മാനന്തവാടി: വയനാട്ടിലെത്തിയ ആളെക്കൊല്ലി കാട്ടാന ബേലൂര് മഖ്നയെ മയക്കുവെടി വയ്ക്കാനുള്ള ശ്രമത്തിനിടെ ആന കര്ണാടകയുടെ ഉള്വനത്തിലേക്ക് നീങ്ങി. നിലവില് കര്ണാടക വനത്തിലെ നാഗര്ഹോളയിലാണ് ആന.
വനാതിര്ത്തിയില്നിന്ന് ഒന്നരകിലോമീറ്റര് അകലെയാണിത്. കര്ണാടക വനം വകുപ്പ് ഉദ്യോഗസ്ഥര് ആനയെ നിരീക്ഷിക്കുന്നുണ്ട്. ആന കൂടുതല് ആക്രമണകാരിയായി ഉള്വനത്തിലേക്ക് നീങ്ങുകയാണെന്നാണ് ഉദ്യോഗസ്ഥരുടെ നിഗമനം. ഇന്നു തിരിച്ചെത്താന് സാധ്യതയില്ലെന്ന നിഗമനത്തെ തുടര്ന്ന് മിഷന് ബേലൂര് മഖ്ന പ്രതിസന്ധിയിലായി.
ശനിയാഴ്ച വനപാലക സംഘം ബേലൂര് മഖ്നയുടെ പുറകെ നടന്നെങ്കിലും മയക്കുവെടിവയ്ക്കാന് സാധിച്ചിരുന്നില്ല. ദൗത്യത്തിലുണ്ടായിരുന്ന കുങ്കിയാനകളിലൊന്നിനെ ബേലൂര് മഖ്ന ആക്രമിക്കാനും ശ്രമിച്ചിരുന്നു. നോര്ത്ത് വയനാട്, സൗത്ത് വയനാട്, വയനാട് വന്യജീവി സങ്കേതം, നിലമ്പൂര് നോര്ത്ത്, സൗത്ത് മണ്ണാര്ക്കാട്, കോഴിക്കോട് എന്നിവിടങ്ങളില്നിന്നുള്ള ആര്ആര്ടി സംഘങ്ങള് അടക്കമുള്ള 200 ഓളം വനം വകുപ്പ് ജീവനക്കാരാണ് എട്ടു ദിവസമായി ആനയെ പിടികൂടാനുള്ള ശ്രമം നടത്തുന്നത്.
മയക്കുവെടി വിദഗ്ധന് ഡോ. അരുണ് സക്കറിയയും മുന്പ് കര്ണാടകയില്നിന്നു ബേലൂര് മഖ്നയെ മയക്കുവെടിവച്ച സംഘത്തിലെ അംഗങ്ങളടക്കമുള്ള 25 പേരടങ്ങുന്ന കര്ണാടക വനപാലകരും ഒപ്പമുള്ളത് തിരച്ചലില് പങ്കെടുക്കുന്നവര്ക്ക് ആത്മവിശ്വാസം നല്കുന്നുണ്ട്. മുത്തങ്ങ ആനപ്പന്തിയില്നിന്ന് എത്തിച്ച 4 കുങ്കിയാനകളും ദൗത്യത്തില് പങ്കെടുക്കുന്നുണ്ട്.
മുന്പ് ഒരുവട്ടം മയക്കുവെടി വച്ച് പിടികൂടിയതിനാല് കുങ്കിയാനകളുടെ സാന്നിധ്യം മനസ്സിലാക്കി മോഴയാന ഉള്വനത്തിലേക്ക് പിന്വാങ്ങുന്നതും പൊന്തക്കാടുകളും ദൗത്യസംഘത്തിനു തലവേദന ഉണ്ടാക്കുന്നുണ്ട്.