കൊല്ലം: വാഹനങ്ങൾ മോഷ്ടിച്ച് പൊളിച്ചു വിൽക്കുന്ന സംഘത്തിലെ പ്രധാനി പിടിയിൽ. കൊല്ലം നിലമേൽ സ്വാദേശി സുജിത്ത് (27) ആണ് പിടിയിലായത്. അറസ്റ്റ് രേഖപ്പെടുത്തിയ പ്രതിയെ കോടതിയിൽ ഹാജരാക്കി കോടതി റിമാൻഡ് ചെയ്തു.
എയ്സ് പിക്കപ്പ് വാഹനം മോഷണം പോയെന്ന് വ്യക്തമാക്കി നിലമേൽ സ്വദേശി ശ്രീരാജിന്റെ പരാതിയിൽ ചടയമംഗലം പോലീസ് കേസെടുക്കുകയായിരുന്നു. സിസിടിവി ദൃശ്യങ്ങൾ കേന്ദ്രീകരിച്ച് നടത്തിയ അന്വേഷണത്തിലാണ് സുജിത്ത് പിടിയിലായത്.
നവംബർ മുപ്പതിനാണ് നിലമേൽ ഭാഗത്ത് പാർക്ക് ചെയ്തിരുന്ന ശ്രീരാജിൻ്റെ എയ്സ് പിക്കപ്പ് വാഹനം സുജിത്തും പള്ളിക്കൽ സ്വദേശിയായിട്ടുള്ള മോനിയും ചേർന്ന് മോഷ്ടിക്കാൻ ശ്രമിച്ചത്. തമിഴ്നാട് കേന്ദ്രീകരിച്ച് വാഹനങ്ങൾ പൊളിച്ചു വിൽക്കുന്ന വ്യക്തിക്ക് എയ്സ് പിക്കപ്പിൻ്റെ ചിത്രം അയച്ച് നൽകുകയും തുടർന്ന് വാഹനം കൈമാറി 35,000 രൂപ ഗൂഗിൾ പേ വഴി വാങ്ങുകയും ചെയ്തു. സ്വന്തം വാഹനം ആണെന്ന് തെറ്റിദ്ധരിപ്പിച്ചാണ് വിൽപ്പന നടത്തിയത്.
വാഹനം പൊളിക്കാൻ വാങ്ങിയ തമിഴ്നാട് സ്വദേശിയുടെ നിർദേശ പ്രകാരം ആറ്റിങ്ങലിൽ ഉള്ള ക്രയിൻ നിലമേൽ എത്തുകയും സുജിത്തും മോനിയും കാട്ടികൊടുത്ത പിക്കപ്പ് വാഹനം കല്ലമ്പലം ഭാഗത്തേക്ക് കടത്തി കൊണ്ടു പോവുകയും ചെയ്തു. വാഹനം കാണാതായതോടെ ശ്രീരാജ് ചടയമംഗലം പോലീസിൽ പരാതി നൽകി.
ചടയമംഗലം പോലീസ് സിസിടിവി ദൃശ്യങ്ങൾ കേന്ദ്രീകരിച്ച് നടത്തിയ അന്വേഷണത്തിൽ മോഷ്ടിച്ച വാഹനം കല്ലമ്പലത്തു നിന്ന് കണ്ടെത്തി. ക്രയിൻ സർവീസുകാരന്റെ സഹായത്തോടെയാണ് സുജിത്തിനെയും മോനിയെയും കുറിച്ചുള്ള വിവരങ്ങൾ പോലീസിന് ലഭിച്ചത്. നിലമേലിലെ വീട്ടിൽ നിന്നാണ് സുജിത്ത് പിടിയിലായത്. മോനി ഒളിവിലാണ്.
സുജിത്തിനെ കൂടുതൽ ചോദ്യം ചെയ്തതിൽ നിന്നും ക്രയിൻ സെർവീസുകാരന്റെ മൊഴിയിൽ നിന്നും സുജിത്തും സംഘവും നിരവധി വാഹനങ്ങൾ ഇത്തരത്തിൽ മോഷണം നടത്തി പൊളിച്ചിട്ടുണ്ടെന്ന് വ്യക്തമായി. മോനിയെ പിടികൂടാനുള്ള തീവ്ര ശ്രമത്തിലാണ്. വാഹന മോഷണവുമായി ബന്ധപ്പെട്ട് വിശദമായ അന്വേഷണം നടത്താനാണ് പോലീസിൻ്റെ തീരുമാനം.
