ന്യൂഡൽഹി : കേന്ദ്ര സർക്കാരുമായുള്ള ഏറ്റുമുട്ടലിൽ ഡൽഹി സർക്കാരിന് വിജയം. ക്രമസമാധാനം ഒഴിച്ച് മറ്റെല്ലാ മേഖലകളിലും ഭരണപരമായ അധികാരം ഡൽഹി സർക്കാരിനാണെന്ന് ചീഫ് ജസ്റ്റിസ് ഡി വൈ ചന്ദ്രചൂഡിൻറെ അദ്ധ്യക്ഷതയിലുള്ള അഞ്ചംഗ ബഞ്ച് വിധിച്ചു.
ഏറെ നാളുകളായി ഡൽഹി ലഫ്റ്റനൻറ് ഗവർണറും ഡൽഹി സർക്കാരും തമ്മിൽ നടന്നുവന്ന ഏറ്റുമുട്ടലിൽ സുപ്രീം കോടതി ഇതോടെ വ്യക്തത വരുത്തിയിരിക്കുകയാണ്. നിയമസഭയുടെ അധികാരത്തിന് പുറത്തുള്ള കാര്യങ്ങളിൽ മാത്രമെ ഡൽഹി ലഫ്റ്റനൻറ് ഗവർണർക്ക് തീരുമാനങ്ങൾ എടുക്കാൻ അധികാരമുള്ളു എന്നും സുപ്രീം കോടതി വിധിച്ചു.
അധികാരമില്ലാത്ത ഒരു നിയമസഭ അർത്ഥവത്തല്ല എന്നും കോടതി നിരീക്ഷിച്ചു. ജനാധിപത്യപരമായി തിരഞ്ഞെടുക്കപ്പെട്ട ഒരു സർക്കാരിനെ അനുസരിക്കാത്ത ഉദ്യോഗസ്ഥർ ജനാധിപത്യത്തിൻറെ ആശയങ്ങളെ തന്നെ ഇല്ലാതാക്കുകയാണെന്നും കോടതി ചൂണ്ടിക്കാട്ടി.
കേന്ദ്ര സർക്കാർ ലഫ്റ്റനൻറ് ഗവർണറെ ഉപയോഗിച്ച് ഉദ്യോഗസ്ഥരെ നിയന്ത്രിക്കുന്നു എന്ന പരാതിയുമായി ഡൽഹി സർക്കാരാണ് കോടതിയെ സമീപിച്ചത്. ഐഎഎസ് ഉദ്യോഗസ്ഥരുടെ നിയമനം സംസ്ഥാന സർക്കാരിൻ‌റെ ഉത്തരവിനെ മറികടന്ന് റദ്ദാക്കുന്നതടക്കം ഭരണകാര്യങ്ങളിൽ ഗവർണർ ഇടപെടുന്നു എന്നും ഫയലുകളിൽ സമയബന്ധിതമായി തീരുമാനമെടുക്കാതെ ഭരണ നിർവഹണത്തെ തടസ്സപ്പെടുത്തുന്നു എന്നും പരാതിയിൽ ചൂണ്ടിക്കാട്ടിയിട്ടുണ്ട്.
ഈ പരാതികൾ പരിഗണിച്ച സുപ്രീം കോടതി അധികാരത്തെ സംബന്ധിച്ച കൃത്യമായ വേർതിരിവാണ് പുതിയ ഉത്തരവിലൂടെ നടത്തിയിരിക്കുന്നത്. രാജ്യ തലസ്ഥാനമായതിനാൽ ഡൽഹിയിലെ പൊലീസിൻറെ ചുമതലയും പൊതു ഉത്തരവുകൾ ഇറക്കാനുള്ള അധികാരവും ലഫ്റ്റനൻറ് ഗവർണറിൽ നിക്ഷിപ്തമാണ് എന്ന് കോടതി വ്യക്തമാക്കി.
ബാക്കി എല്ലാ അധികാരങ്ങളും തിരഞ്ഞെടുക്കപ്പെട്ട സർക്കാരിനാണെന്നും വ്യക്തമാക്കിയതോടെ മുഖ്യമന്ത്രിക്കു തന്നെയാണ് കൂടുതൽ അധികാരം എന്ന് ഇതോടെ സ്ഥിരീകരിക്കപ്പെട്ടിരിക്കുകയാണ്.