വൈക്കം: വീട്ടമ്മയുമായി കടന്നു കളഞ്ഞ ദേവസ്വം ജീവനക്കാരനായി പോലീസ് അന്വേഷണം ഊര്‍ജിതമാക്കി. നാലു ദിവസം മുമ്പാണ് വൈക്കം നഗരത്തില്‍ താമസിക്കുന്ന ഒമ്പതു വയസുള്ള മകനുള്ള 29 കാരിയുമായി വൈക്കം ദേവസ്വത്തിലെ ജീവനക്കാരന്‍ കടന്നുകളഞ്ഞത്. വൈക്കം കോടതിക്കു സമീപത്തെ ഡിടിപി സെന്ററില്‍ ജോലി ചെയ്യുന്നതിനിടയിലാണ് ദേവസ്വം ജീവനക്കാരന്‍ ഡിടിപിക്കാരിയുമായി അടുപ്പത്തിലായതെന്നു പറയുന്നു.
ദേവസ്വം ജീവനക്കാരനു കോപ്പിയെടുത്തും മെയില്‍ ചെയ്തും അടുപ്പം ശക്തമായതോടെ വീട്ടമ്മ ജോലി മതിയാക്കി. ഭര്‍ത്താവറിയാതെ ദേവസ്വം ജീവനക്കാരനുമായി ബന്ധം തുടര്‍ന്ന വീട്ടമ്മ ഒരു സൂചന പോലും നല്‍കാതെ ഭര്‍ത്താവിനേയും മകനേയും ഉപേക്ഷിച്ചു ദേവസ്വം ജീവനക്കാരനുമായി കടന്നു കളയുകയായിരുന്നു.
ഭാര്യ പറയുന്നതെല്ലാം സാധിച്ചു കൊടുത്തു നന്നായി കുടുംബം നോക്കിയിരുന്ന ഭര്‍ത്താവിനു ഭാര്യയുടെ ഒളിച്ചോട്ടം ഇനിയും ഉള്‍ക്കൊള്ളാനായിട്ടില്ല. ഭാര്യയെ കാണാനില്ലെന്നു യുവാവ് വൈക്കം പോലീസ് സ്റ്റേഷനില്‍ പരാതി നല്‍കിയതിനു പിന്നാലെ തന്റെ ഭര്‍ത്താവ് നാലു ദിവസമായി വീട്ടിലെത്തിയിട്ടില്ലെന്ന് ആരോപിച്ചു ദേവസ്വം ജീവനക്കാരന്റെ ഭാര്യയും വൈക്കം പോലീസില്‍ പരാതി നല്‍കി.
ദേവസ്വം ജീവനക്കാരനൊപ്പം വീട്ടമ്മയുണ്ടെന്ന് പോലീസിനു വിവരം ലഭിച്ചെങ്കിലും തന്റെ രണ്ടു മൊബൈല്‍ ഫോണുകളും സ്വിച്ച് ഓഫാക്കി പോലീസിനു പിടികൊടുക്കാതെ ദേവസ്വം ജീവനക്കാരന്‍ ഒളിച്ചുകളിക്കുകയാണെന്ന് പോലീസ് പറഞ്ഞു.
