വസ്ത്രധാരണത്തിന്റെ പേരിൽ സൈബർ ആക്രമണം നേരിട്ട താരമാണ് അനശ്വര രാജൻ. തണ്ണീർമത്തൻ ദിനങ്ങൾ എന്ന ചിത്രത്തിലൂടെ ശ്രദ്ധ നേടിയ താരത്തിന്റെ മോഡേണ്‍ ലുക്കും ഇറക്കം കുറഞ്ഞ വസ്ത്രം ധരിച്ചതുമാണ് വിമർശനങ്ങൾക്ക് ഇടയാക്കിയത്
തന്റെ 18ാം ജന്മദിനം ആഘോഷിച്ചതിന് പിന്നാലെ നടി പങ്കുവെച്ച മോഡേൺ വേഷത്തിലുള്ള ചിത്രമാണ് സൈബർ ആങ്ങളമാരെ ചൊടിപ്പിച്ചത്. ഇതിനൊക്കെ കിടിലൻ മറുപടിയുമായി അനശ്വര രാജൻ രംഗത്തെത്തിയതും ഏറെ വാർത്താ പ്രാധാന്യം നേടിയിരുന്നു
‘പതിനെട്ട് വയസാകാൻ കാത്തിരിക്കുയായിരുന്നു ഇറക്കം കുറഞ്ഞ വസ്ത്രമിടാൻ’ എന്നൊക്കെ പറഞ്ഞു കൊണ്ടായിരുന്നു നടിയ്ക്ക് നേർക്ക് സൈബർ ആക്രമണം നടന്നത്. ഇപ്പോഴിതാ നടി മറ്റൊരു പുതിയ ചിത്രവുമായി എത്തിയിരിക്കുകയാണ്. ഈ ചിത്രത്തെയും കമൻറുകളിലൂടെ വിമർശിച്ച് പലരും രംഗത്തെത്തിയിട്ടുണ്ട്.
കമൻ്റ് ബോക്സിൽ ആങ്ങളമാർക്ക് യാതൊരു പഞ്ഞവുമില്ലല്ലോ എന്നും ചിലർ ചൂണ്ടിക്കാട്ടുന്നുണ്ട്.അതേസമയം നടിയുടെ ലുക്കിനെയും വസ്ത്രധാരണത്തെയും പ്രശംസിച്ചും നിരവധി പേരെത്തുന്നുണ്ട്. ‘പനിനീർപൂവ്, സുന്ദരി മോൾ’ എന്നും ‘വേഷം നന്നായിട്ടുണ്ട് പക്ഷേ കൂടുതൽ മോശം ആകരുത്’ എന്നുമൊക്കെയാണ് ആരാധകർ പറയുന്നത്.
എന്നാൽ ഏത് സിനിമയുടെ ലൊക്കേഷനാണെന്നും പലരും കമൻ്റുകളിലൂടെ ചോദിക്കുന്നു. അതേസമയം അനശ്വര ധരിച്ചിരിക്കുന്ന വസ്ത്രത്തെ ട്രോളുന്നവരും കുറവല്ല. ‘ഉജാല കുപ്പിടെ മൂട് കട്ട് ചെയ്തത് പോലുണ്ട്’ എന്നും ‘വൃത്തിയുള്ള വസ്ത്രം ധരിച്ചൂടേ…’യെന്നും പലരും കമൻ്റുകളിലൂടെ ചോദിക്കുന്നു. ഇതേ കോസ്റ്റ്യൂമിലുള്ള മറ്റു ചിത്രങ്ങൾ നേരത്തേ അനശ്വര ഇൻസ്റ്റാഗ്രാമിലൂടെ പങ്കുവെച്ചിരുന്നു.