വാഷിങ്ടൺ: ഇറാനെതിരെ യുഎസും ഇസ്രയേലും സംയുക്തമായി നടത്തുന്ന സൈനികനടപടിയെ പിന്തുണയ്ക്കാത്തതിന് പിന്നാലെ സ്പെയിനിന് നേരെ യുഎസ് പ്രസിഡന്റ് ഡൊണാൾഡ് ട്രംപിന്റെ ഭീഷണി. സ്പെയിനുമായുള്ള വ്യാപാരം അവസാനിപ്പിക്കുമെന്ന് പ്രസിഡന്റ് ഡോണാൾഡ് ട്രംപ് പറഞ്ഞു.
‘സ്പെയിനുമായുള്ള എല്ലാ വ്യാപാരവും ഞങ്ങൾ അവസാനിപ്പിക്കാൻ പോകുന്നു’ ജർമ്മൻ ചാൻസലർ ഫ്രീഡ്രിക്ക് മെർസുമായുള്ള ഓവൽ ഓഫീസ് കൂടിക്കാഴ്ചയ്ക്കിടെ മാധ്യമങ്ങളോട് സംസാരിക്കുകയായിരുന്നു ട്രംപ്. സ്പെയിനുമായി ഞങ്ങൾക്കൊന്നും ചെയ്യാനില്ലെന്നും അദ്ദേഹം വ്യക്തമാക്കി.
ഐക്യരാഷ്ട്രസഭയുടെ ചട്ടങ്ങൾക്ക് വിരുദ്ധമായുള്ള ഏതെങ്കിലും ആക്രമണങ്ങളിൽ സ്പെയിനിലെ സംയുക്തമായി പ്രവർത്തിക്കുന്ന താവളങ്ങൾ ഉപയോഗിക്കാൻ തന്റെ രാജ്യം യുഎസിനെ അനുവദിക്കില്ലെന്ന് സ്പാനിഷ് വിദേശകാര്യ മന്ത്രി ജോസ് മാനുവൽ അൽബാരസ് കഴിഞ്ഞ ദിവസം പറഞ്ഞിരുന്നു. ഇതിന് പിന്നാലെയാണ് ട്രംപിന്റെ ഭീഷണി പ്രസ്താവന. ഇറാനെതിരായ ആക്രമണത്തിൽ സ്പെയിനിലെ സൈനിക താവളങ്ങൾ ഉപയോഗിച്ചിട്ടില്ലെന്നും അൽബാരസ് വ്യക്തമാക്കിയിരുന്നു.
എന്നാൽ സ്പെയിൻ നിഷേധിച്ചാലും തങ്ങൾക്ക് വേണമെങ്കിൽ താവളം ഉപയോഗിക്കാമായിരുന്നുവെന്ന് ട്രംപ് പറഞ്ഞു. ‘ഞങ്ങൾക്ക് വേണമെങ്കിൽ അവരുടെ താവളം ഉപയോഗിക്കാം. ഞങ്ങൾ അവിടെ പറന്നെത്താം. അത് ഉപയോഗിക്കരുതെന്ന് ആരും ഞങ്ങളോട് പറയില്ല, പക്ഷേ ഞങ്ങൾ അത് ചെയ്യേണ്ടതില്ല’ ട്രംപ് പറഞ്ഞു.
‘സ്പെയിനുമായുള്ള എല്ലാ വ്യാപാരവും ഞങ്ങൾ വിച്ഛേദിക്കാൻ പോകുന്നു. സ്പെയിനുമായി ഒരു ബന്ധവും ഞങ്ങൾ ആഗ്രഹിക്കുന്നില്ല’ യുഎസ് പ്രസിഡന്റ് കൂട്ടിച്ചേർത്തു.
സ്പെയിൻ യൂറോപ്യൻ യൂണിയന്റെ കുടക്കീഴിൽ ആയതിനാൽ ട്രംപ് എങ്ങനെ സ്പെയിനുമായുള്ള വ്യാപാരം അവസാനിപ്പിക്കുമെന്നത് വ്യക്തമല്ലെന്ന് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു. എല്ലാ 27 അംഗ രാജ്യങ്ങൾക്കും വേണ്ടി യൂറോപ്യൻ യൂണിയനാണ് വ്യാപാര കരാറുകൾ ചർച്ച ചെയ്യുന്നത്. ഇറാൻ യുദ്ധം എതിർക്കുന്നത് കൂടാതെ നാറ്റോ ചെലവ് വർദ്ധിപ്പിക്കാൻ അനുവദിക്കാത്തതും സ്പെയിനെതിരെയുള്ള ട്രംപിന്റെ ഭീഷണിക്ക് കാരണമായിട്ടുണ്ട്.
നാറ്റോയുടെ 5% പ്രതിരോധ ചെലവ് ലക്ഷ്യത്തിൽ നിന്ന് പിന്മാറിയ സ്പെയിനിന്റെ കഴിഞ്ഞ വർഷത്തെ തീരുമാനത്തെക്കുറിച്ച് ട്രംപ് ചൊവ്വാഴ്ച വീണ്ടും പരാതിപ്പെട്ടു. നാറ്റോ ചെലവ് 5% ആയി വർദ്ധിപ്പിക്കാൻ സമ്മതിക്കാത്ത ഏക രാജ്യം സ്പെയിൻ ആണെന്നും ട്രംപ് പറഞ്ഞു. അവർ 2% ആയി നിലനിർത്താൻ ആഗ്രഹിച്ചു, അവർ ആ 2% പോലും അടയ്ക്കുന്നില്ലെന്നും ട്രംപ് കൂട്ടിച്ചേർത്തു.
ട്രംപ് പറഞ്ഞത് ശരിയാണെന്ന് പറഞ്ഞ ജർമൻ ചാൻസലർ ‘ഇത് നമ്മുടെ പൊതുവായ സുരക്ഷയുടെ ഭാഗമാണെന്നും, നാമെല്ലാവരും ഇത് പാലിക്കണമെന്നും അവരെ ബോധ്യപ്പെടുത്താൻ ഞങ്ങൾ ശ്രമിക്കുകയാണ്’ എന്നും പറഞ്ഞു. ട്രംപിന്റെ ഭീഷണിക്ക് സ്പെയിൻ മറുപടി നൽകുകയും ചെയ്തു.
അന്താരാഷ്ട്ര നിയമങ്ങളും യൂറോപ്യൻ യൂണിയനുമായുള്ള ഉഭയകക്ഷി വ്യാപാര കരാറുകളും യുഎസ് ശ്രദ്ധിക്കണമെന്ന് സ്പെയിൻ പറഞ്ഞു. ‘യുഎസ് വ്യാപാര ഉപരോധത്തിന്റെ സാധ്യമായ ആഘാതം നിയന്ത്രിക്കാൻ ആവശ്യമായ വിഭവങ്ങൾ ഞങ്ങളുടെ പക്കലുണ്ട്’ സ്പാനിഷ് സർക്കാർ പ്രസ്താവനയിൽ പറഞ്ഞു.
U.S. President Donald Trump has issued a stern threat to Spain after the country declined to support the joint military operations by the U.S. and Israel against Iran. Trump announced that the United States would consider terminating trade relations with Spain as a consequence of their stance. This move marks a significant escalation in diplomatic tensions between the two nations over the ongoing Middle East conflict.