ചെന്നൈ: യുട്യൂബ് ചാനലുകള്ക്കെതിരെ നിയമ നടപടിയുമായി പ്രശസ്ത സംഗീതജ്ഞൻ എആര് റഹ്മാൻ. തന്റെ വിവാഹമോചനത്തിന് പിന്നിലെ കാരണങ്ങൾ എന്ന് പറഞ്ഞു വീഡിയോകൾ അപ്ലോഡ് ചെയ്ത യൂട്യൂബ് ചാനലുകൾക്ക് എതിരെയാണ് എആര് റഹ്മാൻ നിയമ നടപടി സ്വീകരിച്ചത്. വീഡിയോകൾ അപ്ലോഡ് ചെയ്ത യൂട്യൂബ് ചാനലുകൾക്ക് അദ്ദേഹം വക്കീൽ നോട്ടീസ് അയച്ചു.
24 മണിക്കൂറിനകം വീഡിയോകൾ നീക്കണമെന്ന് ആണ് വക്കീൽ നോട്ടീസിലെ ആവശ്യം. അല്ലാത്ത പക്ഷം, നിയമനടപടി നേരിടേണ്ടി വരുമെന്നും നോട്ടീസില് മുന്നറിയിപ്പ് നല്കി.
വിവാഹ മോചനത്തെ കുറിച്ചുള്ള വിവരം പുറത്ത് പറഞ്ഞതിന് പിന്നാലെ എആര് റഹ്മാനും ഭാര്യ സൈറ ബാനുവും പ്രസ്താവന പുറത്തിറക്കിയിരുന്നു. തങ്ങളുടെ സ്വകാര്യതയെ മാനിക്കണമെന്നും ഇക്കാര്യത്തിൽ കൂടുതൽ ചര്ച്ചകളിലേക്ക് കടക്കരുതെന്നും ഇരുവരും പ്രസ്താവനയില് അഭ്യര്ത്ഥിച്ചിരുന്നു.
എന്നാൽ, വിവാഹ മോചന വാര്ത്ത പുറത്ത് വന്നതിന് പിന്നാലെ സാമൂഹിക മാദ്ധ്യമങ്ങളിലൂടെ വ്യാജ പ്രചാരണങ്ങളും അപകീര്ത്തികരമായ വിവരങ്ങളും പ്രചരിച്ചിരുന്നു. ഇതിനുപിന്നാലെയാണ് നിയമ നടപടി സ്വീകരിക്കുമെന്ന് കാണിച്ച് യൂട്യൂബ് ചാനലുകള്ക്ക് എആര് റഹ്മാൻ വക്കീൽ നോട്ടീസ് അയച്ചത്.