കോട്ടയം: കുറവിലങ്ങാട് മോനിപ്പള്ളിയിൽ നിയന്ത്രണം വിട്ട കാറും ടോറസ് ലോറിയും കൂട്ടിയിടിച്ച് രണ്ടു പേർക്ക് ദാരുണാന്ത്യം. പത്തനംതിട്ട അടൂർ സ്വദേശികളായ രണ്ടു പേരാണ് അപകടത്തിൽ മരിച്ചത്. പത്തനംതിട്ട അടൂർ സ്വദേശികളായ മനോജ്, കുട്ടൻ എന്നിവരാണ് മരിച്ചതെന്നു പൊലീസ് തിരിച്ചറിഞ്ഞിട്ടുണ്ട്. എന്നാൽ, ഇവരുടെ വിലാസം അടക്കമുള്ള വിവരങ്ങൾ പൊലീസിനു ലഭിച്ചിട്ടില്ല. അപകടത്തെ തുടർന്ന് റോഡിൽ കിടന്ന ഇരുവരെയും കുറവിലങ്ങാട് പൊലീസ് എത്തിയാണ് ആശുപത്രിയിൽ എത്തിച്ചത്. അപ്പോഴേയ്ക്കും മരണം സംഭവിച്ചിരുന്നു.
അപകടത്തിൽ ടോറസ് ലോറി ഡ്രൈവർ കുറവിലങ്ങാട് സ്വദേശി സോമനും പരിക്കേറ്റിട്ടുണ്ട്. ഇദ്ദേഹത്തെ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. ചൊവ്വാഴ്ച പുലർച്ചെ അഞ്ചരയോടെയായിരുന്നു കേസിനാസ്പദമായ സംഭവം. ബന്ധുവിനെ നെടുമ്പാശേരി വിമാനത്താവളത്തിൽ യാത്രയാക്കിയ ശേഷം മടങ്ങിയെത്തുകയായിരുന്നു അടൂർ സ്വദേശികൾ. കുറവിലങ്ങാട് മോനിപ്പള്ളിയിൽ ഷാപ്പിനു സമീപത്തു വച്ച് എതിർ ദിശയിൽ നിന്നും എത്തിയ ടോറസ് ലോറിയുമായി നേർക്കുനേർ ഇടിക്കുകയായിരുന്നു കാർ. ഇടിയുടെ ആഘാതത്തിൽ കാറിന്റെ മുൻ ഭാഗം പൂർണമായും തകർന്നു.
ടോറസ് ലോറി കാറിൽ ഇടിച്ചതിനെ തുടർന്ന് കാറിന്റെ മുൻ ഭാഗം പൂർണമായും തകർന്നിരുന്നു. കാറിനുള്ളിൽ രണ്ടു പേരും കുടുങ്ങിക്കിടക്കുകയായിരുന്നു. രണ്ടു പേരെയും പൊലീസ് സംഘവും അഗ്നിരക്ഷാ സേനയും എത്തി കാർ വെട്ടിപ്പൊളിച്ചാണ് പുറത്തെടുത്തത്. കാറിൽ ഇടിച്ച ശേഷം വെട്ടിച്ചുമാറ്റിയ ടോറസ് ലോറി സമീപത്തെ തോട്ടിലേയ്ക്കു മറിഞ്ഞിരുന്നു. നാട്ടുകാരും പൊലീസും ചേർന്നാണ് ടോറസ് ലോറിയ്ക്കുള്ളിൽ നിന്നും ഡ്രൈവർ സോമനെ പുറത്തെടുത്തത്. സാരമായി പരിക്കേറ്റ ഇദ്ദേഹത്തെ കോട്ടയം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.
കുറവിലങ്ങാട്ട് നിന്നും കൂത്താട്ടുകുളത്തിനു ലോഡുമായി പോയ ലോറിയാണ് അപകടത്തിൽപ്പെട്ടത്. ഓടിക്കൂടിയ നാട്ടുകാർ ചേർന്ന് വിവരം കുറവിലങ്ങാട് പൊലീസിൽ അറിയിച്ചു. എന്നാൽ, നാട്ടുകാർ ആരും രക്ഷാപ്രവർത്തനം നടത്താനോ പരിക്കേറ്റവരെ പുറത്തെടുക്കാനോ തയ്യാറായില്ല. തുടർന്ന്, കുറവിലങ്ങാട് പൊലീസ് സ്ഥലത്ത് എത്തിയാണ് അപകടത്തിൽ മരിച്ചവരെ കാറിൽ നിന്നും പുറത്തെടുത്തത്. തുടർന്ന്, ആശുപത്രിയിൽ എത്തിച്ചെങ്കിലും മരണം സംഭവിച്ചിരുന്നു.