തൃശൂര്: തൃശൂര് പൂരത്തിന് മുന്നോടിയായി പാറമേക്കാവ് ദേവസ്വത്തിന് വേണ്ടി വെടിക്കെട്ട് സാമഗ്രികള് നിര്മ്മിച്ചിരുന്ന പടക്ക നിര്മ്മാണശാലയ്ക്ക് സ്റ്റോപ്പ് മെമ്മോ. പാലക്കാട് മുതലമട വെള്ളാരംകടവിലുള്ള വെടിമരുന്ന് നിര്മ്മാണശാലയുടെ പ്രവര്ത്തനമാണ് ജില്ലാ കളക്ടറുടെ ഉത്തരവിനെത്തുടര്ന്ന് തടഞ്ഞത്. തൃശൂര് പൂരം വെടിക്കെട്ടിനായി സാമഗ്രികള് ഒരുക്കുന്ന പ്രധാന കേന്ദ്രങ്ങളില് ഒന്നാണിത്.
മുതലമടയിലെ നിര്മ്മാണശാലയില് പരിശോധന നടത്തിയ ചിറ്റൂര് തഹസില്ദാര് ആര്. രാമചന്ദ്രനാണ് കളക്ടറുടെ നിര്ദ്ദേശപ്രകാരം സ്റ്റോപ്പ് മെമ്മോ കൈമാറിയത്. കഴിഞ്ഞ ദിവസം തൃശൂര് മുണ്ടത്തിക്കോട്ടുണ്ടായ വെടിക്കെട്ടപകടത്തിന്റെ പശ്ചാത്തലത്തില് പടക്കനിര്മ്മാണ ശാലകളില് പരിശോധന കര്ശനമാക്കുന്നതിന്റെ ഭാഗമായാണ് നടപടി.
പടക്കനിര്മ്മാണ ശാല നേരിട്ട് സന്ദര്ശിച്ച തഹസില്ദാര് അവിടുത്തെ സുരക്ഷാ ക്രമീകരണങ്ങളും നിലവിലെ സാഹചര്യങ്ങളും വിലയിരുത്തിയിരുന്നു. പരിശോധനയില് കണ്ടെത്തിയ പോരായ്മകള് പരിഗണിച്ചാണ് അടിയന്തരമായി പ്രവര്ത്തനം നിര്ത്താന് ആവശ്യപ്പെട്ടത്. പൂരത്തിന് ദിവസങ്ങള് മാത്രം ബാക്കി നില്ക്കെ നിര്മ്മാണശാലയ്ക്ക് സ്റ്റോപ്പ് മെമ്മോ ലഭിച്ചത് വെടിക്കെട്ട് ഒരുക്കങ്ങളെ ബാധിക്കുമോ എന്ന ആശങ്ക ഉയര്ത്തുന്നുണ്ട്.
അതേസമയം, തൃശൂര് പൂരത്തിന്റെ നടത്തിപ്പില് ജനവികാരം കണക്കിലെടുക്കുമെന്ന് പാറമേക്കാവ് ദേവസ്വം അധികൃതര് വ്യക്തമാക്കി. സുരക്ഷാ മാനദണ്ഡങ്ങള് പാലിച്ചുകൊണ്ട് തന്നെ ആചാരപരമായ വെടിക്കെട്ട് നടത്തുന്നതിനാണ് ദേവസ്വം മുന്ഗണന നല്കുന്നത്.