വിജയ്-സംഗീത വിവാഹമോചനക്കേസ് ഒത്തുതീർപ്പിലേക്ക്? ജീവനാംശമായി നൽകുന്നത് കോടികൾ

ചെന്നെെ: സിനിമാ ലോകത്തെയും ആരാധകരെയും ഒരുപോലെ ഞെട്ടിച്ചുകൊണ്ട് സൂപ്പർ താരം വിജയ്‌യും ഭാര്യ സംഗീത സ്വർണലിംഗവും വിവാഹമോചനത്തിലേക്ക് നീങ്ങുന്നു എന്ന വാർത്തകൾ സജീവമാകുന്നു. 27 വർഷം നീണ്ട ദാമ്പത്യ ജീവിതത്തിന് ശേഷം സംഗീത ചെങ്ങൽപേട്ട് കോടതിയിൽ വിവാഹമോചന ഹർജി സമർപ്പിച്ചു എന്നാണ് ഏറ്റവും പുതിയ റിപ്പോർട്ടുകൾ സൂചിപ്പിക്കുന്നത്. അവിശ്വസ്തത, മാനസിക പീഡനം, അവഗണന തുടങ്ങിയ ഗുരുതരമായ ആരോപണങ്ങളാണ് സംഗീത തന്റെ ഹർജിയിൽ വിജയ്‌ക്കെതിരെ ഉന്നയിച്ചിരിക്കുന്നത്.

ദീർഘകാലമായി ഇരുവരും വേർപിരിഞ്ഞാണ് താമസിക്കുന്നതെന്ന വാർത്തകൾ ശരിവെക്കുന്ന രീതിയിലാണ് ഇപ്പോൾ നിയമനടപടികൾ മുന്നോട്ട് പോകുന്നത്. ഈ വാർത്ത പുറത്തുവന്നതോടെ തമിഴ് രാഷ്ട്രീയ-സിനിമ മേഖലകളിൽ വലിയ ചർച്ചകൾക്കാണ് വഴിതുറന്നിരിക്കുന്നത്.2021 ഏപ്രിൽ മാസത്തോടുകൂടിയാണ് തങ്ങളുടെ ദാമ്പത്യത്തിൽ വിള്ളലുകൾ വീണു തുടങ്ങിയതെന്ന് സംഗീത ഹർജിയിൽ വ്യക്തമാക്കുന്നുണ്ട്. ഒരു പ്രമുഖ നടിയുമായി വിജയ്ക്കുള്ള ബന്ധമാണ് ഈ തകർച്ചയ്ക്ക് പ്രധാന കാരണമെന്നും ഇത് തന്നെ ആഴത്തിൽ വേദനിപ്പിച്ചുവെന്നും അവർ ആരോപിക്കുന്നു.

ആ ബന്ധം അവസാനിപ്പിക്കാമെന്ന് വിജയ് ആദ്യം ഉറപ്പ് നൽകിയിരുന്നെങ്കിലും പിന്നീട് അത് തുടർന്നതായാണ് സംഗീത പറയുന്നത്. ഈ ബന്ധം പരസ്യമായതോടെ തനിക്കും കുട്ടികൾക്കും വലിയ രീതിയിലുള്ള മാനസിക വിഷമവും അപമാനവും നേരിടേണ്ടി വന്നതായും ഹർജിയിൽ ചൂണ്ടിക്കാട്ടുന്നുണ്ട്. കുടുംബത്തിന്റെ സ്വകാര്യത കണക്കിലെടുത്ത് കോടതി നടപടികൾ ക്യാമറയ്ക്ക് മുന്നിൽ രഹസ്യമായി നടത്തണമെന്നും അവർ ആവശ്യപ്പെട്ടു.വിവാഹമോചന വാർത്തകൾ വലിയ വാർത്താപ്രാധാന്യം നേടിയതോടെ വിഷയം കോടതിക്ക് പുറത്ത് ഒത്തുതീർപ്പാക്കാൻ വിജയ് ശ്രമിക്കുന്നതായാണ് തമിഴ് മാധ്യമങ്ങൾ റിപ്പോർട്ട് ചെയ്യുന്നത്.

