IPL 🏏’തലയും’ പിള്ളേരും മുന്നോട്ട്,ഹൈദരാബാദിനെ തകര്‍ത്തു,പോയിന്റുനിലയില്‍ രാജസ്ഥാനൊപ്പം

ചെന്നൈ: സണ്‍റൈസേഴ്‌സ് ഹൈദരാബാദ് ഉയർത്തിയ കുറഞ്ഞ വിജയലക്ഷ്യം 8 പന്തുകൾ ശേഷിക്കെ മറികടന്ന് ചെന്നൈ സൂപ്പർ കിങ്സ്. ഋതുരാജ് ഗെയ്ക്‌വാദ് – ഡെവോൺ കോൺവെ ഓപ്പണിങ് കൂട്ടുകെട്ടിന്റെ മികവിലാണ് ചെന്നൈ വിജയമുറപ്പിച്ചത്. 7 വിക്കറ്റിനാണ് ചെന്നൈയുടെ ജയം. കോൺവെ പുറത്താകാതെ 77 റൺസും ഗെയ്ക്‌വാദ് 35 റൺസുമെടുത്തു.

സ്കോർ: ഹൈദരാബാദ് 20 ഓവറിൽ 7 വിക്കറ്റ് നഷ്ടത്തിൽ 134 റൺസ്. ചെന്നൈ 18.4 ഓവറിൽ 3 വിക്കറ്റ് നഷ്ടത്തിൽ 138 റൺസ്. ഇതോടെ 6 മത്സരങ്ങളിൽ നിന്ന് 4 ജയവും 2 തോൽവിയുമുൾപ്പെടെ 8 പോയിന്റ് നേടിയ ചെന്നൈ, പോയിന്റ് അടിസ്ഥാനത്തിൽ രാജസ്ഥാൻ റോയൽസ്, ലക്നൗ സൂപ്പർ ജയന്റ്സ് എന്നിവർക്കൊപ്പമെത്തിയെങ്കിലും റൺറേറ്റ് പ്രകാരം മൂന്നാം സ്ഥാനത്താണ്. 

ഹൈദരാബാദ് ഉയർത്തിയ 135 റൺസ് വിജയലക്ഷ്യം പിന്തുടർന്ന് ബാറ്റിങ് ആരംഭിച്ച ചെന്നൈയ്ക്ക് ഋതുരാജ് ഗെയ്ക്‌വാദ് – ഡെവോൺ കോൺവെ കൂട്ടുകെട്ട് മികച്ച തുടക്കമാണ് നൽകിയത്. 10 ാം ഓവറിലെ അഞ്ചാം പന്തിൽ ഡെവോൺ കോൺവെ അർധ സെഞ്ചറി പൂർത്തിയാക്കി. 33 പന്തിലാണ് കോൺവെ അർധശകം തികച്ചത്. 10 ഓവർ പിന്നിട്ടപ്പോൾ ചെന്നൈ ഒരു വിക്കറ്റ് നഷ്ടത്തിൽ 86 റൺസ് എന്ന നിലയിലായിരുന്നു.

11 ാം ഓവറിലെ അവസാന പന്തിൽ ഋതുരാജ് ഗെയ്ക്‌വാദ് പുറത്തായി. 30 പന്തിൽ നിന്ന് 35 റൺസെടുത്ത ഗെയ്ക്‌വാദിനെ ഉമ്രാൻ മാലിക് റണ്ണൗട്ടാക്കുകയായിരുന്നു. വിക്കറ്റ് നഷ്ടമായതോടെ ചെന്നൈ ബാറ്റിങ്ങിന്റെ വേഗം കുറഞ്ഞു. 15 ാം ഓവറിൽ അജിൻക്യ രഹാനെ (9 റൺസ്) പുറത്തായി. രഹാനെയെ മയാങ്ക് മാർക്കണ്ഡെയുടെ ബോളിങ്ങിൽ എയ്ഡന്‍ മാര്‍ക്രം ക്യാച്ചെടുക്കുകയായിരുന്നു.

ടീം സ്കോർ 122 റൺസിൽ എത്തിനിൽക്കെ അമ്പാട്ടി റായുഡു(9 റൺസ്)വിനെ മയാങ്ക് മാർക്കണ്ഡെ ബൗൾഡാക്കി. 18.4 പന്തിൽ 3 വിക്കറ്റ് നഷ്ടത്തിൽ ചെന്നൈ വിജയലക്ഷ്യം മറികടന്നു. 57 പന്തിൽ ഒരു സിക്സും 12 ഫോറുമുൾപ്പെടെ 77 റൺസെടുത്ത ഡെവോൺ കോൺവെയും 6 റൺസെടുത്ത മൊയീൻ അലിയും പുറത്താകാതെ നിന്നു. ഹൈദരാബാദിനു വേണ്ടി മയാങ്ക് മാർക്കണ്ഡെ രണ്ടു വിക്കറ്റ് വീഴ്ത്തി. 

