തിരുവനന്തപുരം: മലപ്പുറം ജില്ലയിലെ പ്ലസ് വണ് സീറ്റ് പ്രതിസന്ധിയുമായി ബന്ധപ്പെട്ട് പ്രതിഷേധത്തിന് ഇറങ്ങിയ എസ്.എഫ്.ഐയെ പരിഹസിച്ച് വിദ്യാഭ്യാസമന്ത്രി വി. ശിവന്കുട്ടി. കുറേ നാളായി സമരം ചെയ്യാതെ ഇരിക്കുന്നവരല്ലേ. സമരം ചെയ്ത് ഉഷാറായി വരട്ടെയെന്ന് മന്ത്രി തിരുവനന്തപുരത്ത് മാധ്യമങ്ങളോട് പറഞ്ഞു.
വിദ്യാഭ്യാസ സംഘടനകള്ക്കും തൊഴിലാളി സംഘടനകള്ക്കും സമരം ചെയ്യാനുള്ള അവകാശമുണ്ട്. അവരുടെ അവകാശത്തെ താന് നിഷേധിക്കുന്നില്ല. കുറേ നാളായി സമരം ചെയ്യാതെ ഇരുന്നവരല്ലേ. സമരം ചെയ്ത് ഉഷാറായി വരട്ടെയെന്നും ശിവൻകുട്ടി കൂട്ടിച്ചേര്ത്തു.
സര്ക്കാരിന്റെ മനസ്സ് സമരക്കാര് മനസ്സിലാക്കണം. ഒരു കുട്ടിക്കും പ്രവേശനത്തിന് പ്രയാസം ഉണ്ടാകരുത് എന്നാണ് സര്ക്കാര് നിലപാട്. അവർ എന്താണ് മനസിലാക്കിയിരിക്കുന്നതെന്ന് അറിയില്ല. അവരുടേത് തെറ്റിധാരണയാകാം. നാളെ വിദ്യാര്ഥി സംഘടനകളുമായി നടത്തുന്ന ചര്ച്ചയില് എല്ലാം മനസിലാക്കും. പ്ലസ് വണ് സീറ്റ് വിഷയത്തില് നിലവില് നടക്കുന്ന സമരത്തിന് പിന്നില് രാഷ്ട്രീയ ദുഷ്ലാക്കും തെറ്റിധാരണയുമുണ്ടെന്നും മന്ത്രി കൂട്ടിച്ചേർത്തു.
മലപ്പുറത്ത് പുതിയ പ്ലസ് വണ് ബാച്ചുകള് അനുവദിക്കണമെന്നാണ് എസ്.എഫ്.ഐ.യുടെ ആവശ്യം. തുടർന്ന്, തിങ്കളാഴ്ച രാവിലെ മലപ്പുറം കളക്ടറേറ്റിലേക്ക് എസ്.എഫ്.ഐ. പ്രതിഷേധ മാര്ച്ചും സംഘടിപ്പിച്ചിരുന്നു. മലപ്പുറത്ത് മേഖലാ ഹയര് സെക്കന്ഡറി ഉപഡയറക്ടറുടെ ഓഫീസ് എം.എസ്.എഫ്, കെ.എസ്.യു. പ്രവര്ത്തകരും ഉപരോധിച്ചു.