ഇതിന്റെ ഭാഗമായി സംഗീതയ്ക്കും മക്കളായ ജെയ്‌സൺ സഞ്ജയ്ക്കും ദിവ്യ സാഷയ്ക്കുമായി ഏകദേശം 250 കോടി രൂപയുടെ നഷ്ടപരിഹാരം വിജയ് വാഗ്ദാനം ചെയ്തതായാണ് വിവരം. നിയമപോരാട്ടങ്ങൾ തന്റെ രാഷ്ട്രീയ ജീവിതത്തെയും സിനിമയെയും ബാധിക്കുമെന്ന ഭയമാണ് വിജയിയെ ഇത്തരമൊരു ഒത്തുതീർപ്പ് ചർച്ചയ്ക്ക് പ്രേരിപ്പിച്ചത്. രാഷ്ട്രീയ പാർട്ടി രൂപീകരിച്ച് സജീവമായി മുന്നോട്ട് പോകുന്ന വിജയിക്ക് കുടുംബപ്രശ്നങ്ങൾ വലിയൊരു തിരിച്ചടിയാവുമെന്ന് രാഷ്ട്രീയ നിരീക്ഷകർ കരുതുന്നു. എന്നാൽ ഈ വാഗ്ദാനത്തോട് സംഗീത ഇതുവരെ അനുകൂലമായി പ്രതികരിച്ചിട്ടില്ലെന്നാണ് ലഭിക്കുന്ന സൂചനകൾ.

തന്റെ രാഷ്ട്രീയ ഭാവി മുന്നിൽക്കണ്ടാണ് വിജയ് ഈ വിവാഹബന്ധം വേർപെടുത്താൻ ആദ്യം വിമുഖത കാട്ടിയതെന്നാണ് ചില റിപ്പോർട്ടുകൾ സൂചിപ്പിക്കുന്നത്. തമിഴക വെട്രി കഴകം (TVK) എന്ന പാർട്ടിയിലൂടെ തമിഴ്നാട് രാഷ്ട്രീയത്തിൽ നിർണ്ണായക ശക്തിയാവാൻ ഒരുങ്ങുന്ന വിജയിക്ക് ഈ വിവാദം വലിയ പ്രതിസന്ധിയാണ് സൃഷ്ടിച്ചിരിക്കുന്നത്. മുൻപ് പലതവണ അനുരഞ്ജന ചർച്ചകൾ നടന്നുവെങ്കിലും അവയെല്ലാം പരാജയപ്പെടുകയായിരുന്നു എന്ന് സൂചനയുണ്ട്. 2021 മുതൽ 2025 വരെയുള്ള കാലയളവിൽ പല ഘട്ടങ്ങളിലായി ഒത്തുതീർപ്പ് ശ്രമങ്ങൾ നടന്നുവെങ്കിലും സംഗീത തന്റെ തീരുമാനത്തിൽ ഉറച്ചുനിൽക്കുകയായിരുന്നു.

നിലവിൽ സംഗീത ലണ്ടനിൽ തന്റെ മാതാപിതാക്കൾക്കൊപ്പമാണ് കഴിയുന്നതെന്നാണ് ലഭിക്കുന്ന വിവരം.വിജയിയുടെയും സംഗീതയുടെയും മക്കളായ ജെയ്‌സൺ സഞ്ജയും ദിവ്യ സാഷയും അമ്മയ്ക്കൊപ്പമാണ് ഇപ്പോൾ നിലയുറപ്പിച്ചിരിക്കുന്നത്. മകൻ ജെയ്‌സൺ സഞ്ജയ് അടുത്തിടെ ഇൻസ്റ്റാഗ്രാമിൽ വിജയിയെ അൺഫോളോ ചെയ്തതായും വാർത്തകൾ പ്രചരിക്കുന്നുണ്ട്. സിനിമാ സംവിധാന രംഗത്തേക്ക് ചുവടുവെക്കുന്ന സഞ്ജയ് തന്റെ കരിയറുമായി ബന്ധപ്പെട്ട കാര്യങ്ങളിൽ ശ്രദ്ധ കേന്ദ്രീകരിക്കുകയാണ്.

