തിരുവനന്തപുരം: കേരളത്തിൽ നിലവിൽ ഭരണവിരുദ്ധ വികാരമില്ലെന്നും ഇടതുമുന്നണി വീണ്ടും അധികാരത്തിലെത്തുമെന്നും സിപിഎം സംസ്ഥാന സെക്രട്ടറി എം.വി. ഗോവിന്ദൻ വാർത്താസമ്മേളനത്തിൽ പറഞ്ഞു. യുഡിഎഫിന്റെ അവകാശവാദങ്ങൾ നടക്കില്ലെന്നും ഇത്തവണ ബിജെപി അക്കൗണ്ട് തുറക്കില്ലെന്നും അദ്ദേഹം ആത്മവിശ്വാസം പ്രകടിപ്പിച്ചു. 2016-ലെയും 2021-ലെയും ഫലം ഇത്തവണയും ആവർത്തിക്കുമെന്നാണ് സിപിഎം സംസ്ഥാന സെക്രട്ടറിയുടെ പ്രധാന വിലയിരുത്തൽ. സർക്കാരിന്റെ പ്രവർത്തനങ്ങളിൽ ജനങ്ങൾക്ക് വലിയ മതിപ്പുണ്ടെന്നും ജനങ്ങൾ ആഗ്രഹിക്കുന്നത് എൽഡിഎഫിന്റെ തുടർഭരണമാണെന്നും അദ്ദേഹം കൂട്ടിച്ചേർത്തു. ഇത്തവണ 90-ലധികം സീറ്റുകൾ നേടി എൽഡിഎഫ് കരുത്ത് തെളിയിക്കുമെന്ന കാര്യത്തിൽ തനിക്ക് യാതൊരു സംശയവുമില്ലെന്നും ഗോവിന്ദൻ വ്യക്തമാക്കി.
യുഡിഎഫും ബിജെപിയും വോട്ട് പിടിക്കാനായി കേരളത്തിൽ വലിയ രീതിയിൽ പണം ഒഴുക്കിയെന്ന് എം.വി. ഗോവിന്ദൻ ആരോപിച്ചു. ഉത്തരേന്ത്യയിൽ കാണുന്നതുപോലെയുള്ള ചില തിരഞ്ഞെടുപ്പ് വൈകൃതങ്ങൾ ഇത്തവണ കേരളത്തിലും ദൃശ്യമായെന്ന് അദ്ദേഹം കുറ്റപ്പെടുത്തി. പണം എറിഞ്ഞ് വോട്ട് പിടിക്കാനുള്ള ശ്രമങ്ങൾ നടന്നുവെങ്കിലും കേരളത്തിലെ ബോധമുള്ള ജനങ്ങൾ അതിൽ വീഴില്ലെന്ന് അദ്ദേഹം പറഞ്ഞു. പ്രതിപക്ഷ നേതാവ് വി.ഡി. സതീശനെ പരിഹസിച്ച അദ്ദേഹം, സതീശൻ സന്യാസത്തിന് പോകേണ്ട ആവശ്യമില്ലെന്നും കേരളം അദ്ദേഹത്തോട് ക്ഷമിക്കുമെന്നും പറഞ്ഞു. സിപിഎം വിട്ടുപോയവർ ഒരു മണ്ഡലത്തിലും വിജയിക്കാൻ പോകുന്നില്ലെന്നും അദ്ദേഹം പാർട്ടി വിരുദ്ധർക്ക് മുന്നറിയിപ്പ് നൽകി.
തിരഞ്ഞെടുപ്പ് കഴിഞ്ഞതിന് പിന്നാലെ യുഡിഎഫ് നേതാക്കളും മാധ്യമങ്ങളും ചേർന്ന് വലിയ അവകാശവാദങ്ങളാണ് ഇപ്പോൾ ഉന്നയിക്കുന്നത്. കഴിഞ്ഞ തിരഞ്ഞെടുപ്പ് കാലത്തും യുഡിഎഫ് സമാനമായ രീതിയിൽ മന്ത്രിസഭാ രൂപീകരണം വരെ സാങ്കൽപ്പികമായി നടത്തിയിരുന്നുവെന്ന് അദ്ദേഹം ഓർമ്മിപ്പിച്ചു. അന്ന് ഉമ്മൻചാണ്ടിയും രമേശ് ചെന്നിത്തലയും മുഖ്യമന്ത്രിസ്ഥാനം പങ്കുവെക്കുന്നതിനെക്കുറിച്ച് ചർച്ചകൾ നടത്തിയെങ്കിലും ഫലം വന്നപ്പോൾ എൽഡിഎഫ് 99 സീറ്റുകൾ നേടി. ഇപ്രാവശ്യവും യുഡിഎഫിനുള്ളിൽ മുഖ്യമന്ത്രി സ്ഥാനത്തിനായി ചർച്ചകൾ നടക്കുന്നുണ്ടെന്ന് അദ്ദേഹം പരിഹസിച്ചു. ഒടുവിൽ മുഖ്യമന്ത്രിയെ ഹൈക്കമാൻഡ് തീരുമാനിക്കട്ടെ എന്ന നിലയിലേക്ക് അവർക്ക് വെടിനിർത്തേണ്ടി വന്നുവെന്നും അദ്ദേഹം കൂട്ടിച്ചേർത്തു.
കേരളം ആര് ഭരിക്കണമെന്ന് ജനങ്ങൾ ഏപ്രിൽ ഒൻപതാം തീയതി തന്നെ തീരുമാനിച്ചു കഴിഞ്ഞുവെന്ന് അദ്ദേഹം വ്യക്തമാക്കി. ആ തീരുമാനത്തിന്റെ വസ്തുനിഷ്ഠ യാഥാർത്ഥ്യത്തോട് മനസ്സിനെ പൊരുത്തപ്പെടുത്തുന്ന പണി മാത്രമാണ് ഇനി ജൂൺ നാലാം തീയതിയുള്ളത്. പാർട്ടി നടത്തിയ കൃത്യമായ അവലോകനത്തിൽ നിന്നാണ് ഇത്രയും വ്യക്തമായ ഒരു ചിത്രം ലഭിച്ചതെന്ന് അദ്ദേഹം അവകാശപ്പെട്ടു. യുഡിഎഫിന്റെയും ബിജെപിയുടെയും വ്യാജപ്രചാരണങ്ങൾ ജനം തള്ളിക്കളഞ്ഞുവെന്നും അദ്ദേഹം ആവർത്തിച്ചു. മെയ് ഒൻപതിലെ ജനവിധിയുടെ ആവർത്തനത്തിനായി ഇടതുപക്ഷം ശുഭപ്രതീക്ഷയോടെ കാത്തിരിക്കുകയാണെന്നും അദ്ദേഹം പറഞ്ഞു.
CPM State Secretary M.V. Govindan stated that there is no anti-incumbency in Kerala and predicted that LDF will retain power with over 90 seats. He dismissed UDF’s claims and asserted that BJP will not open an account in the state, drawing parallels to the 2016 and 2021 victories. Govindan criticized the UDF and BJP for allegedly using money to sway votes and mocked Opposition Leader V.D. Satheesan regarding UDF’s internal discussions on the Chief Minister post.