കൊച്ചി: ബേലൂർ മഖ്ന എന്ന കാട്ടാനയെ മയക്കുവെടിവെക്കാൻ കർണാടകയുമായി ചേർന്ന് സംയുക്ത കർമപദ്ധതി തയ്യാറാക്കാൻ കേരള ഹൈക്കോടതി ഉത്തരവ്. വയനാട്ടിലെ ജനവാസമേഖലയിലേക്ക് ആന ഇറങ്ങുമെന്ന് ഉറപ്പായാൽ ഉചിതമായ സ്ഥലത്തുവെച്ച് മയക്കുവെടിവെക്കാമെന്ന് കോടതി പറഞ്ഞു. അതേസമയം, ആനയെ വെടിവെച്ചുകൊല്ലാൻ കളക്ടർക്ക് ഉത്തരവ് നൽകാനാകില്ലെന്നും കോടതി പറഞ്ഞു.
കഴിഞ്ഞ പത്ത് ദിവസത്തിലേറെയായി ആനയെ പിടികൂടാൻ വനംവകുപ്പ് കിണഞ്ഞു പരിശ്രമിക്കുകയാണ്. ഈ സാഹചര്യത്തിലാണ് കർണാടക വനംവകുപ്പുമായി ചേർന്ന് ഒരു സംയുക്ത കർമപദ്ധതി തയ്യാറാക്കാൻ ഹൈക്കോടതി നിർദേശിച്ചിരിക്കുന്നത്. ആന കർണാടക വനാതിർത്തിയിലേക്കും കേരള വനാതിർത്തിയിലേക്കും മാറിമാറി സഞ്ചരിക്കുകയാണ്. ഇത് മയക്കുവെടി വെക്കുന്നതിന് തടസ്സം സൃഷ്ടിക്കുന്നുണ്ട്. ഈ സാഹചര്യത്തിലാണ് ഹൈക്കോടതിയുടെ നിർദേശം.
നിലവിലെ ഓപ്പറേഷന് ചില തടസ്സങ്ങളുണ്ടെന്ന് ഹൈക്കോടതി ചൂണ്ടിക്കാട്ടി. ഉൾക്കാട്ടിലേക്ക് കടന്ന് ആനയെ മയക്കുവെടി വെക്കാൻ നിയമം അനുവദിക്കുന്നില്ലെന്നും കാർണാടക അതിർത്തിയിലേക്ക് ആന നീങ്ങിയാൽ അവിടെച്ചെന്ന് മയക്കുവെടിവെക്കാൻ കേരള വനംവകുപ്പിന് നിയമപരമായി സാധിക്കില്ലെന്നും ഹൈക്കോടതി ചൂണ്ടിക്കാട്ടി.
ബേലൂർ മഖ്ന എന്ന ആന ആളെ കൊല്ലിയായി മാറിയ ഘട്ടത്തിൽ വൻതോതിൽ പ്രക്ഷോഭം ഉയർന്നിരുന്നു. ആനയെ വെടിവെച്ചുകൊല്ലാൻ ഉത്തരവിടണമെന്നതടക്കമുള്ള ആവശ്യങ്ങളുയർന്നു. തുടർന്ന് ജനങ്ങളുടം വികാരം വയനാട് കളക്ടർ കോടതിയിൽ അറിയിച്ചു. സി.ആർ.പി.സി. 131 പ്രകാരം വെടിവെച്ചുകൊല്ലാൻ ഉത്തരവിടാൻ ആവശ്യപ്പെടുന്നുണ്ടെന്നും കളക്ടർ കോടതിയുടെ ശ്രദ്ധയിൽപ്പെടുത്തി. എന്നാൽ, ആനയെ വെടിവെച്ചുകൊല്ലാൻ ജില്ലാ കളക്ടർക്ക് ഉത്തരവിടാൻ നിയമപരമായി സാധ്യമല്ലെന്ന് കോടതി പറഞ്ഞു.
ആനശല്യവും വന്യമൃഗശല്യവും കൂടിവരുന്ന സാഹചര്യത്തിൽ തമിഴ്നാട്, കേരള, കർണാടക വനംവകുപ്പുകൾ സംയുക്തമായി ഒരു സമിതി രൂപവത്കരിക്കണമെന്നും വന്യജീവി ശല്യം തടയുന്നതിന് സംയുക്തമായി നീങ്ങണമെന്നും കോടതി പറഞ്ഞു.
