തൊടുപുഴ: പ്രണയാഭ്യര്ത്ഥന നിരസിച്ച എട്ടാം ക്ലാസ് വിദ്യാര്ത്ഥിനിയുടെ കൈ ഞരമ്പ് മുറിച്ച് കൊലപ്പെടുത്താന് ശ്രമം. ഇടുക്കി തോപ്രാംകുടി സ്വദേശിനിയായ പെണ്കുട്ടിയെ ആണ് ബേക്കിലെത്തിയ രണ്ടുപേര് ബ്ലേഡ് ഉപയോഗിച്ച് ആക്രമിച്ചത്. കൈത്തണ്ടയില് പരിക്കേറ്റ പെണ്കുട്ടിയെ മുരിക്കാശ്ശേരിയിലെ സ്വകാര്യ ആശുപത്രിയില് പ്രവേശിപ്പിച്ചു.
സ്കൂളിലെ ഒരു വിദ്യാര്ത്ഥിയുടെ പ്രേമാഭ്യര്ഥന നിരസിച്ചതിന്റെ പേരില് ഒരു സംഘം അക്രമികള് പെണ്കുട്ടിയെ നിരന്തരം ശല്യം ചെയ്യുന്നുണ്ടായിരുന്നു. വീട്ടിലെ ഫോണില് വിളിച്ച് നിരന്തരം അസഭ്യം പറയുകയും മൂന്ന് ബൈക്കുകളിലെത്തിയ അഞ്ച് പേര് പെണ്കുട്ടിയെ തടഞ്ഞുനിര്ത്തി ഉപദ്രവിക്കാന് ശ്രമിക്കുകയും ചെയ്തതോടെ പെണ്കുട്ടിയുടെ അച്ഛന് പോലീസിനും മുഖ്യമന്ത്രിക്കും പരാതി നല്കി. ഇതാണ് അക്രമിസംഘത്തെ പ്രകോപിപ്പിച്ചത്.
ഒറ്റയ്ക്ക് ട്യൂഷന് പോകുമ്പോള് ബൈക്കിലെത്തിയ സംഘം പെണ്കുട്ടിയെ ആക്രമിക്കുക ആയിരുന്നു. വെള്ളിയാഴ്ച രാവിലെ 11നാണ് സംഭവം. റോഡിലൂടെ നടന്നുപോകുകയായിരുന്ന പെണ്കുട്ടിയെ ബൈക്കിലെത്തിയ രണ്ട് പേര് തടഞ്ഞുനിര്ത്തി ബ്ലേഡുകൊണ്ട് ആക്രമിക്കുകയായിരുന്നു. പരാതി പിന്വലിച്ചില്ലെങ്കില് വീട്ടില് കയറി കൊന്നുകളയുമെന്ന് ഭീഷണിപ്പെടുത്തുകയും ചെയ്തു. കൈമുറിഞ്ഞ പെണ്കുട്ടി അലറിക്കരഞ്ഞുകൊണ്ട് സമീപത്തെ വീട്ടിലേക്ക് ഓടി രക്ഷപ്പെടുകയായിരുന്നു. ആ സമയംകൊണ്ട് അക്രമികള് രക്ഷപ്പെട്ടു. നാട്ടുകാരാണ് പെണ്കുട്ടിയെ ആശുപത്രിയില് എത്തിച്ചത്.
കുട്ടിയുടെ അച്ഛന്റെ പരാതിയില് അക്രമികളെ കണ്ടെത്താന് കരിമണല് പോലീസ് അന്വേഷണം ആരംഭിച്ചു. പെണ്കുട്ടി അക്രമികളെ വ്യക്തമായി കണ്ടിട്ടുണ്ട്. ഒരുവട്ടംകൂടി കണ്ടാല് തിരിച്ചറിയുമെന്നും കുട്ടി മൊഴി നല്കിയിട്ടുണ്ട്. തോപ്രാംകുടി, മുരിക്കാശ്ശേരി കേന്ദ്രീകരിച്ച് പ്രവര്ത്തിക്കുന്ന മയക്കുമരുന്ന് സംഘത്തില്പ്പെട്ടവരാണ് ആക്രമണത്തിന്റെ പിന്നിലെന്ന് പെണ്കുട്ടിയുടെ അച്ഛന് പറഞ്ഞു.