ഹോർമുസ് കടലിടുക്കിൽ യുഎസ് പിടിച്ചെടുത്ത കപ്പലിൽ മിസൈൽ നിർമ്മാണ സാമഗ്രികൾ? ചൈന-ഇറാൻ ബന്ധം ചർച്ചയാകുന്നു

വാഷിങ്ടൺ: ഹോർമുസ് കടലിടുക്കിൽ വെച്ച് യുഎസ് നാവികസേന പിടിച്ചെടുത്ത ഇറാനിയൻ കപ്പലിൽ മിസൈൽ നിർമ്മാണത്തിന് ഉപയോഗിക്കുന്ന രാസവസ്തുക്കളുണ്ടായിരുന്നതായി ഗുരുതര ആരോപണം. മുൻ യുഎൻ അംബാസഡറും റിപ്പബ്ലിക്കൻ നേതാവുമായ നിക്കി ഹേലിയാണ് ഈ വെളിപ്പെടുത്തലുമായി രംഗത്തെത്തിയത്.

ചൈനയിൽ നിന്ന് ഇറാനിലേക്ക് യാത്ര ചെയ്തിരുന്ന കപ്പലിൽ ഇറാന്റെ ബാലിസ്റ്റിക് മിസൈൽ പദ്ധതികൾക്ക് ആവശ്യമായ വസ്തുക്കളാണ് ഉണ്ടായിരുന്നതെന്ന് അവർ ചൂണ്ടിക്കാട്ടി. യുഎസ് നാവികസേന ആവർത്തിച്ച് ആവശ്യപ്പെട്ടിട്ടും കപ്പൽ നിർത്താൻ തയ്യാറാകാതിരുന്നതിനെത്തുടർന്നാണ് ബലം പ്രയോഗിച്ച് പിടിച്ചെടുത്തതെന്നും ഹേലി വ്യക്തമാക്കി. ഇറാൻ ഭരണകൂടത്തിന് ചൈന നൽകുന്ന സൈനികവും സാങ്കേതികവുമായ പിന്തുണ ഗൗരവമായി കാണേണ്ടതുണ്ടെന്നും ഇത് ആഗോള സുരക്ഷയ്ക്ക് ഭീഷണിയാണെന്നും അവർ മുന്നറിയിപ്പ് നൽകി.

പിടിച്ചെടുക്കപ്പെട്ട ‘എംവി ടൗസ്ക’ എന്ന കപ്പൽ ചൈനയിലേക്ക് പതിവായി യാത്ര ചെയ്യുന്ന കപ്പൽ വ്യൂഹത്തിന്റെ ഭാഗമാണെന്ന് വാൾ സ്ട്രീറ്റ് ജേണലും റിപ്പോർട്ട് ചെയ്തിട്ടുണ്ട്. ഒമാൻ ഉൾക്കടലിൽ വെച്ച് തടയപ്പെട്ട ഈ കപ്പൽ ഇറാന്റെ ആയുധ നിർമ്മാണ മേഖലയെ സഹായിക്കുന്ന ഉൽപ്പന്നങ്ങളാണ് വഹിച്ചിരുന്നതെന്നാണ് അമേരിക്കയുടെ രഹസ്യാന്വേഷണ വിഭാഗത്തിന്റെ നിഗമനം. ഇറാന്റെ മിസൈൽ ശേഷി വർദ്ധിപ്പിക്കുന്നതിൽ ചൈന നിർണ്ണായക പങ്ക് വഹിക്കുന്നുണ്ടെന്നതിന് തെളിവാണ് ഈ കപ്പൽ പിടിച്ചെടുക്കൽ എന്ന് നിക്കി ഹേലി ആരോപിച്ചു. ചൈനയുടെ സൈനിക പിന്തുണ ഇറാനെ മേഖലയിൽ കൂടുതൽ പ്രകോപനപരമായ നിലപാടുകൾ എടുക്കാൻ പ്രേരിപ്പിക്കുന്നുവെന്നും അമേരിക്കൻ ഭരണകൂടം വിലയിരുത്തുന്നു.

അതേസമയം, അന്താരാഷ്ട്ര നിയമങ്ങൾ ലംഘിച്ചുള്ള അമേരിക്കയുടെ ഈ നടപടിയെ ‘സായുധ കടൽക്കൊള്ള’ എന്നാണ് ഇറാൻ വിശേഷിപ്പിച്ചത്. സ്വന്തം കപ്പൽ പിടിച്ചെടുത്തതിന് ശക്തമായ തിരിച്ചടി നൽകുമെന്ന് ഇറാൻ മുന്നറിയിപ്പ് നൽകി. ഈ സംഭവം പാകിസ്താനിലെ ഇസ്ലാമാബാദിൽ നടക്കാനിരിക്കുന്ന സമാധാന ചർച്ചകളെ പ്രതിസന്ധിയിലാക്കിയിരിക്കുകയാണ്.

തങ്ങൾക്കെതിരെയുള്ള നാവിക ഉപരോധം പിൻവലിക്കാതെ ഒരു ചർച്ചയ്ക്കും തയ്യാറല്ലെന്ന് ഇറാൻ വ്യക്തമാക്കുമ്പോൾ, ഒരു കരാറിൽ എത്തുന്നതുവരെ നിയന്ത്രണങ്ങൾ തുടരുമെന്ന കടുത്ത നിലപാടിലാണ് പ്രസിഡന്റ് ഡൊണാൾഡ് ട്രംപ്. ഹോർമുസ് കടലിടുക്കിലെ ഈ നാവിക പോരാട്ടം പശ്ചിമേഷ്യയെ വീണ്ടും ഒരു യുദ്ധത്തിന്റെ മുനമ്പിലെത്തിച്ചിരിക്കുകയാണ്.

Former UN Ambassador Nikki Haley alleged that the Iranian ship seized by the US Navy in the Strait of Hormuz was carrying chemicals used for missile manufacturing from China. The vessel, identified as MV Touska, reportedly ignored repeated orders to stop, fueling concerns over China’s military support for Iran’s ballistic missile program. While Iran condemned the seizure as “armed piracy” and threatened retaliation, President Donald Trump maintained that the blockade would continue until a formal agreement is reached.