാഫലമാണ് നെഗറ്റീവ് ആയത്. ഇതോടെ 359 പേരാണ് രോഗം സ്ഥിരീകരിച്ച് ഇനി ചികിത്സയിലുള്ളത്. 532 പേര് ഇതുവരെ കോവിഡില് നിന്നും മുക്തി നേടി.
എയര്പോര്ട്ട് വഴി 8390 പേരും സീപോര്ട്ട് വഴി 1621 പേരും ചെക്ക് പോസ്റ്റ് വഴി 82,678 പേരും റെയില്വേ വഴി 4558 പേരും ഉള്പ്പെടെ സംസ്ഥാനത്ത് ആകെ 97,247 പേരാണ് എത്തിയത്.
സംസ്ഥാനത്തെ വിവിധ ജില്ലകളിലായി 99,278 പേര് നിരീക്ഷണത്തിലാണ്. ഇവരില് 98,486 പേര് വീട്/ഇന്സ്റ്റിറ്റിയൂഷണല് ക്വാറന്റൈനിലും 792 പേര് ആശുപത്രികളിലും നിരീക്ഷണത്തിലാണ്. 152 പേരെയാണ് ഇന്ന് ആശുപത്രിയില് പ്രവേശിപ്പിച്ചത്.