കൊച്ചി: എന്ഫോഴ്സ്മെന്റ് ഡയറക്ടറേറ്റിനെതിരായ കേസില് സന്ദീപ് നായരെ ചോദ്യം ചെയ്യാന് ക്രൈംബ്രാഞ്ചിന് അനുമതി. രണ്ട് ദിവസം മൊഴിയെടുക്കാനാണ് എറണാകുളം സെഷന്സ് കോടതി അനുമതി നല്കിയത്. സന്ദീപ് നായരെ ചോദ്യം ചെയ്യണമെന്ന് ആവശ്യപ്പെട്ട് ക്രൈംബ്രാഞ്ച് കോടതിയെ സമീപിച്ചിരുന്നു.
സന്ദീപ് നായരുടെ പരാതിയിലാണ് എന്ഫോഴ്സ്മെന്റ് ഡയറക്ടറേറ്റിനെതിരെ ക്രൈംബ്രാഞ്ച് കേസ് എടുത്തിരിക്കുന്നത്. മുഖ്യമന്ത്രിക്കെതിരെ മൊഴി നല്കാന് ഇ.ഡി സമ്മര്ദം ചെലുത്തിയെന്നായിരുന്നു സന്ദീപിന്റെ പരാതി. ഇക്കാര്യം ചൂണ്ടിക്കാട്ടി സുനില് എന്ന അഭിഭാഷകന് ഡിജിപിക്ക് പരാതി നല്കിയിരുന്നു.
പരാതിയുടെ അടിസ്ഥാനത്തില് ക്രൈംബ്രാഞ്ച് ഇ.ഡിക്കെതിരെ കേസെടുത്തു. സന്ദീപിനെ ഏഴ് ദിവസം ചോദ്യം ചെയ്യാന് അനുമതി നല്കണമെന്നാണ് ക്രൈംബ്രാഞ്ച് കോടതിയില് ആവശ്യപ്പെട്ടത്. എന്നാല് രണ്ട് ദിവസം ചോദ്യം ചെയ്യാനാണ് കോടതി അനുവദിച്ചിരിക്കുന്നത്.