തിരുവനന്തപുരം: വാഹനത്തിന് രൂപമാറ്റം വരുത്തി ഗതാഗത നിയമങ്ങള്‍ ലംഘിച്ച കുറ്റത്തിന് അടുത്തിടെ കര്‍ശന നിയമ നടപടി നേരിടേണ്ടി വന്നവരാണ് പ്രശസ്ത വ്ളോഗര്‍മാരായ ഇ ബുള്‍ജെറ്റ് സഹോദരങ്ങള്‍. ഇവരുടെ അറസ്റ്റും തുടര്‍ന്നുണ്ടായ കോലാഹലങ്ങളും കേരളം വളരെധികം ചര്‍ച്ച ചെയ്തിരുന്നു. എന്നാല്‍ ഇപ്പോള്‍ തങ്ങളുടെ ജീവിതം സിനിമയാക്കണമെന്ന ആഗ്രഹം പ്രകടിപ്പിച്ച് രംഗത്ത് വന്നിരിക്കുകയാണ് ഇവര്‍.
സോഷ്യല്‍ മീഡിയയിലാണ് ജീവിതം സിനിമയാക്കാന്‍ ആഗ്രഹിക്കുന്നതായി വെളിപ്പെടുത്തിയിരിക്കുന്നത്. ഇ ബുള്‍ജെറ്റ് സഹോദരങ്ങളില്‍ ഒരാളായ ലിബിനാണ് ഇന്‍സ്റ്റഗ്രാമിലൂടെ ആഗ്രഹം പുറത്തുപറഞ്ഞത്. തങ്ങളുടെ ജീവിതം സിനിമയാക്കാന്‍ താത്പര്യമുള്ളവര്‍ക്ക് ഇ-മെയിലിലൂടെ ബന്ധപ്പെടാമെന്നും ലിബിന്‍ ഇന്‍സ്റ്റഗ്രാം പോസ്റ്റില്‍ ലിബിന്‍ പറയുന്നു. നിമിഷ നേരങ്ങള്‍ കൊണ്ടുതന്നെ വൈറലായ പോസ്റ്റിന് കമന്റുമായി നിരവധി പേരാണ് എത്തിയത്. നിരവധി പേര്‍ ഇവരെ അനുകൂലിച്ചും ചീത്തവിളിച്ചും രംഗത്ത് എത്തി. ട്രോളുകളിലും പോസ്റ്റ് ഇടം പിടിക്കുന്നുണ്ട്.
കഴിഞ്ഞ മാസമായിരുന്നു നെപ്പോളിയന്‍ എന്ന് പേരുള്ള വാഹനത്തിന് രൂപമാറ്റം വരുത്തിയ സംഭവത്തില്‍ മോട്ടോര്‍ വാഹന വകുപ്പ് നടപടിയെടുത്തത്. എന്നാല്‍ തങ്ങളെ അനാവശ്യമായി ഉപദ്രവിക്കുകയായിരുന്നുവെന്നായിരുന്നു ഇവരുടെ ആരോപണം. തുടര്‍ന്ന് കരഞ്ഞുകൊണ്ട് ഇവര്‍ സമൂഹമാദ്ധ്യമത്തില്‍ ഇട്ട പോസ്റ്റും വ്യാപകമായി പ്രചരിച്ചിരുന്നു. വ്ളോഗര്‍മാരെ അറസ്റ്റ് ചെയ്തതില്‍ പോലീസിനെതിരെ ശക്തമായ പ്രതിഷേധവും ഉയര്‍ന്നിരുന്നു.