തൃശ്ശൂര്: പൊതുജനങ്ങൾക്ക് സുരക്ഷയൊരുക്കേണ്ട പോലീസ് സ്റ്റേഷനുള്ളില് നിയമം കാക്കേണ്ട ഉദ്യോഗസ്ഥര് തന്നെ പരസ്യമായി മദ്യസല്ക്കാരം നടത്തിയ സംഭവത്തില് മൂന്ന് പോലീസ് ഉദ്യോഗസ്ഥര്ക്ക് സസ്പെന്ഷന്. കുന്നംകുളം എസിപി നടത്തിയ വിശദമായ വകുപ്പുതല അന്വേഷണ റിപ്പോര്ട്ടിന്റെ അടിസ്ഥാനത്തിലാണ് തൃശ്ശൂര് സിറ്റി പോലീസ് കമ്മീഷണര് കുറ്റക്കാരായ ഉദ്യോഗസ്ഥര്ക്കെതിരെ അടിയന്തര സസ്പെന്ഷന് നടപടി സ്വീകരിച്ചത്.
ചേലക്കര പോലീസ് സ്റ്റേഷനിലെ ഗ്രേഡ് എസ്ഐ, രണ്ട് സിവില് പോലീസ് ഓഫീസര്മാര് (സിപിഒ) എന്നിവര്ക്കെതിരെയാണ് കര്ശനമായ ശിക്ഷാനടപടിയുണ്ടായത്. സ്റ്റേഷനകത്ത് വെച്ച് ഉദ്യോഗസ്ഥര് സംഘം ചേര്ന്ന് മദ്യപിക്കുന്നുണ്ടെന്ന രഹസ്യ വിവരം തൃശ്ശൂര് സിറ്റി പോലീസ് കമ്മീഷണര്ക്ക് നേരിട്ട് ലഭിച്ചതിനെ തുടര്ന്നായിരുന്നു നാടകീയമായ മിന്നല് പരിശോധന നടത്തിയത്.
കഴിഞ്ഞ വ്യാഴാഴ്ച രാത്രി 11 മണിയോടുകൂടിയാണ് സിനിമാ സ്റ്റൈലിലുള്ള അപ്രതീക്ഷിത പരിശോധന ചേലക്കര സ്റ്റേഷനില് അരങ്ങേറിയത്. കമ്മീഷണറുടെ പ്രത്യേക നിര്ദ്ദേശപ്രകാരം വടക്കാഞ്ചേരി സിഐയുടെ നേതൃത്വത്തിലുള്ള ഉദ്യോഗസ്ഥര് ചേലക്കര പോലീസ് സ്റ്റേഷനില് പെട്ടെന്ന് ഇരച്ചുകയറുകയായിരുന്നു. ഈ സമയം ഔദ്യോഗിക ഡ്യൂട്ടിയിലായിരിക്കെ സ്റ്റേഷനകത്തിരുന്ന് മദ്യപിക്കുകയായിരുന്ന മൂന്ന് ഉദ്യോഗസ്ഥരെയും സിഐയും സംഘവും കൈയോടെ പിടികൂടുകയായിരുന്നു.
തുടര്ന്ന് ഇവരെ ഉടന് തന്നെ താലൂക്ക് ആശുപത്രിയിലെത്തിച്ച് വൈദ്യപരിശോധനയ്ക്ക് വിധേയരാക്കുകയും ഗ്രേഡ് എസ്ഐയും രണ്ട് സിവില് പോലീസ് ഉദ്യോഗസ്ഥരും ഡ്യൂട്ടി സമയത്ത് മദ്യപിച്ചതായി മെഡിക്കല് റിപ്പോര്ട്ടില് സ്ഥിരീകരിക്കുകയും ചെയ്തു.പോലീസ് സേനയ്ക്ക് ആകെ നാണക്കേടുണ്ടാക്കിയ ഈ ഗുരുതരമായ അച്ചടക്ക ലംഘനത്തെക്കുറിച്ച് കൃത്യമായി അന്വേഷിക്കാന് കുന്നംകുളം എസിപിയെ ഉടനടി ചുമതലപ്പെടുത്തിയിരുന്നു.
തുടര്ന്ന് എസിപി നടത്തിയ വിശദമായ അന്വേഷണത്തില് ഉദ്യോഗസ്ഥരുടെ ഭാഗത്തുനിന്നും ഔദ്യോഗിക കൃത്യനിർവഹണത്തിൽ കടുത്ത വീഴ്ചയുണ്ടായതായി ബോധ്യപ്പെടുകയും ഇവര്ക്കെതിരെ കര്ശന നടപടിക്ക് ശുപാര്ശ ചെയ്തുകൊണ്ട് സിറ്റി പോലീസ് കമ്മീഷണര്ക്ക് റിപ്പോര്ട്ട് കൈമാറുകയായിരുന്നു. ഈ റിപ്പോര്ട്ടിന്റെ അടിസ്ഥാനത്തിലാണ് മൂവരെയും സര്വീസില് നിന്നും അടിയന്തരമായി സസ്പെന്ഡ് ചെയ്തുകൊണ്ട് കമ്മീഷണര് ഉത്തരവിറക്കിയത്. സംഭവത്തില് ഇവർക്കെതിരെ കൂടുതല് കർശനമായ വകുപ്പുതല അച്ചടക്ക നടപടികള് വരും ദിവസങ്ങളിൽ തുടരുമെന്നും ഉന്നത പോലീസ് വൃത്തങ്ങള് അറിയിച്ചു.
English Summary
Three police officers, including a Grade SI and two Civil Police Officers (CPOs), have been suspended following a departmental probe into a liquor party held inside the Chelakkara Police Station in Thrissur. The emergency suspension order was issued by the Thrissur City Police Commissioner based on an investigation report by the Kunnamkulam ACP. Acting on a tip-off received by the Commissioner, a team led by the Wadakkanchery CI conducted a dramatic midnight raid at the station last Thursday and caught the officers red-handed. A subsequent medical examination confirmed that they were under the influence of alcohol while on duty.