📽️വഴിതെറ്റി പോകാന്‍ ഒരുപാട് അവസരങ്ങള്‍ ഉണ്ടായെങ്കിലും അമ്മയുടെ ഔദ്യോഗിക സ്ഥാനങ്ങള്‍ അതില്‍ നിന്നും രക്ഷ നേടാന്‍ സഹായിച്ചു,ബാച്ചിലര്‍ ലൈഫ് നല്ലതാണ്; വിവാഹം കഴിക്കാത്തതിനെ കുറിച്ച് തുറന്ന് പറഞ്ഞ് ഇടവേള ബാബു

കൊച്ചി:നിരവധി ചിത്രങ്ങളിലൂടെ മലയാളി പ്രേക്ഷകര്‍ക്കേറെ പ്രിയങ്കരനായി മാറിയ താരമാണ് ഇടവേള ബാബു. ഇരുന്നൂറിലധികം സിനിമകളില്‍ ഇടവേള ബാബു അഭിനയിച്ചിട്ടുണ്ട്.മലയാള ചലച്ചിത്രതാരങ്ങളുടെ സംഘടനയായ അമ്മയുടെ സെക്രട്ടറികൂടിയാണ് അദ്ദേഹം. 1982ല്‍ റിലീസ് ചെയ്ത ഇടവേള യാണ് ബാബുവിന്റെ ആദ്യ സിനിമ. ഇടവേള എന്നസിനിമയില്‍ അഭിനയിച്ചതോടെ ഇടവേള ബാബു എന്ന പേരു ലഭിച്ചു.

എന്നാല്‍ ഇപ്പോഴിതാ ഇപ്പോഴും അവിവിവാഹിതനായി തുടരുന്നതിനെ കുറിച്ച് തുറന്നുപറയുകയാണ് താരം. വഴിതെറ്റി പോകാന്‍ ഒരുപാട് അവസരങ്ങള്‍ ഉണ്ടായെങ്കിലും അമ്മയുടെ ഔദ്യോഗിക സ്ഥാനങ്ങള്‍ അതില്‍ നിന്നും രക്ഷ നേടാന്‍ സഹായിച്ചു. പല കാര്യങ്ങളില്‍ നിന്നും താന്‍ ഒഴിഞ്ഞു മാറിയിട്ടുണ്ട്. ബാച്ചിലര്‍ മനസ്സില്‍ ഒരുപാട് സമയം നമ്മുടെ കൈയില്‍ ഉണ്ടാകും.

കല്യാണം കഴിച്ചില്ലെങ്കിലും തന്റെ വീട്ടില്‍ അതിന്റേതായ പ്രശ്നങ്ങളും കാര്യങ്ങളുമുണ്ട്. ചേട്ടന്റെ മകന്റെ കാര്യങ്ങള്‍ താന്‍ തന്നെയാണ് നോക്കുന്നത്. അതിനാല്‍ ഫാമിലി ലൈഫ് നടത്തുന്നുണ്ട് എന്ന് പറയാം. അടുപ്പമുള്ളവരുടെ സിനിമകളില്‍ മാത്രമാണ് അഭിനയിക്കുന്നത്. ഞാന്‍ അഭിനയിച്ച ചിത്രങ്ങള്‍ പ്രദര്‍ശനത്തിനെത്താന്‍ ഉണ്ട്.

അമ്മ സംഘടനയിലെ പ്രവര്‍ത്തനങ്ങള്‍ പാഷന്‍ ആയിട്ടാണ് കാണുന്നത്. ജോലി ആയി കണ്ടാല്‍ മടുക്കും. ട്രോളുകള്‍ താന്‍ ശ്രദ്ധിക്കാറില്ല. നമുക്ക് അറുപത് വയസു വരെ ഒറ്റയ്ക്ക് എവിടെയും പോകാം. മറ്റൊരാളുടെ ആവശ്യം വരുമ്പോള്‍ വിവാഹം ചെയ്യുക അവിവാഹിതനായാല്‍ കുറച്ച് നുണ പറഞ്ഞാല്‍ മതി.

സുഹൃത്തുക്കള്‍ക്ക് എട്ടു മണി കഴിഞ്ഞാല്‍ ഭാര്യമാരുടെ കോള്‍ വരും പുറപ്പെട്ടു, അവിടെയെത്തി എന്നൊക്കെ നുണ പറയേണ്ടി വരുന്നു, എനിക്കതില്ല. ബെഡ് കണ്ടാല്‍ അപ്പോള്‍ തന്നെ താന്‍ ഉറങ്ങും. ഒരു ടെന്‍ഷനുമില്ല. എന്നാല്‍ പലര്‍ക്കും ഗുളിക വേണം അല്ലെങ്കില്‍ രണ്ടെണ്ണം സേവിക്കണം. കല്യാണം കഴിച്ചാല്‍ നമ്മള്‍ ചിന്തിക്കാത്ത വശങ്ങള്‍ വരെ കണ്ടെത്തുന്ന ആള്‍ ഉണ്ടായേക്കും. സ്വന്തം പോളിസിയും ലക്ഷ്യവും ഉണ്ടെങ്കില്‍ ബാച്ചിലര്‍ ലൈഫ് നല്ലതാണ് എന്നും താരം പറയുന്നു.

