കൊച്ചി: അയല്വീട്ടില് സ്ഥാപിച്ചിരുന്ന സിസിടിവി ക്യാമറയിലെ ദൃശ്യങ്ങള് പരിശോധിക്കുന്നതിനിടെ രണ്ട് പേര് മതില്ച്ചാടി കടക്കുന്നത് കണ്ടു. ദൃശ്യങ്ങള് വീട്ടുടമസ്ഥന് അയച്ചുകൊടുത്തു. തുടര്ന്ന് ഉടമ വീട്ടിലെത്തി പരിശോധിച്ചപ്പോള് തെളിഞ്ഞത് ലക്ഷങ്ങളുടെ സ്വര്ണ മോഷണം. കലൂരിലെ പൂട്ടിയിട്ടിരുന്ന വീട്ടില് നിന്ന് 45 ലക്ഷം രൂപ വിലവരുന്ന 79 പവന് സ്വര്ണവും ആധാരങ്ങളുമാണ് മോഷണം പോയത്. കലൂര് ദേശാഭിമാനി റോഡിലെ ഫ്രണ്ട്സ് ലെയിനിലുള്ള കല്ലുംപുറത്ത് കോശി ഐസക് പണിക്കരുടെ വീട്ടില് വെള്ളിയാഴ്ചയാണ് മേഷണം നടന്നത്.
ഏകദേശം 12.40നാണ് മോഷ്ണം നടന്നത്. രണ്ട് പേര് വീടിന്റെ മതില് ചാടി കടക്കുന്നത് സിസിടിവിയില് നിന്ന് വ്യക്തമായെന്ന് പോലീസ് പറഞ്ഞു. ടോയ്ലറ്റിന്റെ വെന്റിലേഷന് ജനല് തകര്ത്താണ് മോഷ്ടാക്കള് വീടിനുള്ളില് കയറിയത്. തുടര്ന്ന് കിടപ്പുമുറിയില് എത്തിയ മോഷ്ടാക്കള് അലമാര കുത്തിത്തുറന്നാണ് കവര്ച്ച നടത്തിയത്. നോര്ത്ത് പോലീസ് കേസെടുത്ത് അന്വേഷണം ആരംഭിച്ചു. ശനിയാഴ്ച രാവിലെ ഫോറന്സിക് വിദഗ്ധരും വിരലടയാള വിദഗ്ധരും പോലീസ് ഡോഗ് സ്ക്വാഡും വീട്ടില് പരിശോധന നടത്തി.
പ്രത്യേക പോലീസ് സംഘം സിസിടിവി ദൃശ്യങ്ങള് വച്ച് അന്വേഷണം ആരംഭിച്ചു. സി.സി.ടി.വി ദൃശ്യങ്ങളില്നിന്ന് ഈ വീടിനും പരിസരത്തും സ്ഥിരമായി ആക്രി പെറുക്കുന്ന സംഘങ്ങളുടെ സാന്നിധ്യം കണ്ടെത്തിയതായി അന്വേഷണത്തിന് മേല്നോട്ടം വഹിക്കുന്ന സെന്ട്രല് എ.സി.പി സി. ജയകുമാര് പറഞ്ഞു. നഗരത്തില് രാത്രി തങ്ങുന്ന സംഘങ്ങളെയും പരിശോധിക്കുന്നുണ്ട്. സ്ഥിരം മോഷ്ടാക്കള് ഉള്പ്പെടെയുള്ളവരെ ചോദ്യംചെയ്തു. അടുത്തിടെ ജയില് മോചിതരായവരെ കേന്ദ്രീകരിച്ചും അന്വേഷണം തുടങ്ങി. മറ്റേതെങ്കിലും സംസ്ഥാന സംഘത്തിന് സംഭവത്തില് പങ്കുണ്ടോയെന്ന് പരിശോധിച്ചുവരുകയാണ്. നോര്ത്ത് സ്റ്റേഷന് ഇന്സ്പെക്ടര് സജീഷ് കുമാറിന്റെ നേതൃത്വത്തില് എസ്.ഐമാര് ഉള്പ്പെടുന്ന ഏഴംഗ സംഘമാണ് അന്വേഷണം നടത്തുക.
കെ.എസ്.ഇ.ബിയില് എക്സിക്യൂട്ടിവ് എന്ജിനീയറായ വീട്ടുടമ തൃശൂരിലും ബാങ്ക് ജീവനക്കാരിയായ ഭാര്യ ബംഗളൂരുവിലുമാണ് ജോലി ചെയ്യുന്നത്. മക്കളും ഇതര സംസ്ഥാനങ്ങളിലാണ് താമസം.