പാലക്കാട്: വാണിയംകുളത്തെ ജ്വല്ലറിയിൽ നിന്നും അരപവൻ തൂക്കംവരുന്ന സ്വർണ്ണമാല മോഷ്ടിച്ച യുവതിയെ ഒറ്റപ്പാലം പോലീസ് അറസ്റ്റുചെയ്തു. പാലക്കാട് തരൂർ സ്വദേശിനിയായ സുജിതയാണ് (30) അറസ്റ്റിലായത്. സ്വർണ്ണം വാങ്ങാനെന്ന വ്യാജേനയെത്തിയ യുവതിയാണ് അരപവൻ തൂക്കം വരുന്ന സ്വർണ്ണമാല ജ്വല്ലറിയിൽ നിന്നും മോഷ്ടിച്ചത്. കഴിഞ്ഞ ജൂൺ മാസം 15 നാണ് കേസിന് ആസ്പദമായ സംഭവം നടന്നത്.
സംഭവ ദിവസം രാവിലെ 10.47 ഓടെയാണ് യുവതി ജ്വല്ലറിയിൽ എത്തിയത്. സഹോദരിയുടെ കുട്ടിക്കായി സ്വർണ്ണം വാങ്ങാനെന്ന വ്യാജേന ജ്വല്ലറിയിലെ ജീവനക്കാരോട് സംസാരിക്കുകയും യുവതി ആവശ്യപ്പെട്ട പ്രകാരം ജീവനക്കാർ മോഡലുകൾ പ്രദർശിപ്പിക്കുകയും ചെയ്തു. ഈ സമയമാണ് ജീവനക്കാരുടെ കണ്ണുവെട്ടിച്ച് അര വൻതൂക്കം വരുന്ന സ്വർണ്ണമാല യുവതി കൈക്കലാക്കുന്നത്.
പിന്നീട് ഒരു അത്യാവശ്യകാര്യമുണ്ടെന്ന് ജീവനക്കാരെ ധരിപ്പിച്ച യുവതി എടിഎം കൗണ്ടറിലേക്കാണെന്നും ഉടനെ വരാമെന്നും പറഞ്ഞ് ജ്വല്ലറിയിൽനിന്നും ഇറങ്ങി പോവുകയായിരുന്നു. ഈ സമയം പേരും വിലാസവും മൊബൈൽ നമ്പറും ചോദിച്ച ജീവനക്കാർക്ക് വ്യാജ മേൽ വിലാസമാണ് പ്രതി നൽകിയത്. അന്നേ ദിവസം വൈകിട്ട് സ്റ്റോക്ക് പരിശോധിക്കുമ്പോഴാണ് മോഷണ വിവരം മനസ്സിലാക്കുന്നത്.
സിസിടിവി ദൃശ്യങ്ങൾ പരിശോധിച്ചപ്പോഴാണ് രാവിലെവന്ന് സ്വർണ്ണമാലക്കായി അന്വേഷണം നടത്തിപ്പോയ യുവതിയാണ് മോഷണം നടത്തിയതെന്ന് വ്യക്തമായത്. പിന്നീട് കടയുടമ ഒറ്റപ്പാലം പോലീസിൽ പരാതി നൽകുകയായിരുന്നു. ഒറ്റപ്പാലം പോലീസിൻറെ നേതൃത്വത്തിൽ നടത്തിയ അന്വേഷണത്തിലാണ് പ്രതി പിടിയിലാകുന്നത്. സ്വർണ്ണമാല പട്ടാമ്പിയിലെ ജ്വല്ലറിയിൽ വിറ്റതായും പോലീസ് കണ്ടെത്തി.
പ്രതിയെ ജ്വല്ലറിയിലെത്തിച്ച് തെളിവെടുപ്പും നടത്തി. എസ്ഐ പ്രവീൺ, എഎസ്ഐ ഗംഗാധരൻ, സിപിഒ മാരായ സജിത്ത്, ഹർഷാദ്എന്നിവരുടെ നേതൃത്വത്തിലാണ് അന്വേഷണം നടക്കുന്നത്. അറസ്റ്റിലായ പ്രതിക്ക് വടക്കാഞ്ചേരി തൃശ്ശൂർ എന്നിവിടങ്ങളിൽ സമാനമായ കേസുകളുള്ളതായും പോലീസ് പറഞ്ഞു.