കൊല്ലം: കൊവിഡ് വ്യാപന ഭീതിയെ തുടര്‍ന്ന് കൊല്ലം ജില്ലയില്‍ മത്സ്യബന്ധനവും വിപണനവും പൂര്‍ണമായി നിരോധിച്ചു. അതേസമയം ചവറ കെഎംഎംഎല്ലിലെ ജീവനക്കാരെ നിരീക്ഷണത്തില്‍ പ്രവേശിപ്പിച്ചു. ജില്ലയിലെ എല്ലാ മത്സ്യബന്ധന തുറമുഖങ്ങളും അതിനോടനുബന്ധിച്ചുള്ള ലേല ഹാളുകളും പൂര്‍ണമായി അടച്ചിടാനാണ് ജില്ലാ കളക്ടര്‍ ഉത്തരവിട്ടിരിക്കുന്നത്. ഒപ്പം ബീച്ചുകളിലേയും മത്സ്യം കരയ്ക്കടുപ്പിക്കുന്ന മറ്റു കേന്ദ്രങ്ങളിലേയും വിപണനവും മത്സ്യബന്ധനവും ഇനിയൊരറിയിപ്പ് ഉണ്ടാകുന്നത് വരെ നിരോധിച്ചിട്ടുണ്ട്.
ഹാര്‍ബറുകളിലെ തിരക്ക് നിയന്ത്രിക്കണമെന്ന നിര്‍ദേശം നേരത്തെ തന്നെ നല്‍കിയിരുന്നെങ്കിലും നടപ്പിലായില്ല. തുടര്‍ന്നാണ് ജില്ലാ ഭരണകൂടം കടുത്ത നടപടിയിലേക്ക് കടന്നത്. നേരത്തെ ജില്ലയില്‍ മത്സ്യ കച്ചവടക്കാരന് കൊവിഡ് രോഗബാധ സ്ഥിരീകരിച്ചിരുന്നു. ഇന്നലെ ഇയാളുമായി സമ്പര്‍ക്കത്തിലേര്‍പ്പെട്ട നാല് പേര്‍ക്കും രോഗബാധ ഉണ്ടായി.
സമ്പര്‍ക്ക രോഗ ബാധയുടെ പശ്ചാത്തലത്തില്‍ ചവറ കെഎംഎല്‍എല്ലിലെ 104 ജീവനക്കാരെ നിരീക്ഷണത്തിലാക്കി. ഇവരുടെ സ്രവം പരിശോധനയ്ക്കായി ശേഖരിച്ചു തുടങ്ങി. ഇന്നലെ ഏഴ് ജീവനക്കാരുടെ പരിശോധന നടത്തിയിരുന്നു. ഇവരുടെ ഫലം നെഗറ്റീവ് ആണ്. കെ എംഎംഎല്ലിലെ കരാര്‍ തൊഴിലാളിക്കാണ് ഇന്നലെ കൊവിഡ് സ്ഥിരീകരിച്ചത്. എന്നാല്‍ ഫാക്ടറിയുടെ പ്രവര്‍ത്തനം തടസമില്ലാതെ തുടരുമെന്ന് അധികൃതര്‍ അറിയിച്ചു.