കൊച്ചി : മറ്റ് ബാങ്കുകളില് ലയിച്ച എട്ട് പൊതുമേഖലാ ബാങ്കുകളുടെ ചെക്ക് ബുക്കുകള് പുതിയ നാളെമുതല് അസാധുവാകും. വിജയ ബാങ്ക്, കോര്പ്പറേഷന് ബാങ്ക്, ദേന ബാങ്ക്, ആന്ധ്രാ ബാങ്ക്, സിന്ഡിക്കേറ്റ് ബാങ്ക്, ഓറിയന്റല് ബാങ്ക് ഒഫ് കൊമേഴ്സ്, അലഹാബാദ് ബാങ്ക്, യുണൈറ്റഡ് ബാങ്ക് ഒഫ് ഇന്ത്യ എന്നിവയുടെ ചെക്ക് ബുക്കുകളാണ് അസാധുവാകുക. ഇതുള്പ്പെടെ മറ്റു ചില മാറ്റങ്ങളും നാളെമുതലുണ്ടാകും.
ഓറിയന്റല് ബാങ്ക് ഒഫ് കൊമേഴ്സ്, യുണൈറ്റഡ് ബാങ്ക് ഒഫ് ഇന്ത്യ എന്നിവ പഞ്ചാബ് നാഷണല് ബാങ്കിലും സിന്ഡിക്കേറ്ര് ബാങ്ക് കനറാ ബാങ്കിലും അലഹാബാദ് ബാങ്ക് ഇന്ത്യന് ബാങ്കിലും ആന്ധ്രാ ബാങ്കും കോര്പ്പറേഷന് ബാങ്കും യുണിയന് ബാങ്ക് ഒഫ് ഇന്ത്യയിലുമാണ് ലയിച്ചത്. ദേന ബാങ്ക്, വിജയ ബാങ്ക് എന്നിവയെ ബാങ്ക് ഒഫ് ബറോഡയിലും ലയിപ്പിച്ചിരുന്നു.
നിലവിലെ ചെക്ക് ബുക്ക് നാളെ അസാധുവാകും. ഉദാഹരണത്തിന് യുണൈറ്റഡ് ബാങ്ക് ഒഫ് ഇന്ത്യ ഉപഭോക്താവിന്റെ കൈവശമുള്ള ചെക്ക് ബുക്ക് നാളെ മുതല് ഉപയോഗിക്കാനാവില്ല. പകരം, ബാങ്ക് ലയിച്ച പഞ്ചാബ് നാഷണല് ബാങ്കിന്റെ ചെക്ക് ബുക്ക് വാങ്ങണം. അതേസമയം, ചില ബാങ്കുകള്ക്ക് റിസര്വ് ബാങ്ക് ഇളവ് അനുവദിച്ചിട്ടുണ്ട്. സിന്ഡിക്കേറ്റ് ബാങ്ക് കനറാ ബാങ്കില് ലയിച്ചിരുന്നു; എന്നാല്, സിന്ഡിക്കേറ്റ് ബാങ്കിന്റെ ചെക്ക് ഉപഭോക്താവിന് ജൂണ് 30 വരെ ഉപയോഗിക്കാം.