തിരുവനന്തപുരം: വിഴിഞ്ഞത്ത് ടിപ്പർ ലോറിയിൽനിന്ന് കല്ല് തെറിച്ചുവീണ് യുവാവ് മരിച്ച സംഭവത്തിൽ നഷ്ടപരിഹാരം നൽകുമെന്ന് അദാനി ഗ്രൂപ്പ്. അനന്തുവിന്റെ കുടുംബത്തിന് ഒരുകോടി രൂപ നൽകുമെന്നാണ് അറിയിച്ചത്.
കുടുംബത്തിന് ധനസഹായം നൽകണമെന്നതുൾപ്പെടെയുള്ള ആവശ്യങ്ങൾ കഴിഞ്ഞ ദിവസം നടന്ന സർവകക്ഷിയോഗത്തിൽ ഉയർന്നിരുന്നു. ഈ പശ്ചാത്തലത്തിലാണ് അദാനി ഗ്രൂപ്പ് ധനസഹായം നൽകാൻ സന്നദ്ധത അറിയിച്ചത്.
കഴിഞ്ഞ ചൊവ്വാഴ്ചയാണ് വിഴിഞ്ഞം തുറമുഖ നിർമാണത്തിന് വേണ്ടി കല്ലുമായി പോയ ടിപ്പർ ലോറിയിൽ നിന്ന് കല്ലുതെറിച്ച് ദേഹത്ത് വീണ് അനന്തു മരിച്ചത്. വീട്ടിൽ നിന്നും ഒരുകിലോമീറ്റർ അകലെ വെച്ചായിരുന്നു അപകടം നടന്നത്. ടിപ്പറിൽ കയറ്റാവുന്നതിലും അധികം കല്ലുണ്ടായിരുന്നു.
രണ്ടുമാസം മുമ്പ് വിഴിഞ്ഞം തുറമുഖ ആവശ്യത്തിന് കല്ലുമായി പോയ ടിപ്പർ മൂലം അപകടത്തിൽ പെട്ട് കാൽ മുറിച്ചുമാറ്റേണ്ട അവസ്ഥയിലെത്തിയ സന്ധ്യയെന്ന അധ്യാപികയ്ക്ക് ധനസഹായം നൽകുന്ന കാര്യത്തിൽ തീരുമാനമുണ്ടായിട്ടില്ല.
