തിരുവനന്തപുരം: ഇരട്ടവോട്ടില് ശക്തമായ നടപടി വേണമെന്ന് പ്രതിപക്ഷ നേതാവ് രമേശ് ചെന്നിത്തല. സംസ്ഥാനത്ത് നാലു ലക്ഷത്തിലധികം ഇരട്ട വോട്ടുകള് ഉണ്ടെന്നാണ് കണ്ടെത്തല്. ഇരട്ടവോട്ടുള്ളവര് പരാതി നല്കണമെന്നും പ്രതിപക്ഷ നേതാവ് ആവശ്യപ്പെട്ടു.
പട്ടികയില് പേരുള്ളവരല്ല, ഉദ്യോഗസ്ഥരാണ് ഇതിന്റെ കുറ്റക്കാര്. വ്യാജ വോട്ടര്മാരെ സൃഷ്ടിച്ചത് സിപിഎമ്മാണെന്നും ചെന്നിത്തല കുറ്റപ്പെടുത്തി. ആഴക്കടല് മത്സ്യബന്ധന വിവാദത്തിലെ ധാരണാപത്രം റദ്ദാക്കി ഉടന് ഉത്തരവിറക്കണമെന്നും ചെന്നിത്തല ആവശ്യപ്പെട്ടു.
കഴിഞ്ഞ ദിവസം കേരളത്തിലെ 140 നിയോജകമണ്ഡലങ്ങളിലെ നാലു ലക്ഷത്തി മുപ്പത്തിനാലായിരം ഇരട്ടവോട്ടര്മാരുടെ പട്ടിക www.operationtwins.com എന്ന വെബ്സൈറ്റിലൂടെ പുറത്തു വിട്ടതായി പ്രതിപക്ഷ നേതാവിന്റെ ഓഫീസ് അറിയിച്ചിരുന്നു. ഒരോ നിയോജകമണ്ഡലത്തിലുമുള്ള വിവിധ ബൂത്തുകളില് ചേര്ത്ത ഇരട്ടവോട്ടര്മാരുടെ വിവരങ്ങളും അതേ വോട്ടര്മാരുടെ ഫോട്ടോ ഉപയോഗിച്ചു സമീപ നിയോജകമണ്ഡലങ്ങളിലെ ബൂത്തുകളില് വ്യത്യസ്ത പേരുകളിലും വിലാസങ്ങളിലും വോട്ടര് ഐഡിയിലും ചേര്ത്ത വോട്ടര്മാരുടെ പേരുവിവരങ്ങളുമാണു വെബ്സൈറ്റിലൂടെ പുറത്തുവിട്ടത്.
നിയോജകമണ്ഡലത്തിന്റെ നമ്പര്, ബൂത്ത് നമ്പര്, ആ ബൂത്തിലെ വോട്ടറുടെ പേര്, വോട്ടര് ഐഡി നമ്പര്, അതേ വ്യക്തിക്ക് മറ്റു ബൂത്തുകളിലുള്ള വോട്ടിന്റെ ഐഡി നമ്പര്, അവിടുത്തെ പേര്, വിലാസം, അതേ വ്യക്തിക്കു തന്നെ തൊട്ടടുത്ത നിയോജകമണ്ഡലങ്ങളിലുള്ള വോട്ടിന്റെ ഐഡി നമ്പര്, വിലാസം എന്നിവയുടെ പട്ടികയാണ് ഈ വെബ്സൈറ്റില് അപ്ലോഡ് ചെയ്തിട്ടുള്ളത്. വെബ്സൈറ്റിലെ ഈ വിവരങ്ങള് കൃത്യമായി അപ്ഡേറ്റ് ചെയ്തുകൊണ്ടിരിക്കും.
ഫോട്ടോ ഉള്പ്പെടെയുള്ള വിവരങ്ങള് പുതിയ അപ്ഡേഷനുകളില് ഉണ്ടാകും. തെരഞ്ഞെടുപ്പ് കഴിയുന്നതു വരെ വെബ്സൈറ്റില് ഈ വിവരങ്ങളും പുതുതായി ലഭിക്കുന്ന വിവരങ്ങളും ഉണ്ടായിരിക്കും.