തിരുവനന്തപുരം: സംസ്ഥാനത്തെ സ്കൂളുകള് ഉടന് തുറക്കില്ലെന്ന് മുഖ്യമന്ത്രി പിണറായി വിജയന്. മുഴുവന് വിദ്യാലയങ്ങളിലും ഹൈടെക് ക്ലാസ് റൂമുള്ള രാജ്യത്തെ ആദ്യത്തെ സംസ്ഥാനമായി കേരളം മാറിയത് പ്രഖ്യാപിക്കുന്ന ചടങ്ങിലാണ് അദ്ദേഹം ഇക്കാര്യം വ്യക്തമാക്കിയത്. സാഹചര്യം അനുകൂലമാകുമ്പോള് സ്കൂളുകള് തുറക്കുമെന്നും അദ്ദേഹം കൂട്ടിച്ചേര്ത്തു.
രാജ്യത്താകെ പൊതുമേഖലകളില് നിന്ന് സര്ക്കാരുകള് പിന്മാറുന്ന സാഹചര്യമാണുള്ളത്. അപ്പോഴാണ് സര്ക്കാര് ഇടപെട്ടുകൊണ്ട് വിദ്യാഭ്യാസ മേഖലയെ എങ്ങനെ ഒരു സവിശേഷമായ ജനകീയ മേഖലയാക്കി മാറ്റാം എന്ന മാതൃക കേരളം കാണിച്ചിരിക്കുന്നത്.
ഇത് ലോകത്തിന് മുന്നില് കേരളം അവതരിപ്പിച്ച മാതൃകയാണ്. നമ്മുടെ കുഞ്ഞുങ്ങളെ കരുതിയുള്ള ഇടപെടലാണ്. നാടിന്റെ ഭാവിയെ സുരക്ഷിതമാക്കുന്നതിനുള്ള ഇടപെടലാണ്, ഇടതുപക്ഷം മുന്നോട്ടുവയ്ക്കുന്ന ബദലാണെന്നും അദ്ദേഹം വ്യക്തമാക്കി.