നേരത്തെ മികച്ച തുടക്കമിട്ട ഹൈദരാബാദ് ബാറ്റർമാരെ രവീന്ദ്ര ജഡേജയുടെ നേതൃത്വത്തിൽ ബോളർമാർ എറിഞ്ഞൊതുക്കുകയായിരുന്നു. ഇതോടെ സണ്‍റൈസേഴ്‌സ് ഹൈദരാബാദിന് 20 ഓവറിൽ 7 വിക്കറ്റ് നഷ്ടത്തിൽ 134 റൺസെടുക്കാനെ സാധിച്ചുള്ളു. 34 റൺസെടുത്ത ഓപ്പണർ അഭിഷേക് ശര്‍മയാണ് സണ്‍റൈസേഴ്‌സ് ഹൈദരാബാദിന്റെ ടോപ് സ്കോറർ. ചെന്നൈയ്ക്കു വേണ്ടി രവീന്ദ്ര ജഡേജ മൂന്നു വിക്കറ്റും ആകാശ് സിങ്, മഹീഷ് തീക്ഷണ, മതീഷ പതിറാണ എന്നിവർ ഓരോ വിക്കറ്റ് വീതവും വീഴ്ത്തി. 

ടോസ് നേടിയ ചെന്നൈ സൂപ്പർ കിങ്സ്, സണ്‍റൈസേഴ്‌സ് ഹൈദരാബാദിനെ ബാറ്റിങ്ങിന് അയക്കുകയായിരുന്നു. അ‍ഞ്ചാം ഓവറിൽ ഓപ്പണർ ഹാരി ബ്രൂക്കിനെ ആകാശ് സിങ്ങിന്റെ ബോളിങ്ങിൽ ഋതുരാജ് ഗെയ്ക്‌വാദ് ക്യാച്ചെടുത്ത് പുറത്താക്കി. ടീം സ്കോർ 71 ൽ എത്തിനിൽക്കെ 34 റൺസെടുത്ത അഭിഷേക് ശര്‍മയെ രവീന്ദ്ര ജഡേജ പുറത്താക്കി.

മികച്ച സ്കോറിലേക്ക് എന്ന് ഇന്നിങ്സിന്റെ ആദ്യ പകുതി പിന്നിടുമ്പോൾ തോന്നിപ്പിച്ച സണ്‍റൈസേഴ്‌സിന്, പിന്നാലെ തുടരെ വിക്കറ്റുകൾ വീണതോടെ മത്സരത്തിന്റെ നിയന്ത്രണം നഷ്ടമാകുന്നതാണ് കണ്ടത്. 12 ാം ഓവറിൽ രവീന്ദ്ര ജഡേജയുടെ ബോളിങ്ങിൽ ആകാശ് സിങ് ക്യാച്ചെടുത്ത് രാഹുല്‍ ത്രിപാഠി (21 റൺസ്) മടങ്ങി. നായകൻ എയ്ഡന്‍ മാര്‍ക്രം സ്കോർ (12 റൺസ്) ഉയർത്താൻ ശ്രമിച്ചെങ്കിലും മഹീഷ് തീക്ഷണയുടെ ബോളിങ്ങിൽ വിക്കറ്റിനു പിന്നിൽ ചെന്നൈ നായകൻ ധോണിയുടെ കൈകളിലൊതുങ്ങി.

നാലു പന്തുകൾ നേരിട്ട് രണ്ടു റൺസ് മാത്രം നേടിയ മയാങ്ക് അഗര്‍വാളിനെ രവീന്ദ്ര ജഡേജയുടെ ബോളിങ്ങിൽ ധോണി സ്റ്റംമ്പ് ചെയ്തു പുറത്താക്കി. ഹെൻറിച്ച് ക്ലാസനെ (17 റൺസ്) മതീഷ പതിറാണയുടെ പന്തിൽ ഋതുരാജ് ഗെയ്ക്‌വാദ് ക്യാച്ചെടുത്ത് മടക്കി. ഇന്നിങ്സിലെ അവസാന പന്തിൽ വാഷിങ്ടൻ സുന്ദര്‍ (9 റൺസ്) റണ്ണൗട്ടായി. മാര്‍ക്കോ ജാന്‍സെന്‍ 17 റൺസെടുത്ത് പുറത്താകാതെ നിന്നു.