പാലക്കാട്: വാളയാര് പെണ്കുട്ടികളുടെ മരണത്തില് ആറാമതൊരു പ്രതി കൂടിയുണ്ടെന്ന് അമ്മയുടെ വെളിപ്പെടുത്തല്. ആത്മകഥയിലാണ് കേസില് ഉന്നത സ്വാധീനമുള്ള ആറാമതൊരാള് പ്രതിയായി ഉണ്ടായിരുന്നുവെന്ന് വെളിപ്പെടുത്തിയത്.
കേസ് അട്ടിമറിച്ചത് ഇയാളെ രക്ഷിക്കാനാണ്. മൂത്തമകള് മരിച്ചതിന് പിന്നാലെ വീട്ടില് നിന്നും രണ്ടുപേര് ഇറങ്ങിപ്പോകുന്നത് ഇളയ മകള് കണ്ടിരുന്നുവെന്നും ഇക്കാര്യം പോലീസില് മൊഴി നല്കിയെങ്കിലും അന്വേഷണമുണ്ടായില്ലെന്നും പെണ്കുട്ടികളുടെ അമ്മ പറയുന്നു.
സിബിഐ കുറ്റപത്രം സമര്പ്പിച്ച് രണ്ട് മാസമായിട്ടും പകര്പ്പ് നല്കിയില്ലെന്നും അമ്മ ആരോപിക്കുന്നു. വെള്ളിയാഴ്ച രാവിലെ പത്തിന് അട്ടപ്പള്ളത്തെ വീട്ടുമുറ്റത്താണ് ആത്മകഥ പ്രകാശനം ചെയ്യുന്നത്. മരിച്ച ഇളയ കുഞ്ഞിന്റെ അഞ്ചാം ചരമവാര്ഷികമാണ് നാളെ.
അട്ടിമറികളേറെക്കണ്ട സമാനതകളില്ലാത്ത കേസാണ് വാളയാറിലെ പെണ്കുട്ടികളുടെ മരണം. 2017 ജനുവരി ഏഴിനാണ് അട്ടപ്പള്ളത്തെ വീട്ടില് 13 വയസുകാരിയെ തൂങ്ങിമരിച്ച നിലയില് കണ്ടെത്തിയത്. രണ്ടുമാസത്തിനിപ്പുറം മാര്ച്ച് നാലിന് ഇതേ വീട്ടില് അനുജത്തി ഒമ്പത് വയസുകാരിയേയും തൂങ്ങിമരിച്ച നിലയില് കണ്ടെത്തി. വീടിന്റെ ഉത്തരത്തില് ഒമ്പത് വയസ്സുകാരിക്ക് തൂങ്ങാനാവില്ലെന്ന കണ്ടെത്തലോടെയാണ് സംശയം ബലപ്പെടുന്നത്.
13 കാരിയുടെ മരണത്തിലെ ഏക ദൃക്സാക്ഷി കൂടിയായിരുന്നു ഒമ്പതുകാരി. മാര്ച്ച് ആറിന് അന്നത്തെ എഎസ്പി ജി പൂങ്കുഴലിയുടെ നേതൃത്വത്തില് പ്രത്യേക അന്വേഷണ സംഘത്തെ രൂപീകരിച്ച് അന്വേഷണമാരംഭിച്ചു. തൊട്ടടുത്ത ദിവസം പൊലീസ് പുറത്തുവിട്ട പോസ്റ്റുമോര്ട്ടം റിപ്പോര്ട്ടിലെ വിവരങ്ങള് ഞെട്ടിക്കുന്നതായിരുന്നു. മരിച്ച കുട്ടികള് പ്രകൃതിവിരുദ്ധ പീഡനത്തിനിരയായിരുന്നു. പിന്നാലെ ആദ്യ കുട്ടിയുടെ മരണം അന്വേഷിച്ച പൊലീസിന് വീഴ്ചയുണ്ടായെന്ന ആരോപണമുയര്ന്നു.
