വാഷിങ്ടണ്: ലെയോ പതിനാലാമന് മാര്പ്പാപ്പയുമായുള്ള വാക്പോര് മുറുകുന്നതിനിടെ, രാജ്യത്തോടുള്ള എളിമയുടെ സന്ദേശവുമായി അമേരിക്കന് പ്രസിഡന്റ് ഡൊണാള്ഡ് ട്രംപ് രംഗത്തെത്തുന്നു. അമേരിക്കയുടെ 250-ാം ജന്മദിനത്തോടനുബന്ധിച്ച് സംഘടിപ്പിക്കുന്ന ‘അമേരിക്ക ബൈബിള് വായിക്കുന്നു’ എന്ന പരിപാടിയുടെ ഭാഗമായാണ് ട്രംപ് ബൈബിള് വചനങ്ങള് പാരായണം ചെയ്യുന്നത്. ഇന്ന് വൈകുന്നേരം ആറുമണിയോടെ ട്രംപിന്റെ പ്രസംഗം പുറത്തുവരുമെന്നാണ് റിപ്പോര്ട്ടുകള്.
ബൈബിളിലെ ഏഴാം അധ്യായത്തിലെ 11 മുതല് 22 വരെയുള്ള വചനങ്ങളാണ് ട്രംപ് വായിക്കുക. ഇതില് ഏറെ പ്രശസ്തമായ പതിനാലാം വാക്യം എളിമയെയും പശ്ചാത്താപത്തെയും കുറിച്ചുള്ളതാണ്. ‘എന്റെ നാമം വിളിക്കപ്പെട്ടിരിക്കുന്ന എന്റെ ജനം തങ്ങളെത്തന്നെ താഴ്ത്തി പ്രാര്ത്ഥിച്ച് എന്റെ മുഖം അന്വേഷിക്കുകയും തങ്ങളുടെ ദുര്മ്മാര്ഗ്ഗങ്ങളെ വിട്ടുതിരിയുകയും ചെയ്താല്, ഞാന് സ്വര്ഗ്ഗത്തില്നിന്ന് കേട്ട് അവരുടെ പാപം ക്ഷമിച്ച് അവരുടെ ദേശത്തിന് സൗഖ്യം വരുത്തും’ എന്നതാണ് ഈ വചനം.
ഇറാന് യുദ്ധവുമായി ബന്ധപ്പെട്ട് മാര്പ്പാപ്പ നടത്തിയ പരാമര്ശങ്ങളെത്തുടര്ന്ന് ഇരുവര്ക്കുമിടയില് കടുത്ത ഭിന്നത നിലനില്ക്കുന്ന പശ്ചാത്തലത്തിലാണ് ഈ നീക്കം എന്നത് ശ്രദ്ധേയമാണ്. മാര്പ്പാപ്പ കുറ്റകൃത്യങ്ങളോട് മൃദുസമീപനം സ്വീകരിക്കുന്ന വ്യക്തിയാണെന്നും ബലഹീനനാണെന്നും ട്രംപ് തന്റെ സോഷ്യല് മീഡിയ പ്ലാറ്റ്ഫോമായ ‘ട്രൂത്ത് സോഷ്യല്’ വഴി കഴിഞ്ഞ ആഴ്ച വിമര്ശിച്ചിരുന്നു. മുന് പ്രസിഡന്റ് ബരാക് ഒബാമയുടെ ഉപദേശകന് ഡേവിഡ് ആക്സല്റോഡുമായി മാര്പ്പാപ്പ കൂടിക്കാഴ്ച നടത്തിയതിനെയും ട്രംപ് രൂക്ഷമായി പരിഹസിച്ചു. വിവാദങ്ങളുടെ തോഴനായ ട്രംപ്, കഴിഞ്ഞ ദിവസം തന്നെ യേശുവായി ചിത്രീകരിക്കുന്ന എഐ നിര്മ്മിത ചിത്രം പങ്കുവെച്ചതും വലിയ ചര്ച്ചയായിരുന്നു.
എന്നാല് ഈ ചിത്രത്തില് താന് ഒരു ഡോക്ടറായാണ് പ്രത്യക്ഷപ്പെട്ടതെന്നായിരുന്നു ട്രംപിന്റെ വിചിത്രമായ വിശദീകരണം. മാര്പ്പാപ്പയും ട്രംപും തമ്മിലുള്ള തര്ക്കം അന്താരാഷ്ട്ര തലത്തില് തന്നെ വലിയ ശ്രദ്ധ നേടിയിരിക്കുകയാണ്. ഇറാന് ആണവായുധം കൈവശം വെക്കാമെന്ന് മാര്പ്പാപ്പ പറഞ്ഞതായി ട്രംപ് ആരോപിച്ചെങ്കിലും സഭ ഇത് നിഷേധിച്ചിട്ടുണ്ട്. പ്രസിഡന്റ് പദവിയിലെത്തിയ കാലം മുതല് ബൈബിളുമായി ബന്ധപ്പെട്ട് നിരവധി അബദ്ധങ്ങള് ട്രംപിന് സംഭവിച്ചിട്ടുണ്ട്. 2020-ല് ബ്ലാക്ക് ലൈവ്സ് മാറ്റര് പ്രതിഷേധത്തിനിടെ സെന്റ് ജോണ്സ് ചര്ച്ചിന് മുന്നില് ബൈബിള് തലകീഴായി പിടിച്ച് ഫോട്ടോയ്ക്ക് പോസ് ചെയ്തത് വലിയ വിവാദമായിരുന്നു.