കുട്ടികളുടെ ഭാവി കൂടി കണക്കിലെടുത്താണ് വിജയ് ഇപ്പോൾ വലിയൊരു തുക നഷ്ടപരിഹാരമായി നൽകി പ്രശ്നം ഒതുക്കിത്തീർക്കാൻ ശ്രമിക്കുന്നത്. എങ്കിലും മക്കൾ രണ്ടുപേരും അമ്മയുടെ തീരുമാനത്തിന് പൂർണ്ണ പിന്തുണ നൽകുന്നതായാണ് കുടുംബവുമായി അടുത്ത വൃത്തങ്ങൾ നൽകുന്ന സൂചന.വിജയിയുടെ കരിയറിലെ അവസാന ചിത്രമെന്ന് വിശേഷിപ്പിക്കപ്പെടുന്ന ‘ജന നായകൻ’ എന്ന സിനിമയുടെ റിലീസ് ഒരുക്കങ്ങൾ നടക്കുന്നതിനിടയിലാണ് ഈ വിവാദങ്ങൾ കൊടുമ്പിരിക്കൊള്ളുന്നത്. എച്ച്. വിനോദ് സംവിധാനം ചെയ്യുന്ന ഈ ചിത്രം വിജയിയുടെ രാഷ്ട്രീയ പ്രവേശനത്തിന് മുന്നോടിയായുള്ള വലിയ പ്രോജക്റ്റായാണ് കണക്കാക്കപ്പെടുന്നത്.

ചിത്രത്തിന്റെ സെൻസർ നടപടികളും മറ്റു നിയമപ്രശ്നങ്ങളും കാരണം റിലീസ് പലതവണ നീണ്ടുപോയിരുന്നു. വ്യക്തിജീവിതത്തിലെ ഈ തിരിച്ചടികൾ സിനിമയുടെ റിലീസിനെ ബാധിക്കുമോ എന്ന ആശങ്കയിലാണ് ആരാധകർ. ജൂൺ മാസത്തിൽ വിജയിയുടെ ജന്മദിനത്തോടനുബന്ധിച്ച് ചിത്രം റിലീസ് ചെയ്യാനാണ് ഇപ്പോൾ അണിയറ പ്രവർത്തകർ ആലോചിക്കുന്നത്.കോടതി ഈ വിവാഹമോചന ഹർജിയിൽ ഏപ്രിൽ 20-ന് വിജയിയോട് ഹാജരാകാൻ ആവശ്യപ്പെട്ടിട്ടുണ്ട്. സംഗീതയുടെ ഹർജിയിൽ സ്പെഷ്യൽ മാര്യേജ് ആക്ട് പ്രകാരമുള്ള വിവാഹമോചനമാണ് ആവശ്യപ്പെട്ടിരിക്കുന്നത്.

ഇതിനിടയിൽ വിജയ് ഒത്തുതീർപ്പിന് ശ്രമിക്കുന്നത് കോടതി നടപടികൾ ഒഴിവാക്കി സ്വകാര്യമായി പ്രശ്നം പരിഹരിക്കാനാണ്. 1999-ൽ വിവാഹിതരായ ഇവർ കോളിവുഡിലെ ഏറ്റവും മാതൃകാ ദമ്പതികളായാണ് അറിയപ്പെട്ടിരുന്നത്. എന്നാൽ 27 വർഷത്തിന് ശേഷമുള്ള ഈ വേർപിരിയൽ ആരാധകർക്ക് വിശ്വസിക്കാനായിട്ടില്ല. വരും ദിവസങ്ങളിൽ വിജയിയുടെ ഭാഗത്തുനിന്നും ഔദ്യോഗികമായ പ്രതികരണം ഉണ്ടാകുമോ എന്നാണ് സിനിമാ ലോകം ഉറ്റുനോക്കുന്നത്.

Tamil superstar Vijay and his wife Sangeetha Sornalingam are reportedly heading for a divorce after 27 years of marriage. Sangeetha has filed a petition in the Chengalpattu District Court, alleging infidelity and mental cruelty, specifically mentioning an extramarital relationship involving Vijay and a prominent actress. Recent reports suggest that Vijay is attempting an out-of-court settlement by offering ₹250 crore as alimony for Sangeetha and their two children, fearing that a public legal battle might damage his political aspirations with Tamilaga Vettri Kazhagam (TVK). The situation remains tense as the court has summoned Vijay for a hearing on April 20, while he prepares for the release of his final film, ‘Jana Nayagan’.