ന്യൂഡല്ഹി: രാജധാനി എക്സ്പ്രസ് ഇടിച്ച് എട്ട് പശുക്കള് ചത്തു. ആറോളം പശുക്കള്ക്ക് ഗുരുതരമായി പരിക്കേറ്റു. ഡല്ഹി-ഹൗറ റൂട്ടിലുള്ള ഗ്രാമത്തിലാണ് ദാരുണമായ സംഭവം നടന്നത്. ഞായാറാഴ്ച്ച യശ്വന്ത്നഗര്-ബല്റായ് റെയില്വേ സ്റ്റേഷനുകള്ക്കിടയിലാണ് സംഭവം നടന്നത്. ഗേറ്റ്മാനും നാട്ടുകാരുമാണ് സംഭവം ആദ്യം കണ്ടത്. ഉടന് തന്നെ ജില്ലാ അധികാരികളെ വിവരം അറിയിച്ചു.
പരിക്കേറ്റ പശുക്കളെ ഉടനെ തന്നെ അടുത്തുള്ള മൃഗാശുപത്രിയില് ചികിത്സയ്ക്ക് എത്തിച്ചു. പുലര്ച്ചെയാണ് സംഭവം നടന്നത്. കനത്ത മൂടല് മഞ്ഞുകാരണം പശുക്കള് റെയില്വേ ട്രാക്ക് മുറിച്ചു കടക്കുന്നത് കാണാന് ലോക്കോപൈലറ്റിന് സാധിച്ചില്ലെന്നാണ് പ്രാഥമിക വിലയിരുത്തല്. സംഭവത്തില് അന്വേഷണം നടത്താന് സബ് ഡിവിഷണല് മജിസ്ട്രേറ്റ് ഉത്തരവിട്ടിട്ടുണ്ട്. ട്രാക്കിന് സമീപം മേയുകയായിരുന്ന കന്നുകാലികളാണ് അപകടത്തില്പെട്ടെതെന്ന് ഗ്രാമവാസികള് പറയുന്നു. പതിനാല് പശുക്കളാണ് അപകടത്തില്പെട്ടത്.
നിരവധി കുടുംബങ്ങളുടെ ഉപജീവനത്തിന മാര്ഗമായ കന്നുകാലികളാണ് അപകടത്തില്പെട്ടതെന്നും കുടുംബങ്ങള്ക്ക് നഷ്ടപരിഹാരം നല്കണമെന്നും ആവശ്യപ്പെട്ട് നാട്ടുകാര് രംഗത്തു വന്നിട്ടുണ്ട്. കഴിഞ്ഞ വര്ഷം നവംബറില് സമാനമായ സംഭവം നടന്നിരുന്നു. തിരുവനന്തപുരം വേളി റെയില്വേ സ്റ്റേഷന് സമീപം ജനശതാബ്ദി ട്രെയിന് ഇടിച്ച് ഏഴ് എരുമകളാണ് ചത്തത്.