ഇക്കാര്യത്തിലും അന്വേഷണം തുടങ്ങി. അന്വേഷണ സംഘം പുനസംഘടിപ്പിക്കുകയും ചെയ്തു പ്രാരംഭ അന്വേഷണത്തില് വീഴ്ച വരുത്തിയ വാളയാര് എസ്ഐ പി സി ചാക്കോയെ സംഘത്തില് നിന്ന് ഒഴിവാക്കി. പ്രത്യേക അന്വേഷണ സംഘത്തിന്റെ ചുമതല അന്നത്തെ പാലക്കാട് നര്ക്കോട്ടിക് സെല് ഡിവൈഎസ്പി എം ജെ സോജനും നല്കി. തൊട്ടുപിന്നാലെ രണ്ടുപേരുടെ അറസ്റ്റുണ്ടായി.പാമ്പാംപള്ളം സ്വദേശി വി. മധു, രാജാക്കാട് സ്വദേശി ഷിബു എന്നിവരെയാണ് അറസ്റ്റ് ചെയ്തത്. വാളയാര് എസ്ഐ പി സി ചാക്കോയ്ക്ക് സസ്പന്ഷനും ഡിവൈഎസ്പി വാസുദേവന്, സിഐ വിപിന് ദാസ് എന്നിവര്ക്കെതിരെ വകുപ്പു തല അന്വേഷണത്തിനും ഉത്തരവായി.
മാര്ച്ച് പത്തിന് രണ്ടു പേരെക്കൂടി അറസ്റ്റ് ചെയ്തു. എം മധു, ചേര്ത്തല സ്വദേശി പ്രദീപ് കുമാര് എന്നിവരെയാണ് അറസ്റ്റ് ചെയ്തത്. ഒരാഴ്ചയ്ക്ക് ശേഷം കേസില് ഒരു പതിനാറുകാരന് കൂടി അറസ്റ്റിലായി.കേസന്വേഷണം നടക്കുന്നതിനിടെ പൊലീസ് ചോദ്യം ചെയ്യാന് വിളിപ്പിച്ച പ്രവീണ് എന്ന 29 കാരന് തൂങ്ങിമരിച്ചു. ഒടുവില് ജൂണ് 22 ന് കോടതിയില് പൊലീസ് സമര്പ്പിച്ചത് സഹോദരിമാരുടെ മരണം ആത്മഹത്യയെന്ന് രേഖപ്പെടുത്തിയ കുറ്റപത്രം. പതിനാറുകാരന്റെ ഒഴികെ മറ്റ് നാല് പ്രതികളുടെ പേരില് സമര്പ്പിച്ച കുറ്റപത്രത്തില് പോക്സോ, ആത്മഹത്യാ പ്രേരണ, പട്ടിക ജാതി പട്ടിക വര്ഗ്ഗങ്ങള്ക്കെതിരായ അതിക്രമം തുടങ്ങി വകുപ്പുകളാണ് ഉണ്ടായിരുന്നത്. പതിനാറുകാരന്റെ വിചാരണ ജുവനൈല് കോടതിയിലേക്കും മാറ്റി. 2019 ഒക്ടോബര് ഒമ്പതിന് കേസിലെ ആദ്യ വിധി.
മൂന്നാം പ്രതിയായി ചേര്ത്ത ചേര്ത്തല സ്വദേശി പ്രദീപ് കുമാറിനെ പാലക്കാട് കോടതി തെളിവുകളുടെ അഭാവത്താല് വെറുതെവിട്ടു. പിന്നാലെ വി മധു, എം മധു, ഷിബു എന്നിവരെയും കോടതി വെറുതെ വിട്ടു.വിധി റദ്ദാക്കണമെന്നും പുനര് വിചാരണ വേണമെന്നുമാവശ്യപ്പെട്ട് പെണ്കുട്ടികളുടെ അമ്മ ഹൈക്കോടതിയെ സമീപിച്ചു. കേസന്വേഷണത്തിലും നടത്തതിപ്പിലും ഗുരുതര വീഴ്ചയുണ്ടായെന്ന ആരോപണത്തെത്തുടര്ന്ന് റിട്ടയേഡ് ജില്ലാ ജഡ്ജി പി കെ ഹനീഫയെ സംസ്ഥാന സര്ക്കാര് കമ്മീഷനായി വച്ചു 2020 മാര്ച്ച് 18 ന് പൊലീസിനും പ്രോസിക്യൂഷനും വീഴ്ചയുണ്ടായെന്ന് ഹനീഫ കമ്മീഷന് കണ്ടെത്തി. അതിനിടെ മൂന്നാം പ്രതി പ്രദീപ് കുമാര് ആത്മഹത്യ ചെയ്തു. ഇക്കൊല്ലം ജനുവരിയില് പ്രതികളെ വെറുതെവിട്ട വിചാരണക്കോടതി വിധി ഹൈക്കോടതി റദ്ദാക്കി. പിന്നാലെ കേസ് സിബിഐയ്ക്ക് വിടുകയും ചെയ്തു.