അന്ന് പ്രതിഷേധക്കാരെ കണ്ണീര്വാതകം പ്രയോഗിച്ച് നീക്കിയ ശേഷമായിരുന്നു ട്രംപിന്റെ ഈ വിവാദ ഫോട്ടോ സെഷന്. മുന്പ് ലിബര്ട്ടി സര്വകലാശാലയില് നടത്തിയ പ്രസംഗത്തില് ‘സെക്കന്ഡ് കൊറിന്ത്യന്സ്’ എന്നതിന് പകരം ‘ടു കൊറിന്ത്യന്സ്’ എന്ന് ട്രംപ് പ്രയോഗിച്ചതും ക്രൈസ്തവ ലോകത്ത് പരിഹാസത്തിന് ഇടയാക്കിയിരുന്നു. തന്റെ പ്രിയപ്പെട്ട ബൈബിള് വചനം ഏതാണെന്ന മാധ്യമപ്രവര്ത്തകരുടെ ചോദ്യത്തിന്, അത് തികച്ചും വ്യക്തിപരമായ കാര്യമാണെന്ന് പറഞ്ഞ് ഒഴിഞ്ഞുമാറുകയായിരുന്നു അദ്ദേഹം പതിവായി ചെയ്തിരുന്നത്. പഴയ നിയമമാണോ പുതിയ നിയമമാണോ കൂടുതല് ഇഷ്ടമെന്ന ചോദ്യത്തിന് ‘രണ്ടും തുല്യം’ എന്നായിരുന്നു ട്രംപിന്റെ മറുപടി.
പ്രസ്ബിറ്റീരിയന് വിഭാഗത്തില്പ്പെട്ടയാളാണെങ്കിലും രാഷ്ട്രീയ ജീവിതത്തില് ഇവാഞ്ചലിക്കല് ക്രിസ്ത്യന് നേതാക്കളുമായാണ് ട്രംപ് കൂടുതല് അടുപ്പം പുലര്ത്തുന്നത്. കഴിഞ്ഞ മാസം ഓവല് ഓഫീസില് വെച്ച് ഇവാഞ്ചലിക്കല് നേതാക്കള് ട്രംപിന് വേണ്ടി പ്രാര്ത്ഥിക്കുന്ന ചിത്രങ്ങളും പുറത്തുവന്നിരുന്നു. രാഷ്ട്രീയമായ നേട്ടങ്ങള്ക്കായി ട്രംപ് മതം ഉപയോഗിക്കുന്നുവെന്ന വിമര്ശനം ഇതിനോടകം തന്നെ ശക്തമാണ്. ബൈബിള് സംബന്ധമായ അബദ്ധങ്ങള് പലപ്പോഴും സംഭവിക്കാറുണ്ടെങ്കിലും അമേരിക്കയിലെ ക്രൈസ്തവ വിഭാഗങ്ങള്ക്കിടയില് ട്രംപിന് വലിയ സ്വാധീനമുണ്ട്.
2024-ലെ തിരഞ്ഞെടുപ്പില് വെള്ളക്കാരായ ഇവാഞ്ചലിക്കല് പ്രോട്ടസ്റ്റന്റ് വോട്ടര്മാരുടെ 81 ശതമാനം പിന്തുണയും ട്രംപിനായിരുന്നു. ഡെമോക്രാറ്റിക് സ്ഥാനാര്ത്ഥിയായ കമലാ ഹാരിസിനെക്കാള് വലിയ ഭൂരിപക്ഷമാണ് ഈ വിഭാഗത്തില് നിന്ന് ട്രംപ് നേടിയത്.
വെള്ളക്കാരായ കത്തോലിക്കര്ക്കിടയിലും ട്രംപിന് മികച്ച പിന്തുണയുണ്ട്. കണക്കുകള് പ്രകാരം 60 ശതമാനം കത്തോലിക്കരും ട്രംപിനെയാണ് പിന്തുണയ്ക്കുന്നത്. എന്നാല് മാര്പ്പാപ്പയുമായുള്ള പരസ്യമായ പോര് ഈ വോട്ട് ബാങ്കില് വിള്ളല് വീഴ്ത്തുമോ എന്ന ആശങ്ക റിപ്പബ്ലിക്കന് ക്യാമ്പിനുണ്ട്. അമേരിക്കന് തിരഞ്ഞെടുപ്പുകളില് നിര്ണ്ണായക ശക്തിയായ കത്തോലിക്കാ വോട്ടുകള് തിരിച്ചുപിടിക്കാനുള്ള തന്ത്രമായാണ് ഇപ്പോള് ഓവല് ഓഫീസിലിരുന്നുള്ള ബൈബിള് പാരായണത്തെ രാഷ്ട്രീയ നിരീക്ഷകര് വിലയിരുത്തുന്നത്.
Amidst the escalating naval blockade in the Strait of Hormuz, President Donald Trump participated in the “America Reads the Bible” event today, April 21, 2026. This follows a high-profile public feud with Pope Leo XIV over the moral legitimacy of the conflict with Iran. By reading a passage from 2 Chronicles focused on humility and healing the land, Trump aims to stabilize his image and appeal to the American religious base while maintaining a hardline stance in the Middle East.