കൊച്ചി:മഞ്ജു വിന്റെ പുത്തൻ ലുക്കിലുള്ള ചിത്രമാണ് സോഷ്യൽ മീഡിയയിൽ നിറഞ്ഞ് നിൽക്കുന്നത്. മഞ്ജുവിന്റെ ജീവിത വിജയവും ഹൃദ്യമായ പുഞ്ചിരിയും സോഷ്യല്‍ മീഡിയ ആഘോഷിക്കുമ്പോള്‍ ശ്രദ്ധേയമായ കുറിപ്പ് പങ്കുവെക്കുകയാണ് ആര്‍ദ്ര.
സ്ത്രീശരീരത്തിന്മേല്‍ സൂമൂഹം ചാര്‍ത്തിക്കൊടുക്കുന്ന സൗന്ദര്യ സങ്കല്പങ്ങളും അതിന്റെ അളവുകോലുകളും തന്നെയാണ് ഇപ്പോള്‍ സംഭവിക്കുന്നതെന്ന് ആര്‍ദ്ര കുറിക്കുന്നു. നീണ്ട പൊരുതലിലൂടെ മഞ്ജുവിലെ സ്ത്രീ നേടിയെടുത്ത സ്പേസിനെ അംഗീകരിച്ചു കൊണ്ടു തന്നെയാണ് ആര്‍ദ്രയുടെ വേറിട്ട കുറിപ്പ്.
കുറിപ്പിന്റെ പൂർണ്ണരൂപം
മഞ്ജു വാര്യരുടെ ഫോട്ടോ ഫീഡിൽ നിറഞ്ഞ് നിൽക്കുന്നുണ്ട്. ‘ ഏജ് ഇൻ റിവേഴ്സ് ഗിയർ’ പുരുഷ സൂപ്പർതാരങ്ങൾക്കു മാത്രം ചാർത്തിക്കൊടുക്കുന്ന രീതിയിൽ മാറ്റം കണ്ടതിൽ സന്തോഷം തോന്നി. നീണ്ട പൊരുതലിലൂടെ ആ സ്ത്രീ നേടിയെടുത്ത സ്പേസിനെ അംഗീകരിച്ചേ തീരൂ.
എന്നാൽ , ഇവിയെല്ലാം വീണ്ടും വീണ്ടും ഊട്ടിയുറപ്പിക്കപ്പെടുന്നത് സ്ത്രീശരീരത്തിന്മേൽ സൂമൂഹം ചാർത്തിക്കൊടുക്കുന്ന സൗന്ദര്യ സങ്കല്പങ്ങളും അതിന്റെ അളവുകോലുകളും തന്നെയാണ്. അതിനോടു ചേർന്നു പോകാൻ കഴിയുന്നതിന് ചെറിയ തോതിലുള്ള പ്രിവിലേജുകളെങ്കിലും ഉണ്ടായിരിക്കണം. (ജെന്റർ പ്രിവിലേജ് മാറ്റി നിർത്തിയാൽ ജാതി, വർഗ്ഗ, വർണ്ണ പ്രിവിലേജില്ലായ്മകൾ പുരുഷന്മാരേയും ബാധിക്കും ,തീർച്ച. )
വളരെ ചെറുപ്പം തോന്നിപ്പിക്കുന്ന , ചുറുചുറുക്കുള്ള പുരുഷന്മാരേയും , മുപ്പതുകളിലേ പ്രായം ബാധിച്ച അവരുടെ ഭാര്യമാരേയും ഞാൻ കണ്ടിട്ടുണ്ട്. കല്യാണം കഴിയും വരെ ശരീരത്തിൽ ചെറുപ്പം നിലനിർത്തിയിരുന്ന പല സ്ത്രീകൾക്കും പിന്നീട് ചെറുപ്പത്തിൽ തന്നെ പ്രായം ബാധിച്ചതായി തോന്നിയിട്ടുണ്ട്. പ്രസവത്തോടെ/ തുടർച്ചയായ പ്രസവങ്ങളോടെ ഇടിഞ്ഞു തൂങ്ങുന്ന ശരീരം കണ്ട് വിഷമിക്കാൻ നേരം കിട്ടുന്ന സ്ത്രീകൾ തന്നെ കുറവായിരിക്കും.
ശരീരത്തിന്റെ നിറത്തിന്റെ പേരിൽ സൗന്ദര്യാഘോഷങ്ങളിൽ നിന്നു തന്നെ മാറ്റി നിർത്തപ്പെട്ട സ്ത്രീകളുണ്ടായിരിക്കും, ഏജ് എത്രത്തോളം റിവേഴ്സ് ഗിയറിലാണെങ്കിലും.
ദാരിദ്ര്യവും , പട്ടിണിയും , അതിൽ നിന്ന് രക്ഷപ്പെടാനുള്ള പെടാപ്പാടുകളും മാത്രം ജീവിതത്തിലുള്ള സ്ത്രീകൾ ഉണ്ട് .
PCOD പോലുള്ള മെഡിക്കൽ കണ്ടീഷനുകൾ കാരണം ശരീരഭാരം കൂടുന്ന സ്ത്രീകളുണ്ട്. മെനോപോസിന്റേയും യൂട്രസ് റിമൂവൽ സർജറികളുടേയും ഭാഗമായി ശരീരഘടനയിൽ മാറ്റം വരുന്ന സ്ത്രീകളുണ്ട്.
നമ്മൾ ‘ഡിസേബിൾഡ് ‘ കാറ്റഗറിയിൽ പെടുത്തിയ ശരീരങ്ങളുമുണ്ട്. അതുകൊണ്ടു തന്നെ, ഒരുപാട് പ്രിവിലേജുകളുടെ സംഗമമാണ് ഈ ‘ഏജ് ഇൻ റിവേഴ്സ് ഗിയർ ‘ ആഘോഷങ്ങളിൽ എനിക്ക് കാണാൻ കഴിഞ്ഞിട്ടുള്ളത്.
സ്ത്രീ ശരീരങ്ങളുടെ അളവഴകുകളുടെ ആഘോഷത്തിൽ പ്രത്യേകിച്ചും (മഞ്ജു വാര്യരുടെ ഫോട്ടോ ഇട്ടവരെല്ലാം ഇത്തരമൊരാഘോഷമാണ് നടത്തുന്നതെന്ന് ആധികാരികമായി പറയാൻ എനിക്ക് കഴിയില്ല). ഇത്രയെ പറയാനുള്ളൂ, ; എല്ലാ തരം ശരീരങ്ങളും സൗന്ദര്യമുള്ളവ തന്നെയാണ്. പ്രായമേറുമ്പോഴും അല്ലാത്തപ്പോഴും 😊
