തിരുവനന്തപുരം: ഹോട്ടലില്‍ നിന്നും ഭക്ഷണം വാങ്ങാന്‍ പോയ യുവാവിനെ ബൈക്ക് തടഞ്ഞ് നിര്‍ത്തി ക്രൂരമായി മര്‍ദിച്ചു. ഗുരുതരമായി പരിക്കേറ്റ യുവാവിനെ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. പുത്തന്‍തോപ്പ് സ്വദേശി അനസ് (26) നാണ് മര്‍ദ്ദനമേറ്റത്.
തിങ്കളാഴ്ച രാത്രി ഏഴിനാണ് സംഭവം. ഹോട്ടലിലേക്ക് പോകുകയായിരുന്ന തന്നെ ഫൈസല്‍ എന്ന യുവാവ് ബൈക്ക് തടഞ്ഞ് നിര്‍ത്തി താക്കോല്‍ ഊരി വാങ്ങിയശേഷം മര്‍ദ്ദിക്കുകയായിരുന്നുവെന്നാണ് അനസ് പോലീസില്‍ നല്‍കിയ പരാതി.
മര്‍ദ്ദനത്തെ തുടര്‍ന്ന് അവശനായ യുവാവിനെ നാട്ടുകാരും പോലീസും ചേര്‍ന്നാണ് ആശുപത്രിയില്‍ പ്രവേശിപ്പിച്ചത്. ഫൈസലുമായി മുന്‍ പരിചയമൊ വിരോധമൊ ഇല്ലെന്നാണ് യുവാവ് വ്യക്തമാക്കിയത്. മദ്യലഹരിയിലായിരുന്നു മര്‍ദനമെന്നാണ് അനസ് പറയുന്നത്. മര്‍ദന രംഗങ്ങളുടെ സിസിടിവി ദൃശ്യങ്ങള്‍ ഉള്‍പ്പെടെ പോലീസിന് കൈമാറി.
അതേസമയം മംഗലപുരം പോലീസില്‍ ആദ്യം പരാതി നല്‍കിയെങ്കിലും പോലീസ് കേസെടുക്കാന്‍ തയാറായില്ലെന്നും സിസിടിവി ദൃശ്യങ്ങള്‍ പോലീസിന് കൈമാറുകയും ദൃശ്യങ്ങള്‍ വൈറലാകുകയും ചെയ്തതോടെയാണ് പോലീസ് കേസെടുത്തതെന്നും അനസും ബന്ധുക്കളും ആരോപിച്ചു.
