ന്യൂഡൽഹി: ഡൽഹിയിൽ വരുംദിവസങ്ങളിൽ ചൂട് കടുക്കുമെന്ന് കേന്ദ്ര കാലാവസ്ഥാ വകുപ്പിന്റെ മുന്നറിയിപ്പ്. അടുത്ത ബുധനാഴ്ചയോടെ നഗരത്തിലെ താപനില 40 ഡിഗ്രി സെൽഷ്യസിലും വെള്ളിയാഴ്ചയോടെ 41 ഡിഗ്രി സെൽഷ്യസിലും എത്തിയേക്കാമെന്ന് കാലാവസ്ഥാ വകുപ്പ് അറിയിച്ചു.ഇതോടൊപ്പം നഗരത്തിൽ ഉഷ്ണതരംഗത്തിന് സാധ്യതയുണ്ടെന്നും വായുഗുണനിലവാരസൂചിക ‘മിതമായ’ നിലയിൽനിന്ന് ‘മോശം’ അവസ്ഥയിലേക്ക് മാറാൻ സാധ്യതയുണ്ടെന്നും റിപ്പോർട്ടുകൾ സൂചിപ്പിക്കുന്നു.
മാർച്ച് മാസത്തിൽ ലഭിച്ച നേരിയ മഴയ്ക്ക് ശേഷം ഡൽഹിയിൽ താപനില ക്രമാനുഗതമായി ഉയരുകയാണ്. കഴിഞ്ഞയാഴ്ച 28.2 ഡിഗ്രി സെൽഷ്യസാണ് ഡൽഹിയിൽ രേഖപ്പെടുത്തിയത്. പത്ത് വർഷത്തിനിടയിലെ ഏപ്രിൽ മാസത്തിൽ രേഖപ്പെടുത്തിയ ഏറ്റവും കുറഞ്ഞ താപനിലയാണിത്. എന്നാൽ അതിനുശേഷം ക്രമാതീതമായി താപനില വർധിക്കുകയായിരുന്നു. ശനിയാഴ്ച നഗരത്തിൽ രേഖപ്പെടുത്തിയ പരമാവധി താപനില 34.7 ഡിഗ്രി സെൽഷ്യസായിരുന്നു. അടുത്ത ഒരാഴ്ചയ്ക്കുള്ളിൽ താപനിലയിൽ ആറ് മുതൽ ഏഴ് ഡിഗ്രി വരെ വർധനവുണ്ടായേക്കാമെന്ന് കാലാവസ്ഥാ വകുപ്പ് വ്യക്തമാക്കുന്നു.
തെളിഞ്ഞ ആകാശവും അന്തരീക്ഷത്തിലെ മാറ്റമില്ലാതെ തുടരുന്ന അവസ്ഥയുമാണ് ഈ ചൂട് വർധനവിന് പ്രധാന കാരണമായി വിദഗ്ധർ ചൂണ്ടിക്കാട്ടുന്നത്. വടക്കുപടിഞ്ഞാറൻ കാറ്റിന്റെ തണുപ്പ് കുറയുന്നതോടെ വരുംദിവസങ്ങളിൽ നഗരത്തിൽ വരണ്ട കാറ്റ് വീശിയേക്കും. മഴയുടെ അഭാവത്തിൽ സൂര്യതാപം കുറയാതെ നിൽക്കുന്ന സാഹചര്യത്തിൽ താപനില ഉയരുമെന്നും ഉഷ്ണതരംഗത്തിന് സാധ്യതയുണ്ടെന്നും കാലാസ്ഥാ നിരീക്ഷണ ഏജൻസിയായ സ്കൈമെറ്റ് വെതർ അറിയിച്ചിട്ടുണ്ട്.
വായുനിലവാരം മോശമാകുന്നു: ചൂട് കൂടുന്നതിനൊപ്പം ഡൽഹിയിലെ വായുഗുണനിലവാര സൂചികയും (AQI) താഴുകയാണ്. നിലവിൽ ‘മിതമായ’ (Moderate) നിലയിലുള്ള വായുനിലവാരം വരും ദിവസങ്ങളിൽ ‘മോശം’ (Poor) അവസ്ഥയിലേക്ക് മാറാൻ സാധ്യതയുണ്ടെന്ന് റിപ്പോർട്ടുകൾ സൂചിപ്പിക്കുന്നു. അന്തരീക്ഷത്തിലെ പൊടിപടലങ്ങളുടെ അളവ് കൂടുന്നതാണ് ഇതിന് കാരണം.
ജാഗ്രതാ നിർദ്ദേശങ്ങൾ: കനത്ത ചൂടിനെ പ്രതിരോധിക്കാൻ ഉച്ചസമയങ്ങളിൽ (12 PM – 4 PM) പുറത്തിറങ്ങുന്നത് ഒഴിവാക്കണമെന്നും ധാരാളം വെള്ളം കുടിക്കണമെന്നും അധികൃതർ നിർദ്ദേശിച്ചു. നിർമ്മാണ തൊഴിലാളികൾക്കും വെയിലത്ത് ജോലി ചെയ്യുന്നവർക്കും പ്രത്യേക ജാഗ്രത വേണമെന്ന് ആരോഗ്യവകുപ്പ് അറിയിച്ചു.
English Summary
The India Meteorological Department (IMD) has issued a warning regarding rising temperatures in Delhi over the coming days. The mercury is expected to hit 40°C by Wednesday and could soar to 41°C by Friday. Alongside the heatwave warning, reports indicate that the Air Quality Index (AQI) is likely to deteriorate from ‘Moderate’ to ‘Poor’. Residents are advised to stay hydrated and avoid direct sun exposure during peak hours as dry north-westerly winds intensify the heat.