ഈ വര്‍ഷത്തെ വനിതാ ദിനത്തില്‍ ഇടവേള ബാബുവിനെ കുറിച്ച് നടി മേനക(Menaka Suresh) പറഞ്ഞ വാക്കുകളാണ് ഇപ്പോള്‍ സമൂഹമാധ്യമങ്ങളില്‍ വ്യാപകമായി പ്രചരിക്കുന്നത്.

‘നമ്മള്‍ സ്ത്രീകള്‍ക്ക് വേണ്ടിയാണ് ഇടവേള ബാബു വിവാഹം പോലും കഴിക്കാതെ നില്‍ക്കുന്നത്. അല്ലെങ്കില്‍ എന്തിനാ മേനകയോടും ശ്വേതയോടുമൊക്കെ സംസാരിക്കുന്നെ എന്ന് ചോദിക്കാന്‍ ആളുണ്ടാവുമായിരുന്നു,’ എന്നായിരുന്നു മേനകയുടെ വാക്കുകള്‍. പിന്നാലെ വാര്‍ത്തകളിലും മേനകയുടെ വാക്കുകള്‍ ഇടംനേടി. ഇതിനെതിരെ ട്രോളുകളും പുറത്തിറങ്ങി. മേനകയുടെ വാക്കുകള്‍ താന്‍ ഒരു അംഗീകാരമായി കാണുന്നുവെന്ന് ഇടവേള ബാബു പറഞ്ഞു.

ചേച്ചി തന്നെയാണ് ആ വീഡിയോ ക്ലിപ്പ് എനിക്ക് അയച്ചു തന്നത്. ആ വാക്കുകള്‍ അംഗീകാരം ആയാണ് ഞാന്‍ കാണുന്നത്. കാരണം അവര്‍ എന്നില്‍ അര്‍പ്പിച്ചിരിക്കുന്ന ഒരു വിശ്വാസമാണത്. സിനിമയിലെ പലരും ചെറിയ ചെറിയ വിഷയങ്ങള്‍ വരെ എന്നോട് പങ്കുവയ്ക്കാറുണ്ട്. ‘അവര്‍ക്ക് മക്കളും വീട്ടുകാരും ഒക്കെ ഉണ്ടല്ലോ പിന്നെ എന്തിനാ എന്നോട് ഇതൊക്കെ പറയുന്നത്’, എന്ന് ഞാന്‍ ചിന്തിക്കാറുണ്ട്. പക്ഷേ പിന്നീട് അതേ പറ്റി ചിന്തിക്കുമ്പോള്‍, അവര്‍ അവരുടെ വീട്ടുകാരോട് പറയുന്നതിനെക്കാള്‍ കണ്‍ഫര്‍ട്ടബിള്‍ ആണ് എന്നോട് സംസാരിക്കുമ്പോള്‍. ആ ഒരു വിശ്വാസം അവര്‍ എന്നില്‍ അര്‍പ്പിക്കുന്നുണ്ട്. ഇത്രയും വര്‍ഷക്കാലം ‘അമ്മ’യുടെ ഭാരവാഹിത്വത്തില്‍ ഇരുന്നതില്‍ നിന്നും ലഭിച്ച വിശ്വാസമാണല്ലോ അത്. മറ്റെന്തിനെക്കാളും വലുത്. ആ ഒരു വിശ്വാസമാണ് ചേച്ചിയുടെ വാക്കുകളിലൂടെ എനിക്ക് സന്തോഷം നല്‍കിയത്. അവരുടെയൊക്കെ മനസ്സില്‍ എനിക്കൊരു സ്ഥാനമുണ്ടെന്ന് അറിയുന്ന സന്തോഷം.

സ്ത്രീകളുടെ സേഫ്റ്റിക്ക് വളരെയധികം പ്രാധാന്യം നല്‍കിയിട്ടുള്ളവരാണ് ഞങ്ങള്‍. പ്രത്യേകിച്ച് കഴിഞ്ഞൊരു ജനറേഷന്‍. ചില ദിവസങ്ങളില്‍ സിനിമാ നടിമാര്‍ വളരെയധികം ‘ഡള്‍’ ആയിരിക്കും. പിന്നീട് അക്കാര്യങ്ങള്‍ ഞങ്ങളുമായി ഷെയര്‍ ചെയ്യും. അങ്ങനെ ഒരു കാലഘട്ടം സിനിമയില്‍ ഉണ്ടായിരുന്നു. ഇപ്പോഴെന്നു പറയുമ്പോള്‍ ബന്ധങ്ങള്‍ക്കും നിയമങ്ങള്‍ക്കും വ്യത്യാസങ്ങള്‍ വന്നിട്ടുണ്ടല്ലോ. സമൂഹത്തില്‍ വന്ന മാറ്റങ്ങള്‍ എല്ലായിടത്തും ബാധിച്ചിട്ടുണ്ട്. ബന്ധങ്ങളൊക്കെ വളരെയധികം കുറഞ്ഞു. പ്രതിസന്ധികളൊക്കെ തരണം ചെയ്താണ് ഞാനൊക്കെ ഇവിടം വരെ എത്തിയത്. ജീവിതാനുഭവം ആണ് നമുക്ക് വേണ്ടത്.