തിരുവനന്തപുരം: വന്ദേഭാരതിന്റെ ഉദ്ഘാടനവുമായി ബന്ധപ്പെട്ട് കെ.മുരളീധരന് നടത്തിയ വിമര്‍ശനങ്ങള്‍ക്ക് മറുപടി പറഞ്ഞ് കേന്ദ്രമന്ത്രി വി.മുരളീധരന്. സാഹചര്യമനുസരിച്ച് പ്രസ്താവനകള്‍ മാറ്റി മാറ്റി നടത്തുന്ന ആളാണ് കെ.മുരളീധരനെന്ന് വി.മുരളീധരന് പരിഹസിച്ചു.
‘ദിവസം മുഴുവന്‍ ബിജെപിക്കാരെ കാണുമ്പോഴുണ്ടായ അസ്വസ്ഥതയാണോ അദ്ദേഹത്തെ ഇങ്ങനെയൊക്കെ പറയിപ്പിച്ചതെന്നറിയില്ല. സാഹചര്യമനുസരിച്ച് പ്രസ്താവന നടത്താന്‍ മിടുക്കുള്ളയാളാണ് കെ.മുരളീധരന്. അദ്ദേഹത്തിന്റെ വിമര്‍ശനങ്ങളെ ഗൗരവത്തിലെടുക്കുന്നില്ല’ കേന്ദ്ര മന്ത്രി പറഞ്ഞു.
ക്ഷണം കിട്ടിയ ആളുകളാണ് വന്ദേഭാരതിന്റെ ഉദ്ഘാടന ഓട്ടത്തില്‍ ഉണ്ടായിരുന്നത്. എംപിമാര്‍ക്കുള്ള അതേ പാസ് ബിജെപിക്കാരുടെ കൈയിലും ഉണ്ടായിരുന്നു എന്നതാണ് അദ്ദേഹത്തിന്റെ പരിഭവം. എംപിയെന്ന് പറഞ്ഞാല്‍ ജനങ്ങളുടെ ഭാഗമാണ്. ബിജെപിക്കാര്‍ക്ക് കിട്ടിയ പാസ് പോര, എംപിക്ക് പ്രത്യേക പാസ് വേണം എന്നൊക്കെ പറയുന്നത് ജനാധിപത്യത്തില്‍ ഉണ്ടാവേണ്ട കാര്യമല്ല. ജനങ്ങളുടെ മുതലാളിയും യജമാനനുമല്ല എംപി. സാധാരണക്കാരുടെ കൂടെ യാത്ര ചെയ്യാനാണ് നമ്മളെല്ലാവരും ആഗ്രഹിക്കേണ്ടതെന്നും വി.മുരളീധരന് പറഞ്ഞു.
‘വി.മുരളീധരന് അല്ല സ്വീകരണം നല്‍കിയത്. ട്രെയിനിനെയാണ് സ്വീകരിച്ചത്. എന്റെ മുന്നിലല്ല സെല്‍ഫിയെടുത്തത്, തീവണ്ടിക്ക് മുന്നിലാണ്. തീവണ്ടി സെലിബ്രേറ്റി ആകുന്ന ഒരു സാഹചര്യമാണ് ഇന്നുള്ളത്. ഇത്തരത്തിലുള്ള തീവണ്ടികള്‍ കഴിഞ്ഞ കാലത്തൊന്നും ഇല്ലാത്തപ്പോള്‍ ജനങ്ങള്‍ക്ക് അതിനോട് കൗതുകവും താത്പര്യവുമുണ്ടാകും. കോണ്‍ഗ്രസുകാരോട് വരേണ്ടെന്ന് ആരും പറഞ്ഞിട്ടില്ല’ വി.മുരളീധരന് പറഞ്ഞു.
അലൂമിനിയം പട്ടേല്‍ എന്ന് വിളിച്ച ആളെ പിന്നീട് താണുവണങ്ങിയില്ലേ. തനിക്കൊക്കെ ഒറ്റ ആശയവും ഒറ്റ പ്രസ്ഥാനവുമാണ്. അദ്ദേഹത്തിന് കാലത്തിനനുസരിച്ച് പലതും മാറ്റിപറയേണ്ടി വരുമെന്നും കേന്ദ്ര മന്ത്രി പരിഹസിച്ചു.