മാനന്തവാടി: വയനാട് കമ്പളക്കാട് മലങ്കരയില്‍ എയര്‍ഗണ്‍ ഉപയോഗിച്ച് യുവാവ് മൂന്നുപേര്‍ക്ക് നേരെ വെടിയുതിര്‍ത്തു. വെടിയേറ്റവര്‍ പരിക്കുകളോടെ ചികിത്സയില്‍. കമ്പളക്കാട് മലങ്കര കോളനിവാസികളായ വിപിന്‍ (17), മണി (54), രാഗിണി (52) എന്നിവര്‍ക്കാണ് പരിക്കേറ്റത്. അയല്‍വാസിയായ മലങ്കര ചൂരത്തൊട്ടിയില്‍ ബിജു ആണ് വെടിയുതിര്‍ത്തത്. മൂന്നുപേരെയും പരിക്കുകളോടെ മാനന്തവാടി മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.
ശനിയാഴ്ച ഉച്ചക്ക് പന്ത്രണ്ടരയോടെയാണ് സംഭവം. മണിയുടെ മുഖത്തിനും രാഗിണിയുടെ കഴുത്തിനുമാണ് വെടിയേറ്റത്. അതേസമയം, കമ്പളക്കാട് മലങ്കര കോളനിയില്‍ യുവാവ് മൂന്ന് കോളനിവാസികളെ എയര്‍ഗണ്‍ ഉപയോഗിച്ച് വെടിവെച്ച സംഭവത്തില്‍ പരിക്കുപറ്റിയവര്‍ക്ക് എല്ലാ സഹായങ്ങളും നല്‍കുമെന്ന് മന്ത്രി കെ രാധാകൃഷ്ണന്‍ പറഞ്ഞു. പരിക്കേറ്റ് മാനന്തവാടി ഗവ. മെഡിക്കല്‍ കോളേജില്‍ ചികിത്സയിലുള്ളവരെ മന്ത്രി കെ രാധാകൃഷ്ണന്‍ സന്ദര്‍ശിച്ചു.
പരിക്കു പറ്റിയവര്‍ക്ക് എല്ലാവിധ ചികിത്സയും ഉറപ്പാക്കാന്‍ മന്ത്രി ഡിഎംഒക്ക് നിര്‍ദ്ദേശം നല്‍കി. പരിക്കേറ്റവരുടെ ചികിത്സയുമായും മറ്റും ബന്ധപ്പെട്ട ചിലവുകള്‍ വഹിക്കാന്‍ ട്രൈബല്‍ വകുപ്പ് അധികൃതര്‍ക്കും മന്ത്രി നിര്‍ദ്ദേശം നല്‍കി. ശനിയാഴ്ച ഉച്ചയ്ക്ക് പന്ത്രണ്ടരയോടെയാണ് സംഭവം നടന്നത്. ആരുടേയും പരിക്ക് സാരമുള്ളതല്ല. ഒആര്‍ കേളു എംഎല്‍എ, ഡിപിഎം ഡോ. സമീഹ സൈതലവി, ട്രൈബല്‍ ഡവലപ്പ്മെന്റ് ഓഫീസര്‍ സി ഇസ്മയില്‍ തുടങ്ങിയവര്‍ മന്ത്രിയോടൊപ്പമുണ്ടായിരുന്നു.
